¹ Dimbu kia n'nene kiamoneka mu zulu: N'kento wavuata ntangu ye wakala ye ngonda ku nsi a tambi biani. Ye kolowa kia ntetembua kumi ye zole kiakalayani va zulu a ntu ani. ² Wakala ye vumu ye wakala kayanga mu mpasi za ngutulu. ³ Ye dimbu kia n'kaka kiamonika diaka mu zulu: Tala! dalaka kia n'nene kia mbuaki kiakala n'tu nsambuadia ye mpoka kumi, ye vakala ye bikolowa nsambuadia va n'tu miani. ⁴ N'kila ani wanatumuna ndambu ya n'tatu ya zi ntetembua mu zulu ye wasotola zo nsualu va n'toto. Dalaka kia telama va ntuala n'kento ndondo wakala wakubama mu wuta, mukani dia vonda muana kiokio kawutidi kaka. ⁵ Wawuta muan'a wayakala, ndondo wuyala nsi za wonsono mu n'kawu wa sengua. Muan'ani wazamunua kuna kuna Nzambi ye kuna kiti kiani kia Kitinu ⁶ ye n'kento watina ku nsi ya nkatu kua n'kubikila Nzambi fulu mpasi ka sansua m'vu 1260. ⁷ Ikuma, kuakala mvita mu zulu. Mikaeli ye mbasi zani ba nuana ye Dalaka, ye Dalaka ye zi mbasi zani bavutula. ⁸ Kansi Dalaka kakiakala ngolo kibeni ko mu nunga. Idina, kavakala diaka kani fulu mu zulu kua yani ye zi mbasi zani ko. ⁹ Dalaka kia n'nene, nioka yoyo ya nkulu, yibokodoluanga, diabulu yevo satana, ndondo wuvukumunanga nza ya m'vimba watubua va n'toto ye mbasi zani ntuadi. ¹⁰ Idina yawa ndinga ya n'nene mu zulu:" Wuwu mpulusu, lendo ye kimfumu kia Nzambi eto kizidi, ntuadi ye luyalu lua Klisto diani. Kadi m'fundi a mpangizeto watubulu, ndondo wafundidingi mpimpa ye muini van'tuala Nzambi eto. ¹¹ Ban'nunga mu menga ma muana Meme ye mu m'vovo wakimbangi kiawu, kadi kabazola luzingu luawu ko te ye lufua. ¹² Ikuma, luyangalala, beno mazulu ye ba wonso bavuandanga mo. Kansi kiadi kua n'toto ye m'bu kadi diabulu kulumukini kua beno. Wuna wazala kua nganzi za ngolo kadi zeye vo wuna ye fi ntangu - ntangu kaka. ¹³ Kiokio dalaka kazaya vo yandi tubulu va n'toto, walanda n'kento ndondo wawuta mwana wa yakala. ¹⁴ Kansi mave mole ma n'nene ma ngo zulu mam'vewa mpasi vo katilumuka te ye kuna fulu kiakubukua mukuma kia yani mu nsi ya nkatu, fulu kiokio ka fuete bakila lusadusu mu fi ntangu, zi ntangu ye kati - kati kua ntangu kuanda ye nioka. ¹⁵ Nioka ya tiamuna maza mu nua ani bonso nzadi mpasi ka vanga zalu mukun'kukudisa . ¹⁶ Kansi n'toto wayiza mu vukisa n'kento. N'toto wazibula nua ani ye mina maza ma vayikisa Dalaka mu nua ani. ¹⁷ Idina Dalaka diakala nganzi kua n'kento ye kia yenda sosa mvita mu nuanisa kanda dia n'kento dina diasala, bawonso batumamananga n'siku mia Nzambi ye ba lundanga kimbangi kia Yesu. ¹⁸ Wana, Dalaka kia telama va zulu a zielo kusimu dia m'bu.