¹ Kiokio Yesu kamanisa vova mawonso kakalavova kua n'kangu wakala kun'gwa, yani wakota muna Kapenawumi. ² Tala, mfumu a makesa nkama wakala ye nanga, kakala toma zola, wakala wayela ye wafinama ye lufua. ³ Kiokio mfumu a makesa nkama kawa bakalavovela Yesu, watuma kua yani n'kuluntu mia bayudayo mu kun'lomba keza niakisa n'sadi ani. ⁴ Kiokio baluaka kua Yesu, ban'dodokela bavova: " wafuana mu kun'vangila dio, ⁵ kadi yani zolanga n'kangu eto ye yani watutungila nzo a lukutakanu. ⁶ Mudina, Yesu watatamena kuenda mu nzila ani ye yawu. Kiokio kaluaka va mbela a nzo, mfumu a makesa nkama wafila bakundi mu kun'tela: " Mfumu, kukivangi mpasi ko, kadi kina yafuana ko vo ngeye wiza mu nzo amu. ⁷ Yi mudiodio mpe mono mosi kikimuene yatomafuana ko mu kuiza kua ngeye. Kansi vova kaka diambu dimosi, n'sadi amu sikiakolela. ⁸ Kadi mono mpe, yi muntu watulua ku nsi a luyalu, ye makesa mena ku nsi a lutuadusu luamu. Vo ntele kua mosi: " wenda", ye yani wele; kua wan'kaka: " wiza" ye yani wizidi; ye kua n'sadi amu: " vanga edi" ye yani vengidi dio." ⁹ Kiokio Yesu kawa mpova zozo, wayitukua mu diambu diodio, ye wabaluka kua kala n'kangu wakalakun'landa, wavova: " yilutelele dio, kani ku Isaeli kiamuene eti muntu wuna ye minu kia mpila yoyo ko." ¹⁰ Ye kiokio bantu bobo batumua bavutuka kuna nzo, bawana n'sadi mu mavimpi kibeni. ¹¹ Kunima fintangu ntangu ya diodio, Yesu wayenda kuna Mbanza yabokololua Nayini, n'longoki miani ye n'kangu miabidi bayendanga yani. ¹² Kina vo wafinama ye muelo a mbanza, tala, banata muntu wafua, yani wakala muana mosi kaka mu ngudi ani (wakala fola), ye yani wakala ye bidi dia ndonga dia mbanza yoyo. ¹³ Kiokio kammona, Mfumu wazalua kua kiadi mu yani ye wan'tela: " kudidi ko." ¹⁴ Kunima wafinama ye wasimba nkela yoyo banatina nitu, bana banata yo batelama, ye wavova: " fimuana toko yitelele dio vumbu kuaku." ¹⁵ Muntu wafua wavuanda ye wayantika vova. Ye Yesu wam'vana kua ngudi ani. ¹⁶ Yikuma, bawonso babuilua kua wonga, ye basanisina Nzambi, bavova: " m'bikudi wanene zangulu vakati kueto ye Nzambi wayizidi tala n'kangu ani." ¹⁷ Nsangu zozo za Yesu zamuangana mu yuda ye mu mbanza zawonso zakinzungidila. ¹⁸ N'longoki mia yowani miannatina mambu momo mawonso. ¹⁹ Idina, Yowani wabokela n'longoki miani miole ye wabatuma mu kuenda yuvula kua Mfumu: " nga ngeye wutakuiza, yevo tufete vingila wan'kaka e?" ²⁰ Muntangu baluaka kua Yesu, bantu bobo bavova: " Yowani m'boteki wututumini kua ngeye mu yuvula: " nga yi ngeye ndondo wutakuiza yevo tufete vingila wan'kaka e?" ²¹ Muntangu yina, Yesu waniakisa bidi dia bantu bankua yimbevo,ye zimpasi, ye mpeve za mbi, ye wamuesa zi mpofo zabidi. ²² Wavutula ye wabatela: " kiokio siluenda, luzayisa kua Yowani mana lumuene ye luwilu. Mpofo zitamona, m'vanguki mitadiata, bankua wazi bavedoso, bankua makutu mafua betawa, bafua betafutumuka, ye nsangu zambote zitasamunua kua bamputu. ²³ Bika kazitisua nduna kalemba mu kuikila mu mono mukuma kia mavanga mamu ko." ²⁴ Kiokio ntumua za Yowani zavutuka, Yesu wayantika vovela kua n'kangu mudiambu dia Yowani : " nki luayele tala kuna makanga e? Diadia dinikunu kua mupepe? ²⁵ Wana nki luayele tala: " muntu vuete yinkutu yambote? Kansi bana bavuete yinkutu ya ntalu ye bazingilanga mu kimvuama bena muna nzo za min'tinu. ²⁶ Wana nani luayele tala e? Mbikudi e? Ingeta, yilutele wo wuna lutila m'bikudi. ²⁷ Lutala ndondo wasonamana: " tala mfidisi va n'tuala aku ntumua amu ndondo kubika nzila aku." ²⁸ Yilutelele dio, vakati kua bana bawutua kua n'kento, kavena wanene lutila Yowani ko." Kiongolo, ndondo wasaka ke muna kimfumu kia Nzambi wun'lutidi nene." ²⁹ Kiokio n'kangu wawonso wakala ku n'gwua ye m'futisi mia mpaku nkutu, bavova vo Nzambi wuna walungungu, kadi babotokua mu mbotokolo ya Yowani. ³⁰ Kansi n'falisi ye mfumu za n'siku mia bayudayo batinguna nkubukulu a Nzambi mu diambu dia yawu kabavubua kua Yowani ko. ³¹ Wana ye nki ndenda fuanikisa bantu ba mbandu yiyi e? Ye nki benabafuanana e? ³² Benabafuanana ye bimbana mbana betasakana va fulu kia n'kangu, bavuande ye betayuvuasana yawu ye yawu, ye vova: " tuakulubudidi matutu, ye kaluakinini ko. Tuabongele nkunga wamafua, kansi kaluadididi ko." ³³ Kadi Yowani m'boteki wayiza, kadidingi dimpa ko, ye kanuiningi vinu ko, ye lutavova: " mpeve a mbi yina yani." ³⁴ Muana a muntu wizidi, wutadia, wutanua ye luta vova: " tala yani nkua kindiafu ye nduvu, n'kundi a m'futisi mia mpaku ye min'sumuki." ³⁵ Kansi nduenga zizayakene kua bana bani bawonso." ³⁶ Tala m'falisi mosi wam'bokela mu dia ye yani. Kiokio Yesu kakota muna nzo ya n'falisi ye kavuanda vana meza, ³⁷ kua yiza n'kento mosi wa mbanza yoyo wakala n'sumuki, kiokio kawa vo Yesu wakala muna nzo a m'falisi. Wanata bungua kia mazi ma nsunga ma Alibatele. ³⁸ Wuwu kina vo wakala kunima ani, va mbela malu mani, wayantika sukula malu mani mu mansanga, ye wakusuna mo mu nsuki zani, wafiba mo ye wakusa mo mazi ma nsunga. ³⁹ Kiokio m'falisi wabokela Yesu kamona wuna, wavova mu yani kibeni: " vo muntu ndondo kakala m'bikudi nga kafete zaya nani kena n'kento ndondo wutakun'simba, yevo wuna n'sumuki." ⁴⁰ Yesu wabaka mpova ye wan'tela : " Simoni, ngina ye diambu nzolele kutela." Wavutula: " n'longi, vova." ⁴¹ Yesu wavova: " muntu mosi wadika mfuka kua bantu bole. Mosi kafete kum 'futa nkama mosi ya denali, wan'kaka makumatanu. ⁴² Wuwu kina vo kabalenda futa mfuka zozo ko, wabayambudila, yawu a wole. Wana, nani mu yawu a wole sikatoma kun'zola e?" ⁴³ Simoni wavutula ye wavova: " mono mbezi nduna wayambudulua mfuka yayingi." Yesu wan'tela: " tomene zenga." ⁴⁴ Ye Yesu wabaluka kuakala n'kento, wavova kua Simoni: " muene n'kento ndundu, ngizidi kua ngeye, kuntiamunini maza mu malu mamu ko, kansi yani wunsukudi malu mu mansanga mani, ye kusuni mo mu nsuki zani. ⁴⁵ Kumfibidi ko, kansi yani tuka kakotele , kayambudi fiba malu mamu ko. ⁴⁶ Kukusidi mafuta ku n'tu amu ko, kansi yani kusidi mafuta mu malu mamu. ⁴⁷ Ikuma, yitelele wo, bidi kia masumu mani malemvokolo, kadi yani songele zola kuayingi. Kansi kua nduna yambudulu fioti, zolanga kua fioti. ⁴⁸ Bosi wan'tela : " masumu maku malemvokolo." ⁴⁹ Bana bakala vana meza ye yani bavova mu yawu mosi: " nani kena muntu ndundu wutalemvokela nate masumu e?" ⁵⁰ Kansi Yesu wavova kua n'kento: " minu kiaku kivuluzi, wenda mu luvuvamu."