¹ Lokola mvingani ya difua kele muana, yandi kele disuasuani ve na nanga, ata yandi me kuvua bima nionso; ² yandi kele kaka na insi ya lusansu ya minkengi na minkebi tii na ntangu yina Tata kubikaka. ³ Mutindu mosi na beto mpe, ntangu beto vuandaka bana, beto vuandaka na insi ya kinanga ya mabanza mavanga ya inza; ⁴ kansi ntantu kilokula fuanaka, Tata Nzambi tindaka Muana na yandi, yayi butukaka na nkento, na insi ya nsiku, ⁵ samu ti yandi sumba ba yina vuandaka na insi ya nsiku, samu ti beto bakua bonso bana. ⁶ Mpe samu beno kele bana, Tata Nzambi tindaka na ba ntima na beto Mpeve ya Muana na yandi, yayi kena ku boka: Aba! Papa! ⁷ Na yau, nge kele diaka nanga ve, kansi muana; mpe kana nge kele muana, nge kele mvingani ya difua na nlemvo ya Tata Nzambi. ⁸ Na ba ntangu lutaka, beno zabaka Tata Nzambi ve, beno vuandaka sadila ba nzambi kele, na kikadulu na bau, ba kele ba nzambi ve; ⁹ kansi na ntangu yayi beno me me kuiza zaba Tata Nzambi, to Tata Nzambi me kuiza zaba beno, inki mutindu beno kena ku vutukila bima ya kulebakana mpe ya mpambala mpambala, beno zola sadila diaka yau e? ¹⁰ Beno tala bilumbu, ba ngonda, ba ntangu mpe ba mvula! ¹¹ Mu kele na wonga na kumona ti kisalu ya mpamba kuani mu salaka samuna beno. ¹² Beno vuanda bonso munu, samu munu diaka mu kele bonso beno. Ba mpangi, mu kena kudodokila beno. Beno salaka munu ata imbi mosi ve. ¹³ Beno me zaba ti ya kele samuna kieta ya nsuni, mbala ya ntete mu samuninaka beno Nsangu ya Mbote. ¹⁴ Kansi mu tontuaka na nsuni na munu, beno tubaka kimbangi samuna kuvueza ve, kuyina ve; nkutu beno yambaka munu bonso mbasi ya Tata Nzambi, bonso Yesu Klisto. ¹⁵ Wami kele mpova ya mambote na beno e? Samu mu kena ku fimpa beno ti, kana ya lendakanaka, beno zolaka ki katula meso samuna kupesa munu yau. ¹⁶ Me kituka ntantu na beno samu me tubila beno kedika e? ¹⁷ Vema kele na bau samuna beno kele ya luvunu, kansi ba zola vambisa beno na beto, samu beno vuanda vema na bau. ¹⁸ Ya kele ya mbote na ku vuanda na vema samuna mambu ya mbote mpe na ntangu nionso, kansi na ntangu mu kele na beno kaka ve. ¹⁹ Bana na munu, ba yayi mu kena ku muena diaka miangala ya kubuta, tii ntangu Klisto ke vangama kati na beno, ²⁰ ntangu yayi mu zola vuanda penepene na beno, mpe kusoba ndinga, samu mu kena ki kuamisa ssamuna beno. ²¹ Beno zabisa munu, beno kena kuzola kuvuanda na insi ya nsinku, Beno kena kuwa nsiku ve? ²² Samu ya sonamaka ti Abalahami butaka bana zole, mosi na nkento vuandaka nanga, mpe yankaka na nkento vuandaka mfumu. ²³ Kansi muana ya nanga butukaka na nsuni, kansi yina ya nkento vuandaka mfumu butukaka nsilulu. ²⁴ Mambu yayi kele bingana; samu bakento yayi kele tuwawanu zole. mosi me katuka na mongo ya Sinayi, butukaka samuna kinanga, ya kele Angali,- ²⁵ samu Angali, kele mongo ya Sinayi na kati ya Alabia,- mpe yandi me fuanana na Yelusalemi ya bubu, yayi kele na kinanga kintuadi na bana na yandi. ²⁶ Kansi Yelusalemi ya mazulu kele kimpuanza, yandi kele mama na beto; ²⁷ samu ya kele ya kusonama: Yangalala, nge kisita, nge yayi ke butaka ve! Kiekumuka mpe boka nge, nge yayi monaka minsongo ya kubuta ve! Samu muntu ya kinsona kele na bana mingi kuluta bana ya nkento ya makuela. ²⁸ Samuna beno, ba mpangi, bonso Isaki, beno kele bana ya nsilulu; ²⁹ mpe mutindu mosi yina butukaka na nsuni vuandaka zoma yina butukaka na Mpeve, ntangu yayi, ya kele mutindu yina. ³⁰ Kansi inki Masonukua kena kutuba e? Kuka nanga na muana na yandi, samu muana nya nanga ke vingila difua na muana butukaka na nkento ya kimpuanza ve. ³¹ Yau yina, ba mpangi, beto kele bana ya nkento a nanga ve, kansi ya nkento ya kimpuanza.