¹ Kiokio Yesu kavayika muna nzo a Nzambi, mosi mu n'longoki miani wan'tela: " N'longi, tala nkia matadi, ye nkia mpila ntungulu!" ² Yesu wam'vutudila: " wutamona ntungulu zozo zanene? Kavasala tadi vana ntadu a tadi ko dilembi kunkulua." ³ Wavuanda vana zulu a mongo wa olive, vana n'tuala a nzo a Nzambi. Ye Petelo, Yakobi, Yowani ye Andele ban'yuvula ngiuvu eyi va yawu kaka: ⁴ " Wututela, nkia ntangu momo simalungana, ye mu nkia sinsu situazayila vo mawonso momo simalungana e?" ⁵ Mudina Yesu wabatela: " lukeba muntu kaluvukumuni ko. ⁶ Kadi babidi sibeza mu nkumbu amu, sibata: yi mono ye sibavukumuna bantu babidi." ⁷ Kina siluawa betavovela zimvita ye mazu ma zimvita, kalukadi mu zengele zengele ko, kadi mambu momo mafete vangama. Kansi kasikiakala nsukulu ko. ⁸ N'kangu wumosi siwatelamana N'kangu wan'kaka, ye kitinu kimosi ye Kitinu kia n'kaka, sikuakala ye ndikunu a n'toto mu fulu yabidi, sikuakala nzala. yoyo yingiatukulu a n'songo kuani . ⁹ Lukikeba kueno, siluayekolua kuna mbazi a n'kanu, ye siluazubua n'zuangi mu nzo zatukutakanu; siluasamba va ntuala mfumu za zunga ya nsi ye va n'tuala a Min'tinu mudiambu diamu, mpasi diakala kimbangi kua yawu. ¹⁰ Ntete ntete, nsangu zambote zifete longelua kua makanda mawonso. ¹¹ Kiokio siluanatua mu kuluyekola, kalukikuamisi ko mu mana luvova, kansi luvova mana siluavewa vanavawu; Kadi kayenoko siluavova, kansi mpeve a n'longo. ¹² Mpangi sikayekola mpangi ani kulufua ye Se muana ani; bana sibatelamena Se ye ngudi zawu ye sibabavondesa. ¹³ siluabelua kua bawonso, mudiambu dia nkumbu amu, kansi duna tatamana nate kuna nsuka sikavuluzua. ¹⁴ Kiokio siluamona masumu ma mpimpita ye makiadi mavangamene vana kama lendi vangamena ko, bika nduna wutatanga kakeba, ikuma, bana sibakala muna Yuda batinina kuna miongo; ¹⁵ nduna sikakala kuna n'ludi a nzo kakulumuki ko ye kakoti mu baka kima muna nzo ani ko; ¹⁶ ye nduna sikakala kuna zimpatu kavutuki kunima mu baka yunga kiani ko. ¹⁷ Kiadi kua bakento sibakala ye vumu ye kua bana sibayemekanga mu lumbu yina! ¹⁸ Lusambila vo mambu mama kama luaki mu nsungi ya kiozi ko. ¹⁹ Kadi mpasi, mu lumbu yina, sizakala bonso kazateka kala nkutu ko zampila yoyo tuka ngiatukilu a nza Nzambi kavanga nate wuwu, ye kazisala kala nkutu ko. ²⁰ Ye, Vo Mfumu kakufiki lumbu yoyo ko, nga kamuntu ko lenda vuluzua; kansi wakufika yo, mukuma kia basolua kasola. ²¹ Ikuma vo muntu wulutelele: " Klisto wuna vava yevo kuna, kalukuikila ko. ²² Kadi siva telama Baklisto baluvunu ye m'bikudi mialuvunu; sibavanga mangitukulu ye masivi, ye sibavukumuna basolua, vo dilendakana. ²³ Lukeba, yamvuidi kulutela mavonso. ²⁴ Kansi mu lumbu bina, kunima mpasi zozo, ntangu siyalomboka ye ngonda kayivana diaka n'temo ani ko, ²⁵ Ntentembua sizasotoka tuka kuzulu, ye tulendo tuna muna mazulu situanikuka. ²⁶ Bosi situamona Muana a muntu sikeza muna matuti ye lendo kianene ye mu n'kembo. ²⁷ Ikuma sikafila zimbasi ye sikakutakesa basolua bandambu ya, tuka kuna nsuka a n'toto nate kuna nsuka a zulu. ²⁸ Lubaka nduenga mu fuani kitukidi mu mungiengie. Tuka mu ntagu ntayi zani zilembele, ye makaya mani mavayikidi, luzeye vo nsungi a mbangala yifinamene. ²⁹ Yi mpila mosi, kina siluamona mambu momo mavangamene, luzaya vo Muana a muntu finamene, va muelo. ³⁰ Yilutelele wo mu kieleka, mbandu yiyi kayilendi luta ko, vo mawonso momo kamalungane ko. ³¹ Zulu ye ntoto sibialuta, kansi mambu mamu kamalendi luta ko. ³² Mu diodio ditadidi lumbu yevo ntangu, kavena muntu zeye dio ko, ka mbasi mu zulu ko, ka Muana ko, kansi Se yani mosi kaka. ³³ Lukikeba, lukaya meso ye lusambila; kadi kaluzeye ntangu yoyo ko. ³⁴ Sidiakala bonso muntu wele mu nzietolo, sisidi nzo ani, vene luyalu mu moko ma n'sadi miani ye vene kiekua kia konso kua muntu, ye vene n'sua kua n'kebi a kielo kakaya meso. ³⁵ Ikuma lukaya meso, kadi kaluzeye nkia ntangu yikuiza mfumu a nzo ko, mu nkokela, vo mu kati kua mpimpa, vo mu ntangu nsusu zikokolanga, yevo mu n'suka; ³⁶ Lukeba vo kaluwani ku nsi a tulu ko, mu ngiza ani ya nabiu. ³⁷ Didi yitavova, mvovele dio kua bawonso: " lukaya meso."