¹ Baluaka kuna simu dia n'kaka dia mb'u kuna nsi ya besi Ngadaleni. ² Vanavawu Yesu kakulumuka mu n'lungu, muntu mosi wayenda va n'tula ani wavayika ku ziami wakala wavuatua kua mpeve yambi. ³ Muntu ndondo wazingidingi kuna ziami. Ye kavakala muntu ko walenda diaka kun'kanga, kani mu n'singa a sengua. ⁴ Kadi konso ntangu wakala ye yisengua mu malu ye wakangua min'singa mia sengua. Kansi wakala zenga min'singa ye muangisa yisengua, ye ka muntu ko wakala ye ngolo za kun'lemvola. ⁵ Wakala konso kantangu, fuku ye muini, kuna yiziami ye muna miongo, wakala kaya ye wakiluekanga mu matadi. ⁶ Kina kamona Yesu kuanda, walemoka ye wavuetama van'tuala ani. ⁷ Ye wakaya mu ndinga ya ngolo: "nkia diambu vakati kua ngeye ye mono e ? Yesu muana Nzambi a zangama. Yikulombele mu nkumbu a Nzambi, kunkuamisi ko. ⁸ Kadi Yesu wakala kun'telanga: " Vayika mu muntu ndondo, mpeve ambi." ⁹ Ye wan'yuvula: " nani nkumbu'aku e?" Lengio i nkumbu amu, ka m'vutudila, kadi tuabidi tuna. ¹⁰ Ye watoma kun'dodokela mu lembi kubafila kuna nganda a nsi. ¹¹ Kuakala kuna ndambu a mongo buka kianene kia bana ba ngulu bakala dianga. ¹² Ye mpeve zambi zan'dodokela zan'tela: " wutufila muna bana ba ngulu bobo mpasi vo tuakota mu yawu. ¹³ Wabavana luve ye mpeve zambi zavayika, zakota muna bana ba ngulu, ye buka kiakulumuka mongo wa ngolo mu n'sualu nate muna m'bu. Bakala tezo kia mafunda mole ye madimuka muna m'bu. ¹⁴ Bobo bakala kubavungula balemoka ye bamuangisa n'samu muna m'banza ye muna mavata. Bantu bayenda tala mana mabua. ¹⁵ Bayiza kua Yesu, ye bamona nkua mpeve zambi, nduna wakala lengio, wavuanda, wavuata, ye muna ngindu zani zasingama, ye babuilua kua wonga. ¹⁶ Bana bamona mana mavioka babatela nsangu za mana maluaka mu nkua mpeve zambi ye kua buka kia bana ba ngulu. ¹⁷ Mudina batoma dodokela Yesu kakatuka kuna zunga kiawu. ¹⁸ Kiokio kakala kota muna n'lungu, ndondo wakala ye mpeve zambi wan'lomba luve mu kuenda yani. ¹⁹ Yesu kam'vana luve lolo ko, kansi wan'tela: " wenda kuna nzo aku, kua mpangi zaku, ye wubatela mawonso mfumu kakusadidi, ye neyi kakumuenene kiadi. ²⁰ Wayenda, ye wasamuna nsangu muna zunga kia mbanza kumi mawonso Yesu kavanga kua yani. Ye bawonso bayituka. ²¹ Yesu muna n'lungu, wavutuka kuna simu dia n'kaka, kuna n'kangu wabidi wakutakana vana mbela ani. Wakala vana simu dia m'bu. ²² Bosi valuaka mosi mu mfumu za nzo a lukutakanu, mu nkumbu ya Yayilo, ndondo kiokio kammona, wakituba vana malu mani, ²³ ye watoma kun'dodokela: " Ntekolo amu wa n'kento kumini ku nsuka, wiza, wan'tula moko mpasi kavuka ye kakala moyo. ²⁴ Yesu wayenda ye yani. Ye n'kangu wabidi wan'landa ye ban'fietakesa. ²⁵ Kiongolo, vakala n'kento mosi wakala ye kimbevo kiavayikua menga tuka mvula kumi ye zola. ²⁶ Yani watoma mona mpasi, mu moko ma madokotolo mabidi, wafuta mvuilu yawonso yakala yani, kansi nkutu kimbevo kiasaka diaka. ²⁷ Kiokio kawa bavovela Yesu, wayiza vakati kua n'kangu ye wasimba m'vuatu ani kunima. ²⁸ Kadi wakala vova: " vo ndendele kaka simba m'vuatu miani siyakolela." ²⁹ Vanavawu menga mamanisa vayika, ye wamona vo muna nitu ani waniaka mu kimbevo kiani. ³⁰ Yesu wazaya mu n'sualu mu yani kibeni vo ngolo zivayikidi mu yani; ye, wabaluka kua n'kangu wavova: " Nani simbidi m'vuatu miamu e? " ³¹ N'longoki miani mian'tela: " wutamona n'kangu wutakufietakesa ye ngeye wutavova: nani wusimbidi e? " ³² Ye watala va kinzungidila kiani, mu mona nduna wavanga wo. ³³ N'kento,mu wonga ye wazakamu kina vo wazaya mana maluta mu yani, wayiza kituba vana malu mani, ye wan'tela kieleka kiawonso. ³⁴ Kansi Yesu wan'tela: " muana amu a n'kento, minu kiaku kikuvuluzi; wenda mu luvuvamu ye kolela mu mpasi zaku. ³⁵ Muntangu kakala vova, mu ngudi za nganga za nzo za lukutakanu, va yiza bantu bavova: " Muana aku a n'kento fuidi; Mudiambudia nki wutatamana kuamisa n'longi e?" ³⁶ Kansi Yesu kondua kua tala mambu momo, wavova kua mfumu a zo a lukutakanu: " kukadi wonga ko, kuikila kaka." ³⁷ Ye Yani kavana n'sua kua muntu kenda yani ko, vo ka kua petelo ko ye yakobi ye kua Yowani mpangi a Yakobi ko. ³⁸ Baluaka kuna nzo ya mfumu a nzo a lukutakanu, kuna Yesu kamona n'kangu wabidi ye bantu bakala dila ye kaya mu ngolo. ³⁹ Wakota, wabatela: " Mudiambu dia nki lutatudila mazu, ye mudiambu dia nki lutadidila e? Muana kafuidi ko, kansi wuna waleka." ⁴⁰ Ye Yawu bakala kun'seva. Wana kunima vayikisa bantu bawonsono, wabaka Se ye ngudi a muana, ye bawonso bakala yani, ye wakota muna muakala muana. ⁴¹ Wan'simba mu koko, ye wan'tela: " Talita kumi, disongele muana a n'kento, telama, yitelele wo." ⁴² Vanavawu muana a n'kento watelama ye wayantika diata; kadi wakala ye mvula kumi ye zole. Ye bakala mu ngitukulu yanene. ⁴³ Yesu watoma kubasidikisa mpasi muntu kazayi diambu diodio ko, ye wabatela bavana madia kua muana a n'kento.