¹ Yesu wayantika vova kua yawu mu zingana. Muntu mosi wakuna mpatu ya vinia. Watungila yo lupangu, wavala kamunu, ye watunga nzo yamin'kengi, ye watula mo mim'vati, ye wayenda ku nsi ya n'kaka. ² Mu ntangu ya vela, wafila n'sadi ani wumosi kua mim'vati, mpasi kabaka kua yawu ndambu ya m'butu mu mpatu ya vinia. ³ Kiokio bam'baka, ban'zuba, ye bam'vutula moko ma pamba. ⁴ Wafidisa diaka n'sadi wan'kaka kua yawu. Ban'zuba mu n'tu ye ban'sakanena. ⁵ Wafila wan'tatu, bam'vonda ye babidi ban'kaka bazubua yevo bavondua. ⁶ Wakala diaka ye muana mosi katoma zola; wam'fila kua yawu wansuka, wavova: " sibazitisa muana amu." ⁷ Kansi m'vati miomio miavovana yawu ye yawu: " tala, m'vigidi a fua, luiza, tum'vonda, ye fua diakala dieto. ⁸ Ye bam'baka, ba m'vonda ye ban'tuba kuna nganda ya mpatu a vinia. ⁹ Wuwu, nga nki mfumu a mpatu a vinia sikavanga e? Sikeza bunga mim'vati ye vana mpatu ya vinia kua ban'kaka. ¹⁰ Nga kaluatanga m'vovo wuwu wa masonukua ko : " tadi diodio diatubua kua bobo bakalatunga diakuma tadi diakonko dilutidi m'funu; ¹¹ Yi mu luzolo lua Mfumu dikitukidi wo, ye nga dina sivi va meso meto e? ¹² Basosa mu kum'baka, kansi bakala mona wonga wa n'kangu. Bazaya vo yi mukuma kiawu Yesu kavovela ngana yoyo. Bosi ban'sisa, ye bayenda. ¹³ Bafila kua Yesu ndambu ya min'falisi ye bantu ba Elode, mpasi bam'baka mu m'vovo miayani mosi. ¹⁴ Ye bayiza kun'tela: " N'longi, tuzeye vo wuna wakieleka, ye vo kukikuamisanga mu muntu ko; kadi kuna ye n'talu a zizi kua bantu ko, ye longanga nzila a Nzambi mu kieleka. Nga dina dia luve, yevo nkatu, mu futa mpaku kua Kayisala e? ¹⁵ Tufete futa, yevo katufuti ko e?" Yesu, kina vo wazaya disu diawu dia kunsi a lukaya, wabavutudila: " mudiambu dia nki lutakuntontela e? Lundatina denali yimosi, mpasi ya tala yo." ¹⁶ Ban'natina yimosi; ye Yesu wabayuvula: " Nga fuani kiki ye sono kiki yina yanani e?" Bam'vutudila: " bia Kayisala." ¹⁷ Bosi wabatela: "Luvana kia Kayisala kua Kayisala, ye kua Nzambi kia Nzambi." Ye bakala mu ngitukulu va ntuala ani. ¹⁸ Basaduki, bavovanga vo kakuna mfutumukunu ko, bayiza kua Yesu, ye ban'dia kiuvu eki: ¹⁹ " N'longi, tala diatusonekena Mose, vo mpangi a muntu fuidi, ye sisidi n'keto kondua kua bana, mpangi ani sikakuela fola diodio. Ye wutila mpangi ani n'kuna." ²⁰ Kiongolo, vakala mpangi nsambodia. Wantete wakuela ye wafua kondua kua sisa n'kuna; ²¹ Wan'zole wakuela fola ye wafua kondua kua sisa n'kuna. Diakala mpila mosi kua wan'tatu. ²² Ye kamuntu ko mu yawu nsambuadia wasisa n'kuna. Kunima ya yawu a wonso, n'kento mpe wafua. ²³ Muna ntangu ya mfutumukunu, n'kento ndondo wanani sikakala vakati kua yawu e? Kadi yawu nsabuadia ban'kuela." ²⁴ Yesu wabavutudila: " kaluna luavila ko, kadi kalutabakusa kani masonekua, kani lendo kianzambi ko e?" ²⁵ Kadi, muna ntangu a mfutumukunu a bafua, mayakala kamakuela bakento ko, kabakento mpe ko bakuela mayakala. Kansi sibakala bonso zimbasi mu mazulu. ²⁶ Mudiodio ditadidi mfutumukunu a bafua, nga kaluatanga, muna n'kanda a mose, mana Nzambi kan'tela, mu matadidi fivuangi fia min'ti : " ngina Nzambi ya Abalahami, Nzambi ya Isaki, ye Nzambi ya Yakobi " ko e? ²⁷ Nzambi kena Nzambi ya bafua ko, kansi Nzambi ya bamoyo, yeno luvididi kibeni. ²⁸ Mosi mu min'soniki, wabawa kiokio bakala filana mpaka, kina vo wazaya vo Yesu watoma vutula kua Basaduki, wafinama, ye wan'yuvula: " Nki yi nsiku wa ntete mu miawonso e?" ²⁹ Yesu wavutula: " tala wa ntete: " wa, Isaeli, Mfumu, Nzambi eto, yi Mfumu yi mosi kaka", ³⁰ Ye siwazola Mfumu, Nzambi aku, mu n'tima aku wam'vimba, mu muela aku wa wonso, mu mabanza maku mawonso, ye mu ngolo zaku zawonso. ³¹ Tala wan'zole : siwazola mfinangani aku bonso ngeye kibeni. Kakuna n'siku wan'kaka wulutidi miomio mu nene ko." " ³² Nsoneki wavova kua yani: " Ingeta, n'longi; vovele mu kieleka, vo Nzambi yi wumosi kaka ye kavena wan'kaka ye yani ko. ³³ Ye vo mun'kun'zola mu n'tima aku wawonso, mu nzayilu zaku zawonso, mu muela aku wawonso ye mu ngolo zaku zawonso, ye mu zola mfinangani aku bonso ngeye kibeni, diodio dilutidi n'kayilu miawonso mia ngioka ye n'kayilu mia n'kaka mia zikua mpe. ³⁴ Yesu, kiokio kamona vo wavutula mu ngangu, wavova kua yani: " kuna ntama ko ye kimfumu kia Nzambi. Ye ka muntu ko watonta kun'dia diaka kiuvu. ³⁵ Yesu watatamana mu longa muna Nzo a Nzambi, wavova: " neyi n'soniki mitanga vo Klisto yi muana Davidi e? ³⁶ Davidi yani mosi, mu lendo kia Mpeve a N'longo, wavova: "Mfumu wavova kua Mfumu amu: " vuanda va lunene luamu, nate n'kitula n'tantu miaku diatulu ku nsi a tambi yaku." ³⁷ Davidi yani mosi kum'bokelelanga Mfumu, wana neyi kenena muan'ani e?" Ye ndonga ya bidi yakala kun'wa mu kiese. ³⁸ Wakala kubatela mu malongi mani: " lukikeba mu n'soniki, mizolele zieta mu mvuela zanda, ye vewanga zimbote va ntenda nkongolo; ³⁹ basosanga fulu yantete muna nzo zatukutakanu; ye biandu biantete muna min'kembo; ⁴⁰ Babebesanga nzo zamafola, ye basalanga sambu yanda mu kimonekesa. Sibafundusua mu mfundusulu yilutidi ngolo." ⁴¹ Yesu wavuanda vana n'tuala a longa dia min'kayilu, wakala talanga neyi ndonga yakala mo tudila mbongo. Mvuama zabidi zatula zabidi. ⁴² Kuayiza mpe fola dia mputu, watula vanza yole ya fioti, yivene ndambu ya n'ya ya ndisu. ⁴³ Kiokio Yesu kabokela n'longoki miani, wabatela : " Yilutelele dio mu kieleka, fola didi dia mputu divene lutila bawonso batudidi mu longa dia n'kayilu; ⁴⁴ kadi bawonso batudidi mu n'luta miawu, kansi yani tudidi mvuilu ani yawonso, biawonso biakala yani, biobio biakala yani mu zingila.