¹ Ba mpangi, beto kena kuzabisa beno nlmvo ya Tata Nzambi monikaka na mabundu nionso ya Makedonia. ² Na kati ya ntontolo mingi yina ba monaka, kiese ya kuluta na kimputu na bau ya mingi butaka na dikabu na bau kimvuama mingi ya kukaba. ³ Mu kena kutuba kimbangi ti ba pesaka na luzolo mutindu kele mbakulu, mpe kuluta mbakulu na bau, ⁴ ba tomaka lomba beto, na nlemvo ya Mfumu, na kuvuanda kintuadi ya kusadila ba nlongo. ⁵ Ba pesaka kaka ve na mutindu beto banzilaka, kansi ba tuaminaka kukipese bau mosi na Mfumu, bosi na beto, na luzolo ya Tata Nzambi. ⁶ Beto bakaka Tito, lokola yandi bandaka kisalu ya mvangi a mambote, bika mpe yandi manisa yau. ⁷ Mu tindu beno kena kusala mambu nionso ya kuluta mbote, na kiminu, na mpovolo, na nzayilu, na kimfuzi nionso, mpe na zola kele ne beno samuna beto, beno tala, samu beno sala diaka kisalu ya mvangi a mambote. ⁸ Mu kene kutuba yau samuna kupesa beno ntumunu ve, kansi na kimfuzi ya bantu yankaka, samuna kutonta kedika ya zola na beno. ⁹ Samu beno me zaba nlemvo ya Mfumu na beto Yesu Klisto, yandi vuandaka mvuama, kansi samuna beno, yandi kitukaka mputu, mpe na bumputu na yandi beno vuanda ba mvuama. ¹⁰ Ya kele nduengoso mu kene kupesa beno, samu ya me fuana na beno, na beno kaka ve bandaka ku sala, kansi na beno bantu vuandaka na luzolo kubanda mvula me luta. ¹¹ Ntangu yayi, mutindu beno tulaka zola na mbakulu na beno, mpe bika na vema, beno manisa na kupesa mutindu beno bakilaka kima. ¹² Kana luzolo ya mbote kele, mayangi ke vuandaka na kupesa yina yandi me kuvua, kansi yina yandi me kondua ve. ¹³ Samu ya kele ve ti beno vuanda na kiadi samuna ku sepedisa ba yankaka, ¹⁴ kansi samu beno fuanana; na ntangu yayi, kimvuama na beno ke sadisa bau, mpe ya bau kuiza sadisa bau, samu beno fuanana, ¹⁵ mutindu ya sonamaka: Yina lokutaka mingi kele na yau ya kuluta ve, mpe yina lokutaka fioti zanga kima ve. ¹⁶ Matondo na Tata Nzambi tulaka vema na ntima ya Tito samuna beno; ¹⁷ samu yandi yambaka ndombolo na beto, mpe na kimfuzi mpe na luzolo ya yandi mosi yandi kuendaka na beno ¹⁸ Kintuadi na yandi, beto tindaka mpangi yankaka kele na nsikulu na yina me tadila Nsangu ya Mbote muanganaka na mabundu nionso, ¹⁹ mpe ba mabundu nionso solaka yandi samuna kuzieta na beto na kisalu yayi ya zola beto ke salaka na nkembo ya Mfumu mpe na kutubaka kimbangi ya luzolo na beto ya mbote. ²⁰ Beto kena kusala mutindu yayi, samu muntu mosi semba beto ve na yina me tadila ngionzokolo ya nene ya minkayilu yina beto kena kusala; ²¹ samu beto kena kusosa yina kele ya mbote, na ntuala ya Mfumu kaka ve, kansi na ntuala ya bantu. ²² Beto me tinda kintuadi na bau mpangi na beto, yayi beto ke telaka kimbangi ti yandi kele kimfuzi, beto tontaka yandi na mambu mingi, kansi na bubu yayi, yandi me lutisa diaka vema na kivuvu kele na yandi samuna beno. ²³ Na yau, samuna Tito, yandi kele kintuadi mpe kisadi ya kisalu mosi na munu na ntadisi na beno, mpe samuna ba mpangi na beto yankaka, ba kele ba ntumua ya mabundu mpe nkembo ya Klisto. ²⁴ beno monisa kidimbu ya zola na beno mpe ya luyanu na beno na ntuala ya mabundu, mpe beno monisa bau ti beto kele na luyanu na beno.