¹ Ya ke kuandi mfunu ve mu sonikina beno na yina me tadila lusadusu ya banlongo. ² Na yau, me zaba luzolo na beno ya mbote, mu kena kukiyanisa samuna beno na ntuala ya ba makadonia, na kutubaka ti ku banda mvula me luta, Akaya me kubamaka, mpe vema na beno me kuikimisa bantu mingi kuluta. ³ Mu kena kutinda ba mpangi, samu ti luyanu na beno ya fuila mpamba ve na mambu yina, mpe mutindu mu tubaka, beno vuanda ya kubongama. ⁴ Mu zola ve ti kana me zieta na ba makedonia, bosi ba kuta beno ya kubongama ve, beto ke kufua nsoni na kivuvu yina, kansi beno ve. ⁵ Mu zengaka mbote na kutuamisa ba mpangi kuna na beno, samuna kubongisa nkayilu na beno yina beno silaka, samu ya vuanda ya kukubama na mutindu ya nkayilu ya kusakumunu, kansi ya buimi ve. ⁶ Beno zaba, ti yina kena kuna fioti ke yonzika fioti, mpe yina kena kuna mingi ke yonzika mingi. ⁷ Bika muntu muntu pesa mutindu yandi me zengila na ntima na yandi, na kiadi ve, na kutatimisa ve; samu Tata Nzambi ke zolaka yina ke pesaka na kiese. ⁸ Mpe Tata Nzambi lenda fulusa beno na nlemvo ya mutindu nionso, samu ti, ata bilumbu nionso beno kele na bima yina ke yangidika ba nsatu na beno, kansi beno baka diaka ya mingi samuna kisalu na beno ya mbote, ⁹ mutindu ya sonamaka: yandi muangisaka, yandi pesaka na ba mputu; Lunungu na yandi ke sikilaka ba mvula na ba mvula. ¹⁰ Yina ke pesaka nkuna na nkuni, mpe dimpa samuna madia na yandi, ke pesa beno, ke funisa nkuna, mpe yandi ke funisa mbutu ya lunungu na beno. ¹¹ Beno ke vuamisua na nionso, samuna minkayilu ya mpila na mpila ke pesama matondo na Tata Nzambi. ¹² Samu lusadusu ya bima yina kele ve ti ya sadisa bansatu ya ba nlongo kaka, kansi yau kele into ya nene ya kuvutudila matondo mingi na Tata Nzambi. ¹³ Na ntangu ba kena kubaka mfunu ya lusadusu yayi ba kele na kimbangi na yau, ba kena kuzitisa Tata Nzambi na kutumama na beno na kisalu ya Masonukua ya Nlongo ya Klisto, mpe na kinkayila na beno na ntadisi ya bau na ya bantu nionso; ¹⁴ ba ke sambidilaka beno, mpe ba ke zolaka beno samuna nlemvo ya nene ya Tata Nzambi kele na beno. ¹⁵ Ma tondo vutuka na Tata Nzambi samuna nkayilu na yandi ya kuluta kitezo.