¹ Yesu watelama diaka ye walongela vana simu dia m'bu. Ndonga ya bidi yakutakana kua yani. Wakota ye wa vuanda muna n'lungu, muna kati kua m'bu. Ndonga yawonso yakala yavuanda vana ntoto kuna simu dia m'bu. ² Wabalonga mambu mabidi mu zingana ye muna malongi mani, wabatela: ³ " Luwa! N'kuni wavayika mu kuna. ⁴ Kina kakala kuna, ndambu ya nginga yabua muna zila, nuni zayiza ye zadia yo. ⁵ Ndambu ya n'kaka yabua vana fulu kia matadi, va kondua n'toto wabidi; nginga yoyo yamena mu n'sualu, kadi kavakala n'toto wafuana ko. ⁶ Kansi, kiokio ntangu yavayika, nginga yoyo yavia ye yayuma mudiambu dia kondua kua mianzi. ⁷ Ndambu ya n'kaka yabua vana nsende: Nsende zatomboka ye zafietakesa yo ye kayavana m'butu ko. ⁸ Ndambu ya n'kaka yabua va n'toto wambote, yamena, yakula ye yavana m'butu makumatatu, makumasambanu et nkama mosi mu n'ti wumosi wumosi. ⁹ Ye wata: " konso wuna ye makutu mawa bika kawa. ¹⁰ Kina Yesu kakala va yani mosi, bana ban'zungidila ye kumi ye zole, ban'yuvula nsasa ya ngana yina. ¹¹ Wabatela: " Yi kua yeno kuavewa masuekamu ma kimfumu kia Nzambi. Kansi kua bobo bena ku nganda, mawonso malutilanaga mu zingana; ¹² Mpasi vo kiokio betatala, bamona kansi kababakusi ko ye kiokio betawa, bawa, kansi kababakusi ko, mu wonga wasa vo balenda viluka ye masumu mawu malenda lolokua. ¹³ Wabatela diaka: "Kaluta visa ngana yiyi ko e? Neyi wana siluabakusila zingana zawonso e? ¹⁴ N'kuni kunanga diambu. ¹⁵ Ban'kaka bena muna nzila nzila momo muakunua diambu; kiokio bawa dio,vanavawu satana wayiza ye wakatula diambu dia kunua mu yawu. ¹⁶ Ban'kaka yi mpila mosi, batambulanga nginga vana fulu ya matadi, kiokio beta wa mambu, ntete batambulanga mo mu kiese; ¹⁷ Kansi bakondolo mianzi mu yawu kibeni, kabena bakuikama ko, ye kiokio mpasi zasaka zikuizanga ye lubangamu mudiambu dia mambu, bawu bavitumukanga. ¹⁸ Ban'kaka batambulanga mambu vana sangi kia nsende; yiyawu bawanga mambu, ¹⁹ kansi mu yawu mabanza manza yiyi, mpukumunu za yimvuama ye ngiadulu kua nzinunu zan'kaka, zifietakesanga mambu ye bakitukanga bakondua m'butu. ²⁰ Ban'kaka batabulanga nginga mu n'toto wambote; yi bawu bawanga mambu, batambulanga mo ye bawutanga m'butu: makumatatu, makumasambanu, nkama mu wumosi wumosi. ²¹ Wabatela diaka: " Nga muinda wunatuanga mu tulua kuna nsi a meza, yevo kuna nsi a mfulu e? Kayimutula wo vana lundulu kia muinda ko e? ²² Kadi kavena diambu diasuekama dilembi sololua ko, kavena mansueki malembi sengomonua ko." ²³ Nduna wuna ye makutu bika kawa. ²⁴ Wabatela diaka: lukeba kueno mu momo luta wa. Siluatezelua mu tezo kiokio siluatezela, ye sibakudika yo kua yeno. ²⁵ Kadi sibavana kua ndondo wuna ye kima, kansi kua ndondo kondolo siban'kuata nkutu kina kena kiawu. ²⁶ Wata diaka:" yi wowo mpe mena muna kimfumu kia Nzambi, bonso muntu wutatuba nginga va n'toto. ²⁷ Kaleka yevo kakaya meso,mpimpa ye muini, nginga siyamena ye kula kondua kazaya kana neyi. ²⁸ N'toto wawu mosi wuwutanga ntete titi, bosi m'butu, bosi nginga zikalanga zakangama muna m'butu. ²⁹ Ye m'butu vo miyelele, batulanga mio mbele kadi ntangu a vela yi fuene. ³⁰ Wavova diaka:" Nki tufete fuanikisa ye kimfumu kia Nzambi, yevo mu kia ngana tufete kio songela e? ³¹ Kifuanane ye nginga a seneve, vo yikununu muna n'toto, yina kunua kilutidi ke mu kunua yawonso ya nza. ³² Kansi vo kunua kimenene, kikudidi ye sikiakuma kia nda lutila ndunda zawonso ye vanganga ntayi zanene ye nuni zazulu zivuandanga va kimpozi kiani. ³³ Yi mu zingana zabidi za mpila yoyo kakala kubalongela mambu ma Nzambi, landila ngolo zawu mu kun'gua. ³⁴ Kabalongela nkutu kondua kua zingana ko, kansi, va yawu mosi, wasasila mawonso kua n'longoki miani. ³⁵ Muna lumbu kina kaka, mu nkokela, Yesu wabatela: " tusawuka kuna simu dia n'kaka. ³⁶ Kiokio kamana sindika n'kangu, wabanata muna n'lungu wuna kakala. Vakala mpe ye n'lungu mia n'kaka ye yani . ³⁷ Vabua tembo kianene ye mayo makala kota muna n'lungu nate wazola nkutu. ³⁸ Ye yani wakala waleka vana konko kia n'lungu vana mfika n'tu. Ban'sikamesa ye ban'tela: " N'longi kutakikuamisa ko vo situ fa e?" ³⁹ Kina kasikama, wanuanisa tembo ye wata kua m'bu: " kala na pi! Dingalala!" Ye pupepe walembama. Ye kuakala luvuvamu lua yingi. ⁴⁰ Bosi wabatela: " Mudiambu dia nki lunina ye wonga e? Neyi Kalunina ye minu ko e? ⁴¹ Bazala kua wonga ye bavovasana yawu ye yawu: " Nani wana yuyu wuwiluanga kani kua mupepe ye m'bu e?"