¹ O ba Ngalatiya, bantu ya buzengi, nani me vukumuna beno, beno yayi ve monaka Yesyu Klisto ku komua na dikulunsi e? ² N beno kaka mu zola zabila diambu yayi: Ya kele na mavanga ya nsiku beno bakilaka Mpeve, to na ndongosolo ya kiminu? ³ Na mutindu yina nde beno kele na buzengi e? Na manima kubanda na Kimpeve, ntangu yayi, beno zola manisina na kinsuni e ? ⁴ Mpasi ya mpamba kuandi beno lunguaka e? Kansi kana ya mpamba kuani. ⁵ Yina kena kupesa beno Mpeve, mpe kena kusala bimangu kati na beno, na inki yandi kena kusadila yau, na mavanga ya nsiku to na ndongosolo ya kiminu? ⁶ Mutindu Abalahami tulaka kiminu na Tata Nzambi, mpe yandi tumbuaka muntu ya lunungu, ⁷ beno zaba ti ba yina kaka kele na kiminu nde kele bana ya Abalahami. ⁸ Bosi beno zaba ti Masonukua kubikaka ti Tata Nzambi lendaka nungisa ba pakanu na kiminu, yandi tuamaka samuna nsangu yina ya mbote na Abalahami: Ba insi nionso ya inza ke sakumunua na nge! ⁹ na mutindu ti ba yina kena tutula kiminu ba sakumunua na Abalahami muntu ya kiminu. ¹⁰ Samu bantu nionso me kangama na mavanga ya nsiku kele na insi ya nsingulu; samu ya sonamaka: yandi singua muntu yina zitisa ve nionso yina sonamaka na mukanda ya nsiku, mpe kena kusadila yau ve. ¹¹ Mpe ya me zabakana ti muntu ata mosi ve lenda nungusua na ntuala ya Tata Nzambi samuna nsiku, yau yina me sonamaka: muntu ya lunungu ke zingila na kiminu. ¹² Nzoka, nsiku ke tuadusuaka na kiminu ve; kansi ya ke tubaka: Yina ke sadila mambu yayi ke zinga samuna yau. ¹³ Klisto kulaka beto na nsingulu ya nsiku, na ntangu yandi kitukaka nsingulu samuna beto- samu ya sonamaka: Yandi singua muntu yina ke manukua na inti, ¹⁴ samu ti lusakunu ya Abalahami samuna ba pakanu kukisama na Yesu Klisto, mpe samu beto tambula nsilulu ya Mpeve na kiminu. ¹⁵ Ba mpangi, mu kena kutuba mutindu bantu ya kuyunduka ka tubilaka, na luwawanu ya mbote, ata bantu salaka yau, muntu mosi ve kabikisaka yau, mpe muntu mpe ve kena kubuela kima vana. ¹⁶ Nzoka Abalahami na nkuna na yandi tambulaka nsilulu. Yandi tubaka ve: na mi nkuna, bonso ti ya kele mingi, kansi nkuna mosi kaka: mpe na nkuna na nge, ya zola tuba, na Klisto. ¹⁷ Tala yina mu kena kuwa: ti Tata Nzambi siamisaka luwawanu na nsilulu yina kituluaka kima ve tekaka vuanda na ntete, lenda kabukusua na nsiku ve, yayi kuizaka na manima ya ba mvula mafunda iya na makumi tatu. ¹⁸ Samu kana difua lendaka kuiza na nsiku, ya ke kuizila diaka na nsilulu ve; nzoka ya kele na nsilulu ya nkayilu yina Tata Nzambi silaka Abalahami na nlemvo na yandi. ¹⁹ Samuna ikni nsiku? Ya pesamaka samuna ntulumunu, tii ngizulu ya nkuna siluaka nsilu; ya zayikusuaka na ba mbasi, na nzila ya nwizisi. ²⁰ Nzoka, nwizisi kele nwizisi ya muntu mosi ve, kansi Tata Nzambi kele mosi kaka. ²¹ Inki, nsiku kele kakidilaka ba nsilulu ya Tata Nzambi e? Ve kuandi! Kana nsiku pesamaka lendaka pesa moyo, ya kedika lunungu zolaka kuizila na nsiku. ²² Kansi Masonukua fukaka nionso na insi ya masumu, samu ti yina siluaka pesama na kiminu na Yesu Klisto na ba yina kena kutula kiminu. ²³ Tekila kiminu kuiza, beto vuandaka na insi ya kinkole ya nsiku, kaka samu kiminu yayi lendaka zabusua. ²⁴ Na yau, nsiku vuandaka bonso nlongi kena kunata beto na Klisto, samu ti beto nungusua na kiminu. ²⁵ Ntangu kiminu kuizaka, beto vuandaka diaka na mfunu ya nnlongi ve. ²⁶ Samu beno nionso kele bana ya Tata Nzambi na kiminu na Yesu Klisto; ²⁷ Beno nionso yayi botukuaka na Klisto, beno vuataka Klisto. ²⁸ Ata Nyudayo to muntu ya Elene kele diaka ve, ata nanga to mfumu kele diaka ve, ata bakala to nkento kele diaka ve; samu beno nionso kele muntu mosi na Yesu Klisto. ²⁹ Mpe kana beno kele na Klisto, na yau, beno kele nkuna ya Abalahami, mi mvingani ya difua mutindu kele nsilulu.