¹ Yesu wakatuka kuna ye wayenda kuna nsi ani. N'longoki miani mian'landa. ² Kiokio kia lumingu kiayiza, wayantika longa muna nzo a lukutakanu. Ndonga yabidi yan'gua ya yitukua ye yavova: " kueyi kuta tuka mambu momo e? Nkia mpila nduenga zozo kavewa e? Ye Neyi masivi ma mpila yoyo meta vangamena mu moko mani e? ³ Kayani ko n'vadi a mabaya, muana a Malia, mpangi a Yakobi, yose, yuda ye Simoni e? Ye mpangi zani zabakento kabena yeto ko vava e? Ye wakala kua yawu n'tesi mia masakuba. ⁴ Kansi Yesu wabatela: " Ngunza kazitusuanga muna nsi ani ko, kua mase mani, ye kuna nzo ani ko." ⁵ Kuna, kasala diaka kani sivi dimosi ko, vo kayi tula kaka moko kua zimbevo zan'kaka ye wabaniakisa. ⁶ Ye wayitukua mu kondua kuawu kua lukuikilu. Yesu wakala zieta muna mavata ma kinzungidila ye wakala longa. ⁷ Ikuma wabokela kumi ye zole, ye wayantika kubafila babole babole, wabavana lendo kua mpeve zambi. ⁸ Wabakanikina mu lembua baka konso kima mu nzietolo awu, vo ka n'kawu kaka ko; Kabakadi ye kani dimpa, kani nkutu yevo mbongo mu n'singa a m'bati miawu ko; ⁹ kani zinsampatu, kani mapapa ye kabavuati yunga yole ko. ¹⁰ Bosi wabatela: " mu zinzo zan'kaka siluakota, lukala kaka muna nate mu ntangu lukatuka vana fulu kina. ¹¹ Ye, vo mu fulu ya n'kaka yina bantu kabalutambudi ko,yevo kabaluwilulu ko, lukatuka kuna, ye lukubula mfumfuta zatambi ya malu meno, mpasivo dina diakala kimbangi kua yawu. ¹² Bayenda ye balonga mviludulu a mavanga. ¹³ Bakula mpeve zambi zabidi ye bakusa mafuta kua mbevo zabidi ye bakubaniakisa. ¹⁴ N'tinu Helode wawa nsangu za Yesu, ndondo nkumbu yatunda kuayingi ye wavova: " Yowani m'boteki fulukidi mu bafua, yidina masivi meta vangamana mu yani." ¹⁵ Ban'kaka bavova: " Yi Elia. " Ye ban'kaka diaka bavova: " Yi m'bikudi bonso m'bikudi mia n'kaka." ¹⁶ Kansi Helode, kina kawa wo, wakala ta: " Yi Yowani ndondo yavondesa, yi yani futumukini." ¹⁷ Kadi Helode yani kibeni wakangisa Yowani, ye wan'kangisa mu boloko, mudiambu dia Helodiade, n'kento a Filipo, mpangi ani, kadi yani wan'kuela. ¹⁸ Ye Yowani wan'tela: " kuna ye luve luabaka n'kento a mpangi aku ko." ¹⁹ Helodiade watoma fuemena Yowani, ye wazola kum'vondesa. Kansi kalenda ko; ²⁰ Kadi Helode wakala ye vumi wa Yowani, kadi wazaya vo yani yi nkualunungu ye wan'longo; wakala kun'tanina ye, kunima kum'fundisa, wakala ye keti keti kibeni ye wakala kun'gwa mu kiese. ²¹ Kansi, lumbu kiafuana, kiokio Helode, kakubika ndilu ye wabokelesa zimfumu zani zanene, za makesa ye ngudi zanganga zambuta za kuna ngalili, mudiambu dia n'kembo wa ngutuka ani, ²² Muana a n'kento wa Helodiade wakota muna nzo a n'kembo; watoma kina makinu ye wayangidika Helode ye bawonso babokolosua. N'tinu wavova kua muana a nduma: " wundomba konso kina zolele ye siyakuvana kio." ²³ Wakoma mu ndofi: " Konso kina lomba siyakuvana kio, kani nkutu katikati kia nsi a kimfumu kiamu." ²⁴ Kiokio kavayika, wavova kua ngudi ani: " nga nki ndenda lomba e?" Ye ngudi ani wam'vutudila: " N'tu a Yowani Mboteki." ²⁵ Wavutuka mu n'sualu kua kala n'tinu, ye wan'lomba edi: " nzolele wamvana wuwu n'tu a Yowani m'boteki mu longa." ²⁶ N'tinu wakendalala; kansi, mudiambu dia ndofi zani ye babokolosua, kazola kun'yimina ko; ²⁷ Vanavawu wafila kesa dimosi, mu lutumu lua nata n'tu a Yowani m'boteki. Kesa diodio diayenda zenga n'tu a yowani muna boloko, ²⁸ Ye dianata n'tu ani mu longa. Diavana wo kua muana a ndumba ye muana a ndumba wavana wo kua ngudi'ani. ²⁹ N'longoki mia Yowani, kina miawa wo, miayiza baka nitu ani ye miazika yo muna ziami. ³⁰ N'longoki, kiokio miakutakana kua Yesu, ban'tela mawonso bavanga ye mawonso balonga. ³¹ Yesu wabatela: " luiza va mbela vana fulu kia makanga, ye luvunda fioti. Kadi bantu babidi bakala kuiza ye kuendanga ye bakondua nkutu ntangu a dia. ³² Ikuma bakota mu n'lungu mu kuenda va mbela vana fulu kia makanga. ³³ Bantu babidi babamona bayenda ye babazayidila, ye tuka mu mbanza yawonso balemoka mu malu ye babavitila kuna fulu kiokio bakala kuenda. ³⁴ Mu ntangu kakulumuka muna n'lungu, Yesu wamona ndonga ya bantu, ye wabafuila kiadi kiayingi, kadi bakala bonso mameme makondolo m'vungudi; ye wayantika kubalonga mambu mabidi. ³⁵ Kina vo ntangu ya toma luta, n'longoki miani miam'finama ye mian'tela: " fulu kiki kina kia makanga ye ntangu yitomene luta; ³⁶ wubasindika mpasi vo benda mu min'zanza ye mavata ma kinzungidila mu sumba yandia. ³⁷ Yesu wabavutudila: " Lubavana madia yeno mosi." Kansi ban'tela: " nga situenda sumba mampa ma nkama zole za denali, ye kubavana yandi e?" ³⁸ Ye wabatela: " mampa makua mena yeno e? luenda tala. Kiokio bazaya, bavutula: " Matanu ye mbizi zole." ³⁹ Ikuma Wabatuma mu kubavuandisa bawonso mu makabu vana matiti ma nkunzu, ⁴⁰ ye bavuanda mu n'longa mia nkama ye mia makumatanu. ⁴¹ Wabaka mampa mama tanu ye mbizi zazi zole ye, kina kasengola meso ku zulu, watonda Nzambi. Bosi, wabukuna mampa ye wavana mo kua n'longoki miani, mpasi bakabula mo kua n'kangu. Bakabula mpe mbizi zazi zole vakati kuawu. ⁴² Bawonso badia ye bayukuta, ⁴³ ye banata kumi ye zole dia yitunga ya zala ye tini ya mampa ye nsadidila za mbizi. ⁴⁴ Bana badia mampa bakala mafunda n'tanu ma mayakala. ⁴⁵ Fintangu ntangu fia luta, watuma n'longoki miani mu kota mu n'lungu ye ban'tekela kuna simu dia n'kaka dia m'bu, kuna ndambu ya Betesayida, muntangu yani sikavutula n'kangu. ⁴⁶ Kiokio kavutula wo, wayenda sambila kuna mongo; ⁴⁷ Kina nkokela yabua, n'lungu waluaka vana kati kua m'bu, ye Yesu wakala yani mosi kuna simu. ⁴⁸ Wamona vo bakala ye mpasi zabidi mu sawula n'lungu, kadi mupepe wangolo wakala kuiza kua yawu, mu wola ya n'ya ya nkielo a kuma , wakala diata vana zulu a m'bu mu kuenda kua yawu, ye wazola kabaluta. ⁴⁹ Kina bammona wuta diata vana zulu a m'bu, bayindula vo n'kuya ye bakaya mu ngolo; ⁵⁰ Kadi bammona yawu a wonso, ye bakituka zengele zengele. Vanavawu Yesu wavova kua yawu ye wabatela: " luzaya vo, yi mono kuani, kalumoni wonga ko!" ⁵¹ Bosi Wayenda kuna bakala, wakoka mu n'lungu, ye mupepe wamanisa. Batoma yitukua yawu kibeni ye bazala kua ngitukulu; ⁵² Kadi kababakusa sivi dia mampa ko, kadi n'tima miawu miakala miakangama. ⁵³ Kina bamana sawuka m'bu, baluaka kuna nsi ya Ngenesaleti, bakanga n'lungu. ⁵⁴ Kina bavayika mu n'lungu, bantu, kiokio babakusa Yesu, ⁵⁵ bayenda bawonso mu kinzungidila, ye bayantika nata zimbevo va zimfulu, muna muawonso bawa vo wuna kuna. ⁵⁶ Mu fulu ya n'kaka kaluaka, mu mavata, mu zimbanza, yevo mu min'zanza, bakala tula zimbevo mu fulu ya ntenda nkongolo, ye bakala kubalomba babavana n'sua wasimba kaka nsongi ya m'vuatu ani. Ye bawonso bakala yosimba baniaka.