¹ Ba mpangi ya luzolo, na kuvuanda na ba nsilulu ya mutindu yayi, beto kukivedisa na nsumukunu ya nsuni mpe ya mpeve, mpe kulungisa mpedoso na beto na kivumi ya Tata Nzambi. ² Beno zibudila teto ba ntima na beno! Beto salaka muntu diambu ya imbi ve, beto bivisaka muntu ve, beto bakaka kima ya muntu na luvunu ve. ³ Ya kele samuna kuzengila beno kitumbu ve mu kena kutubila mutindu yayi; samu mu tubaka ti beno kele na ba ntima na beto mpe beto kele ya kukubamu na kuzinga to na kufua na beno. ⁴ Mu kele na kivuvu ya nene samuna beno, mu kena kukizitisa samuna beno; mu me toma bombua, mu kele ya kufuluka na kiese kati na banzungu na beto nionso. ⁵ Samu kubanda beto kumaka na Makedonia, nsuni na beto pema ata fioti ve; ba muesaka beto nzungu na kuama na mutindu nionso: mvita na nganda, wonga na kati. ⁶ Kansi Tata Nzambi ke bombaka ba yina kele na kiadi, bombaka beto na ngizulu ya Tito, ⁷ mpe na ngizulu na yandi kaka ve, kansi na mbombolo diaka yina Tito bombuaka samuna beno: yandi tubilaka beto disolo ya nsatu na beto, mansanga na beno, kimfuzi na beto samuna munu, na mutindu ti kiese na munu vuandaka ya nene kuluta. ⁸ Ata mu monisaka beno kiadi na mukanda na munu, mu niongulukila yau ve. Mpe, kana me niongulukila yau, samu mu me mona ti mukanda yina monisaka beno kiadi, ata kiadi ya fintangu ntangu kaka, ⁹ na ntangu yayi mu kele na kiese, kiese samuna kiadi beno me muesua ve, kansi samuna kiadi na beno me nata beto na mpilulu a madiela; samu beno me muesua kiadi na luzolo ya Tata Nzambi, samu ti, kima mosi katuka na beto bivisa beno ve. ¹⁰ Na yau, kiadi yina me zola Tata Nzambi ke butaka mpulusu yina ba ke niongulukilaka ata fioti ve, kansi kiadi ya inza ke tukisaka lufua. ¹¹ Mpe tala, kiadi beno monaka, yina Tata Nzambi me zola, inki kimfuzi ve ya tukisaka kati na beno! Inki mutindu ya kukitanina, inki nzanzi, inki wonga, inki mpuila ya ngolo, inki vama, inki kitumbu! Beno monisaka na nionso ti beno vuandaka ya kuvedila na mbebe yina. ¹² Kana mu sonikinaka beno, ya vuandaka ve samuna muntu yina fingaka, to yina finguaka; kansi samu ti vema kele na beno samuna beto, ya monika na kati na beno na ntuala ta Tata Nzambi. ¹³ Yau yina beto bombuaka. Kansi, na nganda ya mbombolo, beto me luta yangalala na kiese ya Tito, ntangu beno nionso vuvikaka mpeve na yandi. ¹⁴ Mpe kana na ntuala na yandi mu kukiyanaka fioti na yina me tadila beno, mu fuisuaka nsoni ve; kansi, lokola bilumbu nionso beto ke tubilaka beno kedika, mpe luyanu na beto na ntuala Tito vuandaka kedika. ¹⁵ Zola kele na yandi me lutila beno mbala zole, ntangu yandi ke bambukilaka ntumumunu na beno nionso moyo, na mutindu beno yambaka yandi na wonga na kuzakama. ¹⁶ Mu kena kuyangalala kutula kivuvu na munu na beno na mambu nionso.