¹ Kunima diodio, yamona mbasi ziya zatelema mu konko biya bia n'toto, zitomene kanga mipepe mi n'ya mia n'toto mpasi vo ka mupepe mosi ko wavevomoka va n'toto, mu m'bu ye kani mu n'ti mosi nkutu ko. ² Yamona Mbasi yan'kaka ya tuka ku Este yasimba dimbu ya Nzambi ya moyo. Yaboka mundinga ngolo kua Mbasi zi ya zabaka luve muvanga mbi kua n'toto ye M'bu. ³ "Kaluvangi mbi kua n'toto ko, ka kua m'bu ko, ye kua konso n'ti mpe ko nate ye tutula dimbu mu mbunzu za n'sadi mia Nzambi" ⁴ Yawa ntalu ya bobo batulua dimbu: 144. 000 batulua dimbu ye bavuwa kua makanda kumi ye zole ma konso zunga kia Isaeli: ⁵ Mafunda kumi ye zole mazunga kia Yuda; mafunda kumi ye zole mazunga kia Lubeni; mafunda kumi ye zole mazunga kia N'gadi; ⁶ mafunda kumi ye zole mazunga kia Aseli; mafunda kumi ye zole mazunga kia Nafatali, mafunda kumi ye zole mazunga kia Manase; ⁷ mafunda kumi ye zole mazunga kia Simeoni; mafunda kumi ye zole mazunga kia Levi; mafunda kumi ye zole mazunga kia Isakali; ⁸ mafunda kumi ye zole mazunga kia Zabuloni; mafunda kumi ye zole mazunga kia Yosefi; mafunda kumi ye zole mazunga kia Benyamini matulua dimbu. ⁹ Kunima diodio, yatala ye yamona n'kangu wannene wowo muntu kalendi tanga ko, watuka mu nsi zawonso, bizunga biawonso, n'kangu mia wonso ye ndinga za wonso, bakala van'tuala kiti kia Kimfumu ye van'tuala Muana Meme. Bavuata yunga bia mpembe ye basimba mandala va moko mawu ¹⁰ Ye baboka mu ndinga ya ngolo: " Mpulusu yivuilu kua Nzambi eto ndondo vuende va kiti kia Kimfumu ye kua Muana Meme!" ¹¹ Mbasi zawonso zakala mu mbele - mbela za kiti kia Kimfumu, ye mu mbela zimbuta zatoma nuna ye vangua bi ya bia moyo ye bayizika zidi va n'toto va n'tual'a kiti kia Kimfumu. Bakunda Nzambi, ¹² bavova: " Amene! N'kembo, nzitusu, nduenga, mvutudulu a matondo, nsikulu, lendo ye ngolo bifuene kua Nzambi eto mu ntangu zawonso. Amene!" ¹³ Bosi mosi mu zimbuta zatoma nuna wanguivula: " Banani baba bavuete yunga bia mpembe, ye kueyi batukidi?" ¹⁴ Yam'vutudila: " Mfumu amu ngeye zeye dio" Ye wantela: " Yibobo bavayikidi mu zimpasi za bidi. Basukula bi yunga biawu ye ba velelesa bio mu menga ma Muana Meme. ¹⁵ Mukuma kiokio, bena va n'tuala kiti kia Kimfumu kia Nzambi ye beta kun'sambila mpimpa ye muini mu nzo ani ya n'longo. Ndondo vuende va kiti kia Kimfumu sikayalumuna n'zo ani ya ngoto va yawu. ¹⁶ Kabalendi fua nsatu yevo vuinia ko. Ntangu kayilendi kubavanga mbi ko, kayuku yuku dia tiya n'kutu ko. ¹⁷ Kadi Muana Meme wuna va kiti kia Kimfumu sikakala M'vungi awu ye sika banata ku mbela nto za maza ma moyo ye Nzambi sikakusuna mansanga mawonso mu meso mawu."