¹ Kiokio Yesu kakatuka kuna, wayenda kuna zunga kia Yuda,kuna simu dia n'kaka dia yolodani. Ndonga yakutakana diaka va mbela ani, ye bonso wakala fu kiani, wayantika diaka kubalongela. ² M'falisi mia yiza kua yani, ye, mu kun'tonta, mian'yuvula keti dina dialuve kua yakala mu kula n'kento ani ku makuela. ³ Wabavutudila: " nki mose kalutuma e? " ⁴ Bavova: " mose wavana luve luasoneka n'kanda wamvodolo a longo, bosi kula." ⁵ Ye Yesu wabatela: " Yi mudiambu dia m'balu mia n'tima mieno mose kaluvanina n'siku wowo. ⁶ Kansi kuna ngiatukulu a nza, Nzambi wavanga yakala ye n'kento." ⁷ Ikuma yakala sikasisa Se diani ye Ngudi ani, ye sikakangama ye n'kento ani, ⁸ ye yawu a wole sibakituka n'suni wumosi. Mudiodio kabasidi diaka babole ko, kansi bena n'suni wumosi. ⁹ Ikuma muntu kavambanesa kina Nzambi kasangisi ko. ¹⁰ Kiokio baluaka muna nzo, n'longoki mian'yuvula diaka mu mambu momo. ¹¹ Wabatela: " Nduna kudidi n'kento ani ku longo ye kuele wan'kaka, tele zumba kua yani. ¹² Ye Vo n'kento sisidi yakala diani ye kuelele dia n'kaka, yani tele zumba." ¹³ Bannatina bimbanambana, mpasi kabasimba. Kansi n'longoki miasemba bana bayiza kubanati. ¹⁴ Kiokio Yesu kamona wuna, wafuita n'tima, ye wabatela: "Luyambula bana bafioti beza kua mono, kaluba kangila dio nzila ko; kadi kimfumu kia mazulu kivuilu kua bana bafuanane ye yawu. ¹⁵ Yilutelele dio mu kieleka: " konso nduna katambula kimfumu kia mazulu bonso muana a fioti ko, kakota mo ko. ¹⁶ Bosi wababaka mu moko mani, wabasakumuna, ye wabatula moko. ¹⁷ Kiokio Yesu kakala kuenda mu nzila, muntu wan'yizila mu ntinu, ye wafukama va n'tula ani, ye wan'yuvula: "N'longi a mbote, neyi mfete vanga mpasi yatambula moyo a m'vu yam'vu e? " ¹⁸ Yesu wan'tela:" Mudiambu dia nki wumbokelele, wambote? Nzambi kuani kaka wuna wambote." ¹⁹ Zeye min'siku: " Kute zumba ko; kuvondi ko; Kuyiyi ko; Kute kimbangi kia luvunu ko; kuvangi mbi kua muntu ko; zitisa Se diaku ye Ngudi aku." ²⁰ Wam'vutudila: "n'longi, yasadila mawonso momo tuka kileke kiamu." ²¹ Kiokio Yesu kan'tala, wan'zola, ye wan'tela: " kima kimosi kikukondolo; wenda, teka mvuilu aku yawonso, vana yo kua bamputu, ye siwatambula mkimvuama mu zulu. Bosi wiza, ye wundanda." ²² Kansi , muntu ndondo wakendalala mu m'vovo wowo, wayenda mukiadi kibeni; Kadi wakala ye mvuilu ya bidi. ²³ Kiokio Yesu katala va mbela ani, wavova kua n'longoki miani: " sidiakala dia mpasi kua bana bena ye yimvuama mu kota mu kimfumu kia Nzambi!" ²⁴ N'longoki miayitukua mu wowo Yesu kakala vovela. Ye wavutukila, wabatela: " bana bamu dina dia mpasi kua bobo bakivananga mu yimvuama mu kota mu kimfumu kia Nzambi. ²⁵ Dina dia fioti kua kamela mu luta muna vundu dia ntumbu, kansi ka kua mvuama ko mu kota muna kimfumu kia zambi." ²⁶ N'longoki miayitukua diaka, ye miavovasana yawu ye yawu: " nga nani lenda vuluzu e?" ²⁷ Yesu wabatala ye wavova: " diodio kadilendakana ko kua bantu, kansi ka kua Nzambi ko. Kadi mawonso malendakana kua Nzambi." ²⁸ Petelo wayantika kun'tela: " tala, tuasisidi yawonso ye tuanlende." ²⁹ Yesu wavutula:" yilutele dio mu kieleka, kavena muntu ko, wasisa nzo ani yevo mpangi zani za mayakala, yevo mpangi zani zamakento, yevo ngudi ani, yevo Se diani, yevo bana bani, yevo n'toto miani, mukuma kia mono ye mukuma kia nsangu zambote, ³⁰ kalembi tambula nkama nkama wuwu mu mbandu yiyi, zinzo, zimpangi za mayakala, zimpangi zamakento, zingudi, bana, ye min'toto ye zinkuamusu, ye, mu mbandu yi kuiza, moyo wa m'vu ya m'vu. ³¹ Ndonga ya bantete sibakala bansuka, ye ndonga ya bansuka sibakala bantete." ³² Bakala mu zila mu tomboka kuna Yelusalemi, ye Yesu wakala ku n'tuala awu. N'longoki miavizuka ye ban'landa ye wonga. Yesu wabaka diaka kumi ye zole va mbela ani, wayantika kubatela diodio di feti kun'luakila. ³³ Tala, tutatomboka kuna Yelusalemi, ye Muana a muntu sikayekolua kua Ngudi za Nganga zambuta ye kua min'oneki. Sibanzengela n'kanu a lufua, ye siban'yekola kua mim'pakanu, ³⁴ bobo siban'sakanena, siban'tawudila kololo, siban'zuba n'zuangi ye sibam'vonda; Ye, kunima ya lumbu tatu sikafutumuka. ³⁵ Bana ba zebedayi, Yakobo ye yowani bafinama kua Yesu ye ban'tela: " N'longi, tuzolele watuvangila mana tutakulomba. ³⁶ Wabatela: " nki luzolo yaluvangila e?" ³⁷ Ban'tela: " Wutuvana luve tuavuanda mosi ku lunene ye wan'kaka ku lumonso luaku, kiokio siwakala muna n'kembo aku. ³⁸ Yesu wabavutudila: " Kaluzeye dina lutalomba ko. Lulenda nua mbungua yoyo mono mfete nua, yevo luabotekua mu mbotokolo yina mfete botekua e?" ³⁹ Bavova: " tulenda wo." Ye Yesu wabavutudila: " dina dia kialeka vo siluanua mbungua yina mfete nua, ye vo siluabotekua mu mbotokolo yina mfete botekua"; ⁴⁰ kansi mu diodio dina vo luavuanda ku lunene yevo kulumonso luamu, dina kadina dia luve luamu ko, ye sidiavewa kaka kua bana bakubikilua dio." ⁴¹ Kumi diodio, kina bawa wo, bayantika fuita n'tima kua yakobo ye yowani. ⁴² Yesu wababokela ye wabatela: " Luzeye vo bana tumonanga bonso mfumu za n'kangu bakubanuanisanga ye, mbuta zikubayalanga. ⁴³ Kadina mpila mosi ko va kati kueno. Kansi konso zolele kala mbuta va kati kueno, kakala n'sadi eno. ⁴⁴ Ye konso zolele kala wantete va kati kueno, kakala nanga wabawonso. ⁴⁵ Kadi Muana a muntu wayiza, kamusadusua ko, kansi mu sala ye vana moyo ani bonso n'kayilu kua ndonga. ⁴⁶ Baluaka kuna Yeliko. Ye, mu ntangu Yesu kavayika mo, ye n'longoki miani ye ndonga ya bidi fioti,muana a Timayi, Batimayi, n'lombi wa mpofo, wakala wavuanda vana mbela nzila. ⁴⁷ Wawa vo yi Yesu muisi Nazaleti, ye wayantika boka; Muana Davidi, Yesu wunfuila nkenda! " ⁴⁸ Ndonga yakala kun'semba, mu kun'sima, kansi wakaya diaka lutila: " Muana Davidi, wumfuila nkenda!" ⁴⁹ Yesu watelama ye wavova: " lum'bokela." Babokela mpofo, ban'tela :" kala nzunzu, telama, wutakubokela." ⁵⁰ Mpofo watuba yunga kiani, ye, watelama mu nkumbu mosi, wayiza kua Yesu. ⁵¹ Yesu, wabaka m'vova, wan'tela: " nki zolele yavanga kua ngeye?" Mpofo wam'vutudila,: " Labuni, nzolele yamona diaka." ⁵² Ye Yesu wan'tela: " wenda, minu kiaku kivuluzi." Vanavawu wamona diaka, ye walanda Yesu mu zila.