¹ Oh! kana beno zola vibidila fibizengi na munu! kansi beno vibidila munu! ² Samu kimpala kena munu samuna beno kele kimpala ya Tata Nzambi, samu mu zodilaka beno bakala mosi kaka, samuna kumonisa beno na Klisto bonso ndumba ya kuvedila. ³ Na nionso, lokola nioka vunaka Eva na nduka na yandi, mu kena kumona wonga ti mabanza na beno lenda bivusua mpe beno katuka na kinkuikizi ya Klisto. ⁴ Samu, kana muntu me kuiza longa beno Klito yankaka yina beto longaka beno ve, to kana beno me baka Mpeve yankaka yina beno bakaka ve, to Nsangu ya Mbote yina beno kuwaka ve, buna beno me toma vibidila yau. ⁵ Kansi mu banza ti mpamba kuandi mu vuandaka na insi ya bantumua ya nene. ⁶ Kana mu zaba ve mutindu ya kutubila, kansi mu kele na nzayilu, mpe beto monisaka beno yau na mambu nionso. ⁷ To disumu mu volaka, na kukiyina samu beno zangulua, mu longaka beno na mbongo ve Nsangu ya Mbote ya Tata Nzambi e? ⁸ Mu sansumunaka mabundu yankaka, na ku bakaka nfutu kena katuka na bau, samuna kusadisa beno. ⁹ Mpe ntangu mu vuandaka kuna na beno, kana nsatu ya kima, mu sadusuaka na muntu ve; ba mpangi katukaka na Makedonia kuizaka sadisa munu na yina vuandaka kondua munu. Na mambu nionso mu zolaka kuvuanda na kiyekua ya muntu ve, mpe mu ke tatamana kuvuandila mutindu yina. ¹⁰ Na kedika ya Klisto kele na munu, me tuba ti luyanu kele na munu na bitini ya Akakya, lenda katulua ve. ¹¹ Samuna inki e? Samu mu ke zolaka beno ve? Tata Nzambi me zaba yau! ¹² Kansi yina mu kena kusalaka, mu ke tatamana kusala yau samuna kukatula kibila na bau ke sosaka kibila, samu ba mona bau bonso beto na mambu yina ba kena kukiyana. ¹³ Bantu yina kele ba ntumua ya luvunu, bisadi ya bunkita, ba me kikitulaka ba ntumua ya Klisto. ¹⁴ Mpe beto kena kuyituka yau ve, samu yandi mosi Satana ke kitukaka mbasi ya kukia. ¹⁵ Na yau, ya kele ya kuyituka ve ti bisielo na yandi mpe ke kitukaka bisielo ya lunungu. Nsukulu na bau ke vuanda mutindu kele mavanga na bau. ¹⁶ Mu kena kuvutukila yau, muntu mona munu ve ti mu kele na buzengi; kana ve, beno yamba munu bonso kizengi, samu mu kukiyana mpe fioti. ¹⁷ Yina mu kena kutuba, na kivuvu samu mu baka diambu ya kukiyana, mpe mu kena kutuba yau na mutindu ya Mfumu, kansi bonso na buzengi. ¹⁸ Samu bantu mingi kena kukiyana na nsuni, mu ke kukiyana mpe. ¹⁹ Samu na luzolo beno kele nguka, kena kuvibidila bayina kele na buzengi. ²⁰ Kana muntu me kitula beno minanga, kana muntu me kudia beno, kana muntu me kanga beno kinkole, kana muntu kena kukizangula, kana muntu me bula beno na ilungi, beno vibidila yandi. ²¹ Mu kena kumona nsoni na kutuba ti beto monisaka kulebaka. Kansi kana muntu lendaka sala diambu na kibakala, munu mpe mu lendaka sala yau na kibakala, mu kena kutubila yau na buzengi! ²² Bau kele ba Ebeleo e? munu mpe. Bau kele ba Isaeli e? munu mpe. Bau kele nkuna ya Abalahami e? Munu mpe. ²³ Bau kele bisielo ya Klisto e? Mu kena kutuba bonso me lauka. Munu me lutila: me lutila na bisalu, me lutila na kubulua bikoti, me lutila na kulozua na boloko, me lutila na bivonza ya mfuimu, ²⁴ Mu bakaka mbala tanu ba yudayo bulaka munu makumi iya katula mosi, ²⁵ ba bulaka munu bikoti nkumbu tatu, mbala mosi ba losilaka munu mabanga, nkumbu tatu mudindaka na maza, mu lutisaka kilumbu mosi na mpimpa mosi na mpinda ya imbu. ²⁶ Ntangu nionso kaka na nzietilo, mu vuandaka na kisumbula na kati ya nzadi, kisumbula na ntuala ya bimpumbulu, kisumbula na ntuala ya bantu ya insi na munu, kisumbula na ntuala ya ba pakanu, kisumbula na ba mbanza, kisumbula na makanga, kisumbula na imbu, kisumbula kati ya ba mpangi ya luvunu. ²⁷ Mu vuandaka na kisalu mpe na mpasi, mbala mingi na kukaya meso, na nsatu mpe na mpuina, na mumina nsoki ntangu ka ntangu, na kiozi mpe na kukondua mvuatu. ²⁸ Mpe na kutubila kima yankaka ve, konso kilumbu ya kuvuatua na mayindu samuna mabundu nionso. ²⁹ Na kele ya kulebakana, samu mu lebakana ve? Nani me kubua, samu mu kuama ntima ve? ³⁰ Kana mu lenda kukiyana, mu ke kukiyana na kulebakana na munu! ³¹ Nzambi, yandi kele Tata ya Mfumu yesu Klisto, mpe yandi kele ya kuzitusua ba mvula na ba mvula, me zaba ti mu kena kuvuna ve! ³² Na Damasiko, nyadi tindamaka na ntinu Aleta na kenga mbanza ya bantu ya Damasiko, samu ba kanga munu, ³³ kansi ba kotisaka munu na kitunga mpe ba kitisaka munu na nela, ba kulumunaka munu na kibaka, mpe mu tinaka na maboko na yandi.