¹ N'kembo wa paska ye wa mampa malembi funusua wufete kembelua kunima lumbu yole. Ngudi za nganga za mbuta ye min'soniki bakala sosa neyi bafete kangila Yesu mu ngangu zambi mpasi vo bam'vondesa. ² Kadi bakalavova: " katuvangi wo mu ntangu a n'kembo ko, mpasi vo kakukadi mvualangani mu n'kangu ko. ³ Kiokio Yesu kakala kuna Betania, kuna nzo ya Simoni nkuawazi, n'kento mosi wakota, mu ntangu bakala vana meza. Wakala ye n'tutu wa alabatele, wazala ye mafuta ma nsunga ma nale malembi sangua ye bima bian'kaka, mantalu kibeni; ye, kiokio kawula n'tutu, watiamunina mafuta va n'tu a Yesu. ⁴ Ban'kaka mu yawu bamona dio diambi; nkia n'funu mu bebesa mafuta momo e? ⁵ Nga mafete tekua kuani mu nkama tatu za denali, ye kayila zo kua bamputu. Ye bafuemena n'kento ndondo. ⁶ Kansi Yesu wavova: " lun'yambula. Nki lutakun'tokanesena e? Yani vangidi diambu diambote kua mono; ⁷ kadi bamputu bena yeno ntangu za wonso, ye lulenda kubavangila mambote konso kua ntangu luzolele dio, kansi mono katuna yeno ntangu zawonso ko. ⁸ Yandi vangidi diodio kalendele; yani wukikubikidi nitu amu mu luziku luamu. ⁹ Yilutelele dio mu kieleka, konso kuna n'samu a mbote siwalongolua, mu nza yam'vimba, sibavovela mpe, mu mbambukulu a moyo, n'kento ndundu, mu diodio kavangidi. ¹⁰ Yuda Iskalioti, mosi mu kumi ye zole, wayenda kua Ngudi za nganga zambuta, mpasi kabayekolela Yesu. ¹¹ Kiokio bamana kun'gwua, bakala mu kiese ye bansila vo siban'vana mbongo. Ye Yuda wasosa neyi kafete kun'yekolela. ¹² Lumbu kiantete kia mampa malembi funusua, kiokio bavonda mameme mu kuma kia n'kembo wa paska, n'longoki mia Yesu miavova: " kue zolele tuenda kukubikila paska e? " ¹³ Ye wafila n'zole mu n'longoki miani, ye wabatela: " luenda muna mbanza, siluawana muntu nete m'vungu wa maza, lun'landa. ¹⁴ Konso vana kakota, luvova kua mfumu a nzo: " N'longi katele: " kueyi kuna fulu yidila paska ye n'longoki miamu e?" " ¹⁵ Ye sikalusonga suku diantandu dianene, diakubukua ye yiti ye mawonso malunga. Yi muna siluatukubikila paksa. ¹⁶ N'longoki miayenda, baluaka muna mbanza, ye bamona mawonso bonso kazayisila mo; ye bakubika paska. ¹⁷ Nkokila kina yabua, baluaka ye kumi ye zole. ¹⁸ Kiokio bakala vana meza ye bakaladia, Yesu wavova: " yilutelele mu kieleka, mosi mu yeno, wutadia yamu, sikangiekola." ¹⁹ Bayantika mona kiadi, ye kun'tela, monsi monsi: " kadi mono e?" ²⁰ Yesu Wabavutudila: " mosi mu kumi ye zole, nduna tula yamu koko mu longa." ²¹ Muana a muntu wutakuenda landila masonekua mu yani. Kansi kiadi kua muntu nduna sadilua mu yekola Muana a muntu! Dilutidi mbote kua muntu ndondo vo kawutuka ko. ²² Kiokio bakaladia, Yesu wabonga dimpa, ye, kina kamana vutula matondo, wabukuna dio, ye wabavana dio, wavova: " Lutambula yiyi yi nitu amu." ²³ Wabaka mbungu; ye, kina kamana vutula matondo, wabavana yo, ye banua yo yawu awonso. ²⁴ Ye wabatela: " Mama yi menga mamu, menga ma nsilulu, matengulua mukuma kia babidi. ²⁵ Yilutelele dio mu kieleka, kisala nua diaka bitukidi mu m'butu wa vinia ko, nate lumbu kina siyanua bio diaka muna kimfumu kia Nzambi. ²⁶ Kiokio bamana yimbila n'kunga miakintuadi, bayenda kuna mongo wa olive. ²⁷ Yesu wabatela: "Siluatesua masakuba yeno awonso", kadi dia sonama: "siyazuba m'vungudi, ye mameme simamwangana." ²⁸ Kansi kunika ya mfutumukunu amu, siyaluvitila kuna Ngalili. " ²⁹ Petelo wan'tela: " kiokio bawonso sibatesua masakuba, mono kitesua sakuba ko." ³⁰ Ye Yesu wan'tela: " mu kieleka yitelele dio, wunu, mu mpimpa yiyi kaka, tekela koko dia nsusu diakokola, ngeye siwamvakudila n'kalu nkumbu tatu. " ³¹ Kansi Petelo wam'vutudila mu ngolo kibeni: " vo mfete fua kintuadi ye ngeye, kilendi kuvakudila n'kalu ko." Ye bawonso bavova mpila mosi. ³² Bayenda kuna fulu kiabokololuanga Ngetesemane, Ye Yesu wavova kua n'longoki miani: " luvuanda vava, mu ntangu yikuenda sambila." ³³ Wabaka Petelo, Yakobi ye Yowani ye wayantika mona wonga ye wunkuta. ³⁴ Wabatela: " muela amu wuzele kua kiadi nate kuna lufua; lusala vava, ye lukaya meso" ³⁵ Bosi, kiokio kayenda fioti vana ntuala, wakituba vana n'toto, ye wasambila vo: vo dilendakana, bika lokola kiki kienda kuanda ye yani. ³⁶ wakalavova: " Aba, Tata, mawonso malendakana kua ngeye, bika mbungu yiyi yenda kuanda ye mono! Kansi, kabonso nzolele ko kansi bonso ngeye zolele." ³⁷ Ye wayiza kuakala min'longoki, wabawana baleka, ye wavova kua Petelo: " Simoni, lele! kulendele kaya meso kani lokola kimosi ko!" ³⁸ Lukaya meso ye lusambila, mpasi lualembi bua mu mpukumunu; mpeve yina yakubama kansi n'suni wuna wayoya. " ³⁹ Wabasisa diaka ye wasambila diaka sambu kina kaka. ⁴⁰ Wavutuka, ye wabawana diaka baleka; kadi meso mawu mazala kua tulu. Kabazaya mana bafete kum'vutudila ko. ⁴¹ Wayiza nkumbu ya n'tatu, ye wabatela: " wuwu luleka, ye luvunda! mafuene! Ntangu yi fuene; tala, Muana a muntu yekolo mu moko ma basumuki. ⁴² Lutelama, tuenda; tala, ndondo kungiekola finamene." ⁴³ Ye vanavawu, kiokio kakala vovanga, Yuda waluaka , mosi mu kumi ye zole, ye wakala kintuadi ye n'kangu wakala ye mbele za luyalu ye bota, bafilua kua Nganga za Mbuta, kua min'soniki ye kua mbuta za bantu. ⁴⁴ Ndondo wan'yekola wabavana sinsu eki: " Nduna siyafiba, yi yani, lum'baka ye lutoma kunnata. ⁴⁵ Kiokio kaluaka kaka, wafinama kua Yesu, wavova: " N'longi!" Ye wan'fiba. ⁴⁶ Ye bantu bani batula moko mu Yesu ye bam'baka. ⁴⁷ Mosi mu bana bakala vana, wavola mbele ani ya luyalu, wazuba yo n'sadi mosi wa Ngudi a nganga a mbuta, ye wan'zenga kutu. ⁴⁸ Yesu, wabaka m'vovo, wabatela: " luizidi, bonso kaka mukanga kimpumbulu, ye mbele zaluyalu ye mim'bota, mukumbaka. ⁴⁹ Yakelenge yeno lumbu yawonso, yalongelenge muna nzo ya Nzambi, ye kaluankanga ko. Kansi mpasi kaka masomukua malungana." ⁵⁰ Mudina bawonso ban'sisa, ye batina. ⁵¹ Toko dimosi dian'landa, ye wakala kaka ye dala muna nitu, bakun'kanga; ⁵² kansi, wayambula m'vuatu ani, ye wakivuluza kimuasi. ⁵³ Banata Yesu kua Ngudia a Nganga a Mbuta, kuna kuakutakana Ngudi za Nganga za Mbuta zawonso, bambuta ye Min'soniki. ⁵⁴ Petelo wan'landa kuanda fioti nate kuna kati kua yanzala kia Ngudia a nganga a Mbuta; wavuanda ye bisadi, ye wakala yetela vana mbela tiya. ⁵⁵ Ngudi za Nganga za Mbuta ye bamayala bawonso, basosa kimbangi kifete buisa Yesu, mpasi bam'vodesa, kansi kababaka kio ko; ⁵⁶ kadi babidi bakalata yimbangi ya luvunu mu yani, kansi yimbangi yoyo kayafuana ko. ⁵⁷ Ban'kaka batelama, ye bata yimbangi ya luvunu mu yani, bavova: ⁵⁸ "Tuan'wuilu wavovele: " siyabuisa Nzo a Nzambi yiyi yatungua mu moko ma bantu, ye mu lumbu tatu siyatunga ya n'kaka yina kayitungua mu moko ma bantu ko." " ⁵⁹ Kani mu diambu diodio, kimbangi kiawu kakiafuana ko. ⁶⁰ Ikuma, Ngudi a Nganga a Mbuta , watelama va kati kua lukutakanu, wadia Yesu kiuvu, ye wata: " kutavutula ko e? Nki bantu baba betakufundila e." ⁶¹ Yesu wakala na pi, ye kavutula diambu ko. Ngudi a Nganga a Mbuta wan'yuvula diaka, ye wan'tela: " Nga ngeye yi Klisto, Muna a Nzambi wa lusakumunu e?" ⁶² Yesu wavutula: " ngina wo. ye siluamona Muana a muntu wavuanda vana lunene lua lendo kia Nzambi, ye wutakuiza mu matuti ma zulu. ⁶³ Mudina Ngudi a Nganga Mbuta wakiasuna m'vuatu miani, ye wavova: " nkia m'funu diaka mu sosa zimbangi e? ⁶⁴ Luwilu ntiakulu ani. Neyi lumuene?" Bawonso bam'bela bonso muntu fuene lufua. ⁶⁵ Ban'kaka bayatika kun'tubila kololo, kum'fika zidi ye kun'zuba mu nkomi, ye kun'tela: " wututela nani wuzubidi!" ye bisadi yam'baka , ban'zuba zimbata. ⁶⁶ Kiokio Petelo kakala kuna n'dimba vana yanzala, vayiza sadi kimosi kia n'kento kia Ngudi a Nganga a Mbuta. ⁶⁷ Kiokio kamona Petelo wutayetela, wan'tala ye wan'tela : " Ngeye mpe, wakele ye Yesu muisi Nazaleti." ⁶⁸ Wavakula n'kalu, wavova: " Kizeye ko, kitabakusa dina zolele vova ko." Bosi wavayika mu kuenda kuna suku dia muelo a yanzala. Ye Koko dia nsusu diakokola. ⁶⁹ N'sadi a n'kento wayantika diaka vova kua bawu bakala vana: " ndundu wuna mosi mu bantu bana." ⁷⁰ Ye wavakudila dio diaka nkalu. kunima bana bakala vana bavova diaka kua Petelo: " Kieleka ngeye wuna kaka mosi mu bantu bana, kadi wuna muisi Ngalili." ⁷¹ Bosi wayantika vova zinsingulu ye baka nzengolo: " Kizeye muntu ndondo luta vovela ko." ⁷² Vanavawu, mu nkumbu ya n'zole, nsusu a koko yakokola. Ye Petelo wabambuka moyo mu m'vovo Yesu kan'tela: " tekela nsusu ya koko ya kokola nkumbu zole, siwam'vakudila n'kalu nkumbu tatu." Kiokio kayindula dio, wadila.