¹ Nsangu ziwakane vo mpila mayanga mena vakati kueno, i mayanga malembolo monika kua akondolo ankua Klisto: wumosi mu kabu dieto wukalanga ye nkento as'ani. ² Nuetikukiyana kueno mpe. Nga kanulendi dio niongina ko e? Vengi diambu diampila yoyo kafueni kala yeno kintuadi ko. ³ Mpeleko kiena yeno mu nitu ko, kansi mu kimpeve, ngiena yeno; i dina, mbeni kifundisila vengi diambu diodio. ⁴ Va nunakutakana mu nkumbu a Mfumu eto Yisu, mpeve ami yinakala yeno mu lulendo lua Mfumu eto Yisu; ⁵ muntu wowo fueni mu yekulua kua Satana kidi vo nitu ani yabungua ye mpeve ani yavulusua mu lumbu kia Mfumu. ⁶ Yana ku nukuki yananga kakuena kua mbote ko. Nga kanuzeyi ko vo fifuna fiafioti fifunisanga luku luasangu'e? ⁷ Nuyambula yifu yambi yankulu mpasi nuakituka antu ampa avedila; kadi Yisu, muana meme dieto dia Pasa, wavondolo. ⁸ Tukembila nkembo, ka ye funa yankulu ko, funa ya fu yambi ye makasi; kansi ye funa yasonga ye yakedika. ⁹ Mu nkand'ame yanusonekene mu lembua kala ntuadi ye minyangi. ¹⁰ Kiayindudi wo ko mu diambu dia yisi nza ena minyangi, evo ena nzinunu, evo ena mivi, evo ena minsambidi mia yiteki; kadi vo i wowo, nufueti vayika mu nza. ¹¹ Edi ngieti kunusonikina, kanukadi ntuadi ye nkua Klisto wena nyangi, evo wena nzinunu, evo nsambidi a yiteki, evo ntiaki, evo nduvu, evo mvuni. Kanudie nkutu ntuadi ye muntu ampila yoyo ko. ¹² Nga i kua mono mu fundisa ena ku mbazi a dibundu e? Wowo ena mukati nufueti kufundisa. ¹³ Nzambi wufundisanga ena ku mbazi a dibundu.