¹ Kunima, Mbasi ya n'tanu ya sika mpungi. Yamona ntetembua mosi yasotoka va n'toto tuka kuzulu. Nsabi za wulu dia yenga dia tombe za m'vewa. ² Wazibula wulu dia yenga dia tombe ye tuti dia muisi dia vayika, diafuanana ye diodio dia foloni kia nene kia tiya. Ntangu ye mupepe biakuma ndombe kua muisi watomboka mu wulu. ³ Ku nganda muisi wowo, makonko mavayika ye mavanga mbi kua n'toto ye mawu mavewa lendo kia fuanana ye kiokio kia zinkutu za vava n'toto. ⁴ Bavewa n'sua mulembi vanga mbi kua matiti ma n'toto, ka kua matiti mankunzu ko, ka kua n'ti mosi ko; kansi bavanga kaka mbi kua bobo kabena ye dimbu kia Nzambi va mbunzu zawu ko. ⁵ Kababaka luve mu vonda bantu bobo ko, kansi i mukubakuamisa kaka mu ngonda tanu. Yama kuawu kuna bonso Nkutu yitele muntu. ⁶ Mulumbu biobio, bantu sibasoso lufua kansi kabasololalo ko. Sibakala ye nsatu zangolo za lufua kansi luawu siluatina kuanda ye bawu. ⁷ Makonko mafuanana ye zimpunda zakubukua mudiambu dia mvita. Va n'tu miawu bavuata bima biafuanana ye kolowa bia wola ye zidi biawu biakala bonso bia bantu. ⁸ Bakala ye nsuki zina bonso zabakento ye meno bonso ma zinkosi. ⁹ Bavuata zi nkaku zakala bonso za sengua ye mazu ma nsala zawu mafuanana ye mazu ma makalu mabidi ye zimpunda zita lemoka ku nkindu. ¹⁰ Suka biawu biakala bonso bia nsongi za nkutu; mu suka biawu, bakala ye lulendo kia vanga mbi kua bantu mu ngonda tanu. ¹¹ Bakala ye mfumu ya Mbasi ya zi ndimuka ye ya yenga dia tombe kia ngolo. Nkumbu ani muki Ebeleo yakala Abadoni, ye mu Apolioni mu kingelekia. ¹² Mpasi zantete zilutidi. Tala! Kunima mambu momo, sumbula bibiole bilueke. ¹³ Mbasi ya n'sambanu ya sika mpungi ye yawa ndinga mosi yitukidi va ntuala zi mpoka za ziku dia wola dina va n'tuala Nzambi. ¹⁴ Ndinga ya vova kua Mbasi ya n'sambanu yakala ye mpungi : " Kutula Mbasi zi ya zina za kangua mu nzadi ya nene ya Ewufalata." ¹⁵ Mbasi zi ya zozo zakubukulua muntangu yiyi kibeni, lumbu kiki, ngonda yiyi, ye m'vu wuwu za kutulua mu bunga ndambu ya n'tatu ya bantu. ¹⁶ Ntalu a makesa ma zimpunda makala 200.000.000. Yawa ntalu awu. ¹⁷ Tala wu yamuena Mpunda zozo ye bobo ba manta zo mu mona meso mamu: Nkaku awu yakala ya ntinta yambuaki yatiya, bule kia fitombe ye ya titi kia buaka yasangusua ye sufele. N'tu mia zi Mpunda mia fuanana ye mia zi nkosi, ye mu nua miawu mua vayika tiya, muisi ye sufele. ¹⁸ Ndambu ya n'tatu ya bantu ya vondua kua vuku bitatu ebi: Tiya, muisi ye sufele biakala vayika mu nua miawu. ¹⁹ Kadi lendo kia zi mpunda kiakala mu nua miawu ye mu bisuka biawu. Isavo, bisuka biawu biakala bonso zinioka ye biakala ye mi n'tu miomio bakalatudila zi mputa kua bantu. ²⁰ Bantu basala, bobo kabavondua kua vuku biobio kabaviluka mu mavanga mawu bavanga ko, ye kabalembua mukunda mpeve za mbi ye biteke bia wola, bia palata, bia nsongo, bia matadi ye bia n'ti: bima bina kabilendi mona, yevo wa, yevo diata. ²¹ Ye kabaviluka mpe ko mu mvondolo zawu, mu kindoki kiawu, mu kinsuza kiawu yevo mu kimuivi kiawu kia va koko.