¹ Ba mpangi, kana muntu me bakama na konso diambi ya imbi, beno kele ya kimpeve, beno sungika yandi na mpeve ya kimpombo. Ku kikenga nge mosi, samu nge vukumunua ve. ² Beno natasana bizitu, bosi beno ke lungisa nsiku ya Klisto. ³ Kana muntu kena kukibanzila kuvuanda ya nene, mpe yandi kele mutindu yina ve, yandi kena kukivuna yandi mosi. ⁴ Bika konso muntu fiongunina mavanga ya yandi mosi, mpe bosi yandi ke baka diambu yandi lenda kukizitisa, kansi na yankaka ve; ⁵ samu konso muntu ke nata kizitu na yandi mosi kaka. ⁶ Bika yina kena kulongua mambu ya Tata Nzambi, kabula ndambu ya bima na yandi na muntu kena kulonga yandi. ⁷ Beno kukivuna ve: ba ke sekininaka Tata Nzambi ve. Yina muntu ke kunaka, yau mpe yandi ke yonzikaka. ⁸ Yina ke kunaka samuna nsuni, ke yonzika na nsuni mfukulu; kansi yina ke kunaka samuna Mpeve ke yonzika na Mpeve moyo ya ba mvula na mvula. ⁹ Beto tatamana kusala mambu ya mbote,; samu beto ke yonzika na ntangu ya kufuana, kana beto bikidila ve. ¹⁰ Na yau, kana beto kele na ntangu, beto sala mambote na bantu nionso, kansi beto luta sala yau na ba mpangi kele na beto kiminu ya ntuadi. ¹¹ Beno tala, mukanda ya nene me sonikina beno na diboko na munu. ¹² Ba yina nionso zola kiyangidika na nsuni kena kutatimisa beno na kukizengisa, samu kaka ba zomua ve samuna dikulunsi ya Klisto. ¹³ Na yau, bantu ya kuzengua bau mosi ke tumamaka na nsiku ve; kansi ba kena kuzola ti beno zengua, samuna kukizitisa na nsuni na beno. ¹⁴ Na yina me tadila munu, mu kele na dibanza ata fioti ve ya kukizitisa na mambu yankaka kana ya dikulunsi ya Mfumu Yesu Klisto ve, na nzila ya yandi inza komuaka samuna munu, mutindu mu kena kukizitisa samuna inza! ¹⁵ Samu ya kele imbi ve na kuzengua to na kuzengua ve; diambu kele, ya ya kuvuanda nsemono ya impa. ¹⁶ Yenge mpe nkenda na ba yina nionso ke landa minsiku, mpe na Isaeli ya Tata Nzambi! ¹⁷ Muntu ve, ku banda bubu yayi ke kuamisa munu, samu na nzutu na munu, mu kena kunata bidimbu ya Yesu. ¹⁸ Ba mpangi, bika nlemvo ya Mfumu na beto Yesu Klisto vuanda na mpeve na beno! Ameni!