¹ M'falisi ye n'soniki mia n'kaka, bayiza tuka kuna yelusalemi, bakutakana ye Yesu. ² Bamona ban'kaka mu n'longoki miani badia madia mawu ye moko masumuka, disongele malembua sukulua. ³ Kiongolo, min'falisi ye bayudayo bawonso kabadianga kondua kua toma kisukula moko ko, landila kisinsi kia n'kulu miawu; ⁴ ye, kina bavutuka tuka vana ntenda nkongolo, badia kaka kunima ya teka kisukula. Bena diaka ye n'siku miabidi mia n'kaka mia kinkulu kiawu bonso nsukudulu ya makopo, min'vungu ye wumbua ya sengua. ⁵ Mim'falisi ye min'soneki ban'yuvula: " mudiambu dia nki n'longoki miaku kamilandilanga kinkulu kia n'kulu mieto ko, kansi badianga madia mawu ye moko masumuka e?" ⁶ Yesu wabavutudila: " bankua disu ku nsi a lukaya, Yesaya watoma bikula mu kuma kia yeno ", bonso masonukua: " N'kangu wuwu wukunzitisanga mu befo ya nua, kansi n'tima ani wuna watatuka ye mono. ⁷ Mu mpamba kakunzitisilanga, mu mvanunu a n'siku mia kimuntu." ⁸ Beno lusisanga n'siku mia Nzambi ye lusadilanga kisinsi kia bantu. ⁹ Wabatela diaka: " lutavidisa kibeni n'siku mia Nzambi mudiambu dia lunda kinkulu kieno." ¹⁰ Kadi Mose wata: "Zitisa Se diaku ye Ngudi aku"; ye : " konso nduna sikasinga Se yevo Ngudi ani sikabaka tumbu kia lufua." ¹¹ Kansi beno, luvovanga: " vo muntu tele kua Se diani yevo kua Ngudi ani: " biawonso yavitidi nkutu kusadisila bina koloba, disongele nkayilu kua Nzambi, ¹² kalukun'yambulanga nkutu diaka kavanga kana kimosi kua Se diani yevo kua Ngudi ani ko, ¹³ lutafuasa mambu ma Nzambi mu kinkulu kieno, kiokio luatunga. Ye luvanganga mabidi man'kaka mafuanane. ¹⁴ Bosi, kiokio kabokela diaka n'kangu kua yani, wan'tela : " lungwa beno bawonso, ye lubakusa, ¹⁵ kavena kima ku nganda a muntu ko, kiokio vo kikotele mu yani, kilenda kun'sumuna; kansi kina kivayikanga mu muntu, yikina kikun'sumunanga. ¹⁶ Vo muntu wuna ye makutu mu wa, bika kawa. ¹⁷ Muntangu kakota muna nzo, kuanda ye n'kangu, n'longoki miani mian'dia yuvu mu ngana yoyo. ¹⁸ Wabatela: " beno mpe diaka, luna luakondua ngangu e? Kaluta bakusa ko vo kavena kima kilenda tuka ku nganda ye kota mu muntu kilenda kuns'umuna ko e? ¹⁹ Kadi kina kakikotanga mu n'tima ani ko, kansi mu vumu kiani, ye kikuendanga mu fulu yansueki, yivelesanga madia mawonso. ²⁰ Wata diaka: " Kina kivayikanga mu muntu yikina kisumunanga muntu. ²¹ Kadi yi mu kati, yi muna n'tima mia bantu, mu tukanga ngindu zambi, zumba, kindumba, vonda, ²² wivi, n'zolo a mbongo zasaka, kimuntu kiambi, luvunu, kadilu kia bonso bonso, ntadulu ya nzinunu, vunina n'kuayaku mambu, kitumpidika, lawuka. ²³ Mambu momo mawonso mambi yi mukati ma tukanga ye masumunanga muntu. ²⁴ Yesu, kiokio kakatuka kuna, wayenda kuna zunga kia tile ye sidoni. Wakota mu nzo yimosi, wazola vo muntu kazayi wo ko, kansi kalenda kala wasuekama ko. ²⁵ Kadi n'kento mosi, ndondo muana ani wan'kento wakala wayalua kua mpeve a mbi, wawa nsangu zani, ye wayiza kituba vana malu mani. ²⁶ N'kento ndondo wakala Ngeleki, watuka kuna nsi ya Silo dia Fenisi. Wan'lomba kakula mpeve a mbi yina mu muana ani. ²⁷ Yesu wan'tela: " Bika ntete bana bayukuta; Kadi kadina diambote ko mu baka dimpa dia bana, yetuba dio kua bana bambua. ²⁸ Wavutula: "Ingeta, mfumu, kansi bana bambua badianga yindambu ndambu ya madia mabana yisotokanga kuna nsi a meza. ²⁹ Mudina wan'tela: " Mudiambu dia m'vovo wowo, wenda, mpeve a mbi yivayikidi muna muana aku a n'kento. ³⁰ Ye, kiokio kavutuka kuna nzo ani, wawana muana waleka vana mfula, mpeve a mbi yavayika. ³¹ Yesu wakatuka va tini kiokio kia Tile, ye wavutukila mu nzila ya Sidoni mu kuenda kuna ndambu ya m'bu wa Ngalili, waluta nsi ya Dekapoli. ³² Bannatina m'fuamakutu, wakala ye mpasi mu vova, ye ban'lomba kan'tula moko. ³³ Wannata va vengama kuanda ye n'kangu, wan'tula min'lembo muna makutu ye wasimba ludimi luani mu mate ma yani kibeni; ³⁴ bosi, kiokio katombola meso kuna zulu, wavumuna, ye wata: " Efata", disongele, zibuka. ³⁵ Vanavawu makutu mani mazibuka, ludimi luani luazibuka ye wayantika toma vova. ³⁶ Yesu wabakanikina mu vova wo kua muntu a n'kaka; kansi mu konso ntangu kabakanikina, balutila nkutu wo muanganesa. ³⁷ Bakala mu ngitukulu yilutidi nene ye bakala vova: " Wutavanga mawonso mantoko; wutawisa mpe m'fue mia makutu, ye vovesa mababa .