¹ Mu fueti kukiyana....Kansi ya ke kuandi mbote ve. Mu ke kuiza na mona meso mpe na ba nsongolo ya Mfumu. ² Me zaba muntu mosi kele kati na Klisto, ba mvula kumi na iya me luta, yandi zanguluaka ti na dizulu ya tatu (kana ya vuandaka na nzutu na yandi, mu zaba ve, kana na nganda ya nzutu na yandi, mu zaba ve, Tata Nzambi me zaba). ³ Mpe me zaba ti muntu yina (kana ya vuandaka na nzutu na yandi to na zutu na yandi ve, mu zaba ve, Tata Nzambi me zaba yau) ⁴ zanguluaka na paladiso, mpe yandi kuwaka mambu ya ngitukulu yina kele ve na luve na muntu samuna kubangula yau. ⁵ Mu ke kukiyana samuna muntu ya mutindu yina, kansi na munu mosi mu lenda kukiyana ve, kana na kulebakana na munu ve. ⁶ Kana me zola kukiyana, mu ke vuanda kizengi ve, samu mu ke tuba kedika; kansi me manga munu, samu muntu mosi ve na yina me tadila mambu na munu yandi vuanda ya kuzanguka na yina yandi kena kumona na munu, to na yina yandi kena kuwa na munu. ⁷ Mpe samu mu kukitumpidika ve na nzayikusu yayi ya nene, mbasi ya Satana tulaka munu nsende na nzutu, samuna kunuika munu mpema mpe kukakidila munu mu kukizangula ve. ⁸ Nkumbu tatu mu bombidilaka Mfumu ya kutatula yandi na munu, ⁹ mpe yandi tubilaka munu: Nlemvo na munu me lungana na nge, samu kilendo na munu me kukisama na kulebakana. Mu ke toma kukiyana na kiese ya kuluta na kulebakana na munu, Samu ti kilendo ya Klisto sikila na munu. ¹⁰ Yau yina samuna Klisto, mu kena kuyangalala na kulebakana, na mfingulu, na ba mpasi, na nzomono, na kukuama; samu na ntangu mu kele ya kulebakana, ntangu yina mu kele na ngolo. ¹¹ Mu vuandaka zoba na kusonika mutindu yina: kansi beno tatimisaka munu na kusala yau. Nzoka, beno nde zolaka tindama munu, samu mpamba kuandi mu kele fi muntu na ntuala ya ba ntumua ya nene, ata mu kele mpamba. ¹² Bidimbu ya kintumua na munu monanaka kati na beno: mvibuduldu na ba ntontolo nionso, bidimbu, mangitukulu mpe bimangu. ¹³ Na inki diambu mabundu yankaka monaka beno mfunu mingi ve, samuna kukondua kubaka kiyeko na beno e? Beno lemvukila munu na imbi yina. ¹⁴ Beno tala, mbala yayi ya tatu me kubama kukuiza na beno, mpe mu ke vuanda na kiyeko na beno ve; samu mu kele na mfunu ya bima na beno ve, kansi mu kele na mfunu ya beno mosi. Bana ve ke yonzika mbongo samuna bibuti na bau, kansi bibuti samuna bana na bau. ¹⁵ Samuna munu, na luzolo mingi mu ke pesa mpe kukipesa samuna miela na beno, Kana me zola beno mingi, fioti kaka beno ke zola munu. ¹⁶ Diambu ve, mu vuandaka na kiyekua na beno ve, kansi lokola mu kele na nduka, mu sadilaka bunkita! ¹⁷ Ba yina mu tindaka, mu bakaka ndandu na mosi na bau e? ¹⁸ Mu tindilaka Tito na mpangi ba kuiza na beno, inki kima Tito lombaka beno e? Beto tambulaka na mpeve mosi ve, bitambi mosi ve beto diatilaka e? ¹⁹ Ku banda ntama beno kena ku banzati beto kena kukitanina na ntadisi na beno. beto kena kutuba kati na Klisto na ntuala ya Tata Nzambi; mpe nionso beto kena kutuba, kele samuna kutunga beno. ²⁰ Wonga kele na munu, ntangu mu ke vutuka, mu kuta beno ve mutindu mu kena kuzodila, mpe mu mosi mu vuanda ve mutindu beno kena kuzodila. Wonga ya kukuta minzonza, kimpala, nganzi ya kuluta, makani ya imbi, ba mpova ya imbi, ba mpova ya luvunu, kitumpidika, mvualangani. ²¹ Wonga kele na munu, ntangu mu ke kuiza, Tata Nzambi lenda yinimisa munu diaka samuna beno, mpe mu ke vuanda na kiadi samuna ba yina tuamaka nata masumu mpe ba vilulaka madiela na bau ve na nsumukunu yina ya luyangulu, ya kisuza, mpe ya mvambasani yina ba kukipesaka.