¹ Wabatela diaka : " yilutelele dio mu kieleka, ban'kaka bena vava kabakifuila ko, vo kabakimuenene kimfumu kia Nzambi kitakuiza mu lendo ko. ² Kunima lumbu sambanu, Yesu wabaka Petelo, Yakobi ye Yowani, ye wabanata yawu mosi va mbela kuna zulu a mongo wanda. Wasoba zidi va n'tuala awu, ³ m'vuatu miani miakala lezima, mu pemba kumosi vo kavena kima kimosi va n'toto kilenda mio pembesa mpila yina ko. ⁴ Eliya ye Mose babamonekena mu yambila ye Yesu. ⁵ Petelo, wabaka m'vovo, watela Yesu: " N'longi, dilutidi mbote tuakala vava; tutunga n'sampa mi n'tatu, wumosi wa ngeye, wumosi wa Mose ye wumosi wa Eliya." ⁶ Kadi kazaya neyi kafueti vova ko, kina vo wonga wababuila. ⁷ Tuti dia yiza kun'vuata, ye mu tuti diodio muavayika ndinga mosi: " ndondo i muana amu wan'zolua, lun'wila!" ⁸ Vanavawu n'longoki miatala va kinzungidila kiawu, ye bamona kaka Yesu ye yawu mosi. ⁹ Kiokio bakala kulumuka muna mongo, Yesu wabakanikina mu vova kua muntu mana bamona, nate ye Muana a muntu kafutumuka mu bafua. ¹⁰ Basimbinina m'vovo wowo, bakala yuvuasana yawu ye yawu dina disongele, futumuka mu bafua. ¹¹ N'longoki mian'dia kiuvu eki: " mudiambu dia nki n'soniki mitelanga vo Elia kafete vutuka ntete?" ¹² Wabavutudila: " Elia sikeza ntete ye sikavangulula mawonso. Ye bila nki diasonamana mu Muana a muntu vo kafeti mona mpasi zabidi ye kafeti tingunua e? ¹³ Kansi yilutelele vo Eliya wayiza, ye bam'vanga bonso bazola bonso masonama mu yani. ¹⁴ Kiokio baluaka lukufi ye min'longoki, bamona va kinzungidila kiawu n'kangu wabidi ye n'soneki miafilananga mpaka ye yawu. ¹⁵ Kiokio n'kangu wamona Yesu, wayutukua ye walemoka mu kum'vana mbote. ¹⁶ Wabayuvula: " kia diambu lutafilanena mpaka ye yawu e?" ¹⁷ Ye yakala dimosi mu n'kangu wam'vutudila: " N'longi, ndete muana amu wuna ye mpeve ya baba kua ngeye. ¹⁸ Konso fulu kina yim'bakidi, yikun'tubanga va n'toto, muana kunganga, kuetesanga meno, ye kumanga wakangama." Yalombele kua n'longoki miaku bakula mpeve yoyo, kansi kabalendele ko. ¹⁹ Yesu wan'tela: " Kanda dia n'kangu a n'tima, nate ye nkia ntangu mfeti kala yeno e? Nate ye nkia ntangu siyaluvibidila e? Lundatina yani. ²⁰ Bannatina yani. Kiokio kaka muana kamona Yesu, mpeve yannikuna mu ngolo kibeni; Wabua va n'toto ye wanengomoka ye kunga. ²¹ Yesu wayuvula kua Se: " tuka kia ntangu diodio dikun'luakilanga e?" Wavutula: " tuka kimuana kiani. ²² Ye ntangu zabidi mpeve yikun'tubanga kuna tiya ye muna maza mpasi yam'vonda. Kansi vo lenda diambu, wutusadisa, wutufuila nkenda." ²³ Yesu wan'tela: " vo lenda!.. Mawonso malendakana kua nduna kuikidi. " ²⁴ vanavawu, Se dia muana waboka: " Nkuikidi!, wunsadisa mu kondua kuamu kua lukuikilu." ²⁵ Yesu, kiokio kamona n'kangu wulueke, wanuanisa mpeve yambi, ye wan'tela: " Mpeve ya baba ye yafua makutu, yikutumini, vayika mu muana ndondo ye kuvutuki mo diaka ko." ²⁶ Ye yavayika ye yaboka mu ngolo, ye wannikuna mu ngolo kibeni. Muana wakuma bonso wafua, ikuma babidi bavova vo fuidi. ²⁷ Kansi Yesu, kiokio kan'simba mu koko, wam'vumbula ye watelama. ²⁸ Kiokio Yesu kakota muna nzo, n'longoki miani mian'yuvula va yawu mosi kaka: " mudiambu dia nki katualendele kula mpeve yoyo ko e? ²⁹ Wabavutudila: " n'kuna wowo wufuete vayikila kaka mu lusambulu." ³⁰ Bakatuka vana ye basawuka ngalili. Yesu kazola ko bazaya wo. ³¹ Kadi wakala longelanga n'longoki miani, ye wabazayisa: " Muana a muntu sikayekolua mu moko ma bantu; sibam'vonda, ye, lumbu tatu kunima ya kum'vonda, sikafutumuka." ³² Kansi balongoki bani kababakusa m'vovo wowo ko, ye bamona wonga mu kun'yuvula. ³³ Baluaka kuna kapenawumi. Kiokio bakala muna nzo, Yesu wabayuvula: " nkia mambu lukele filanena mpaka mu nzila e?" ³⁴ Kansi bakala na pi, kadi mu nzila bafilana mpaka yawu ye yawu mu zaya nani lutidi nene mu yawu. ³⁵ Ikuma wavuanda, wabokela kumi yezole ye wabatela: " vo muntu zolele kala wantete, sikakala wansuka mu yawu a wonso ye n'sadi wabawonso." ³⁶ Ye wabonga muana a fioti, wan'tula va kati kua yawu, ye kiokio kannanguna mu moko mani, wabatela: " ³⁷ Konso nduna tambudi mu nkumbu amu mosi mu bana baba, wuntambudi mono kibeni; ye konso nduna wuntabudi katambudi mono ko kansi nduna wamfidisa. ³⁸ Yowani wan'tela: " N'longi tumuene muntu mosi wuta kula mpeve zambi mu nkumbu aku, ye tuan'kanikini dio, kadi kakutulandanga ko. ³⁹ Yesu wavutula : " Kalun'kanikina ko, kadi kavena muntu ko, vo vangidi sivi mu nkumbu amu, kalenda vova vanavawu mambi mu mono." ⁴⁰ Nduna kena kitantu ye yeto ko wuna yeto. ⁴¹ Ye konso nduna sikaluvana vela ya maza mu nkumbu amu, kadi luvuilu kua Klisto, yilutele dio mu kieleka, kavidisa n'sendo ani ko. ⁴² Kansi, vo muntu tesese mosi sakuba mu bana baba bakuikilanga, dilutidi mbote kua yani ban'kanga sengua kianene kianikina fufu mu nsingu ye ban'tuba muna m'bu. ⁴³ Vo koko kuaku kulenda kutesesa sakuba, zenga ko; dilutidi mbote kua ngeye mu kota ye koko kuazengua muna luzingu. ⁴⁴ Kansi kakala ye moko mole ko ye tubua kuna bilungi, kuna tiya tulembi zima. ⁴⁵ Vo kulu kuaku kulenda kutesesa sakuba, zenga ko; dilutidi mbote kua ngeye mu kota wavanguka muna luzingu, ⁴⁶ kansi kamu kala ye malu mole ko ye tubua kuna bilungi, kuna tiya tulembi zima. ⁴⁷ Ye vo disu diaku dilenda kutesesa sakuba, katula dio; dilutidi mbote kua ngeye mu kota mu kimfu kia Nzambi ye disu dimosi, kansi kakala ye meso mole ye tubua kuna bilungi ko. ⁴⁸ Kuna nioka zawu za vumu kazifuanga ko, ye kuna tiya katuzimanga ko. ⁴⁹ Kadi kanso muntu sikazalua kua tiya bonso mungua. ⁵⁰ Mungua wuna kima kiambote; kansi vo mungua wukatukidi n'zenzo, mu nki lenda wo vutudila n'zenzo e? Lukala ye mungua mu yeno kibeni, ye lukala mu luvuvamu yeno ye yeno.