¹ Tekila nkinzi wa paki, kadi yisu wa zaya ntangu andi yi lungidi ye ka fiti katuka mu nza yayi mu diambu dia se. Kina vo watoma zola ayandi wowo akala mu nza. Wa toma ku a zola nate ye kuna nsuka. ² Satana mu ntangu yoyo wa kitudila ntama mu ntima Yuda Isikalioti, muana Simoni, ngindu za yekala yisu. ³ Yisu wa zaya dio vo se wa vana lekua yayo mu moko mandi ye yandi wa tukua kua nzambi ye ka fiti vutuka diaka kua nzambi. ⁴ Yandi wa toma vana ndambu a meza ma ndila va avuanda ye wa katula yunga ki andi. Mbosi, yandi wa bonga nlele wa nkungunina malonga ye wa zinga wo mu luketo luandi. ⁵ Yandi wa bonga nlangu wa tula wo mu filonga fia nsukudila meso ye wa tona sukula malu ma a longoki andi ye wakungunina mo mu nlele wo wu kanga mu luketo. ⁶ Yandi vo kaluaka va nzunga ya petelo ye petelo wa nkamba : "Mfumu, ngeye zolele sukula malu mame ?" ⁷ Yisu wa mvutula : "Mama ma ngieti vanga kua yeno wawu, kanu lendi mo visa wawu ko, kansi si nua mo zaya ntangu zilueki." ⁸ Petelo wa nkamba : "Nge kulendi sala nku nsukula malu ko." Yisu wa mvutudila : "Vo mono kiku sukudi malu ko, ngeye kuna kala ntuadi ye mono ko." ⁹ Simoni Petelo wa vova : "Mfumu, kusukudi kaka malu mame ko, kansi sukula diaka moko mame ye ntu mpe." ¹⁰ Yisu wa mvutula : "Ndioyo wuki sukudi wena kaka ye nsatu a sukula malu mandi kansi tu yandi wu kivedese yandi wa mvimba. Nueka nua vedila, kansi ka yeno a wonsono ko," ¹¹ (Kadi yisu wa zaya nani wuna kunyekula; yi mu nzila yoyo ka vovila : "Kanuena nua vedila yeno awonsono ko.") ¹² Ntangu yisu kamana sukula malu mau, wa bonga diaka yunga kiandi wa vuata kio ye wa vuanda diaka va meza, yimbosi ka ankamba : "Nga nu zeyi momo ma ngi nu vangidi e ?" ¹³ Yeno nu ku mbokidilanga "Mfumu" ye "Nlongi" Muanki toma dio vovanga kuandi kadi yi wowo dienina mu mono. ¹⁴ Vo se mono nlongi ye mfumu nginu sukudi malu meno, yeno mpe nuena nua bindama mu sukula mpe malu ma ankaka. ¹⁵ Kadi mono nginu songele mona mpasi vo yeno mpe nua la anda mona kiokio ki nginu songele. ¹⁶ Kedika mu kedika, ngieti dio kunu kamba, sielo kena wa luta zangama va zulu a mfumu andi ko, ka ndioyo mpe wa tumua kua ndioyo wa ntuma ko. ¹⁷ Vo nu zeyi mambu momo, yeno nuena nua sukumunua mpasi yeno mpe nua vangila dio. ¹⁸ Mono ngieti vovila mu yeno awonsono ko, kadi mono nzeyi wowo a ngia sola (Kansi mpovele mo mpasi masonukua manlongo menda detila) : "Ndioyo wu diamga dimpa diami yandi wandangunini ntambi." ¹⁹ Mono ngieti dio kunu kamba wawu tekila momo mamo ma lungana mpasi vo mena lungana, nua kuikila vo mono ngiena. ²⁰ Kedika mu kedika, ngieti dio kunu kamba, ndioyo wa ntambudi, tambudi ndioyo wumfidisi ye ndioyo wuntambudi, tambudi ndioyo wa mfidisa." ²¹ Yisu vo kakala vovanga momo, yandi wa kala wa vizuka mu mpeve andi, mbosi yandi wa ta kimbangi ye vova : "Kedika mu kedika, mono ngieti dio kunu kamba, mosi mu yeno una kungiekula." ²² Minlongoki mia talasana, ayuvasana nani ndioyo yisu keti vovila. ²³ Ndu mosi mu minlonguki, endu wa toma zolua kua yisu, yandi wa yekama va ntulu a yisu vana va akala a vuanda va meza. ²⁴ Simoni Petelo wa sala sinsu kua nlonguki wowo ye wa vova : "Wutu kamba ngeye nani ndioyo yisu keti vovilla." ²⁵ Nlongoki wowo wa kala wa yekama va ntulu a yisu wa yuvula : "Mfumu, nani ndioyo wuna kuyekule ?" ²⁶ Yi mbosi, yisu wa vutula : "Kua ndioyo ndu si vana ntini a dimpa mu vinu." Ye vo ka mana vuanga ntini ya dimpa mu vinu, tandi wa vana yo kua Yuda, muana Simoni Isikalioti. ²⁷ Yuda Isikalioti vo kamana dia ntini ya dimpa, satana wa kota mu nitu a yuda. Yisu wa nkamba mu yina ntangu : "Diodio dizolele kana vanga mu ntangu yayi, sala dio wawu mu nsualu." ²⁸ Ka muntu ko mu yau awonsono akala a vuanda vana meza wa zaya vo diambu dia nki ye bila yisu ka vovila diambu diodio ko. ²⁹ A nkaka a banza vo, wa kina vo yuda i yandi wena nlundi a nkela mbongo, yisu ma nga wankamba : "Sumba lekua yi tuena nkinzi mu nkinzi wawu." A nkaka a banza vo nanga yisu wa ntuma mu vana findambu fia yi vanza kua a mputu. ³⁰ Vo kamana tambula dimpa, Yuda wa vaika kia makilu diodio dia kala mu fuku. ³¹ Yuda ki kamana vaika, yisu wa vova : "Wawu, muana muntu kemboso ye nzambi kemboso mu yandi." ³² Nzambi si ka ku kembisa mu yandi kibeni, ye yandi wa nkembisa kia makilu. ³³ Bimbana mbana, mono ngiena yeno mu fintangua ntangua, si nua ku ntomba, ye wonso wu ngia kambila dio kua ayuda yo "Ku ngieti kuenda, yeno kanu lendi kolenda kuenda ko," wawu kaka ngieti kunu kamba dio. ³⁴ Mono ngieti kunu kamba nsikudusu yamba, vo nu zolanasana yeno ye yeno wonso mono ngia nu zodila; yi wowo nuti zolasana yeno ye yeno. ³⁵ Mu mono, antu ankaka ena visa dio vo yeno yi minlongoki miami, vo nuena ye zola mu yeno ye yeno. ³⁶ Simoni Petelo wa vova kua yandi : "Mfumu, kue ngeye weti kuenda ?" Yisu wa mvutula : "Ku ngieti kuenda, ngeye kulendi kendanda ko wawu, kansi tu si wa kundanda lumbu yi lueki ku ntuala." ³⁷ Petelo wa vova kua yandi : "Mfumu, bila nki kimfiti lembua ku landila wawu ? Mono ngina yekula moyo ame mu diambu diaku." ³⁸ Yisu wa vutula : "Ngeye wuna yekula moyo aku mu diambu diame ? Kedika mu kedika ngieti dio ku kamba, nsusu ya koko kayina kukikubila ko ngeye wana meni ku nkadila nkumbu tatu."