¹ Kiongolo, Yesu wakala lutila muna zimpatu mu lumbu kia lumingu ye n'longoki miani miavela n'sesa mia m'butu mia ble, badia mio, kunima zokona mu moko mawu. ² Kansi m'falisi mia n'kaka bavova: " mudiambu dia nki lutavanagila momo kamena luve ko mu lumbu kia lumingu e?" ³ Yesu wabavutudila: " nga kaluatanga ko mana Davidi kavanga kina kamona nsatu, yani ye bana bakala yani e? ⁴ Yani wakota muna nzo a Nzambi, wabaka mampa ma n'kayilu, wadia mo ye wavana kua bantu bakala yani, mampa momo makondolo luve kua konso muntu mu dia, vo kabamfumu za nganga kaka ko e?" ⁵ Wabatela: " Muana a muntu wuna Mfumu a kia lumingu." ⁶ Lumbu kia n'kaka kia lumingu, Yesu wakota muna nzo ya lukutakanu ye walonga bantu. Muna muakala muntu mosi wakala ye koko kua lunene kua tila mianzi. ⁷ N'soniki ye m'falisi miakala tala ye landilanga Yesu ngatu sikaniakisa mu lumbu kia lumingu, mpasi babaka kuma kia kum'fudila mu mambi. ⁸ Kansi kina vo wazaya ngindu zawu, wavova kua muntu ndondo wakala ye koko kua tila mianzi: " telama ye wukitula vakati kua bantu bawonso." Mudina muntu ndondo watelama ye wakitula vana. ⁹ Yesu wabatela: " yiluyuvudi keti dina luve mu vanga mambote mu lumbu kia lumingu yevo mu vanga mambi, mu vukisa muela yevo mu vidisa wo e?" ¹⁰ Wazietesa meso mani kua yawu awonso, wavova kua muntu ndondo: " lambula koko kuaku." Wasala wo ye koko kuani kuaniaka. ¹¹ Bazalua kua nganzi, bakala nuanisa mabanza yawu ye yawu mu zaya nki balenda vanga kua Yesu. ¹² Mu lumbu kina, dialuaka vo Yesu watomboka kuna mongo mu kuenda sambila, ye walutisa mpimpa ya m'vimba mu sambila Nzambi. ¹³ Kiokio lumbu kia yantika, wabokela ban'longoki bani ye wabasola kumi ye zole, kua bobo kavana nkumbu ya ntumua. ¹⁴ Nkumbu za ntumua zakala: " Simoni, ndondo kavana nkumbu ya Petelo, Andele, mpangi ani, Yakobi, Jowani, Batolomayi, ¹⁵ Matayi, Toma, Yakobi muana a Alafayi, Simoni, ndondo bakala bokelela Zelote, ¹⁶ Yuda, muana a Yakobi ye Yuda Iskalioti, ndondo kuiza kituka n'yekodi a Yesu. ¹⁷ Bosi, Yesu wakulumuka yawu kuna mongo ye watelama vafulu kimosi kia vuanda. N'kangu wayingi wa n'longoki miani bakala vana, kintuadi ye n'kangu wayingi wabesi yudayo, Yelusalemi ye wa kuna simu dia m'bu wa Tile ye Sidoni. ¹⁸ Bayiza mu wa ye mu niakusua mu yimbevo yawu. Bana bamuesua kiadi kua mpeve zambi baniakusua mpe. ¹⁹ N'kangu wawonso wakala zola kun'simba, kadi lendo kimosi kiakala vayika mu yani ye kiakala kubaniakisa bawonso. ²⁰ Ikuma kiokio katombola meso kua n'logoki miani, Yesu wabatela: " mayangi kua yeno luna bamputu, kadi kimfumu kia mazulu kina kia yeno." ²¹ Mayangi kua yeno lutafua nsatu wuwu, siluayukuta. Mayangi kua yeno lutadila mu wuwu, siluaseva. ²² Kiese kua yeno kiokio bantu sibakulubela , kiokio sibakulutuba, sibakulufinga ye sibatuba nkumbu zeno bonso za bantu bambi, mu kuma kia Muana a muntu. ²³ Luyangalala mu lumbu kina ye ludumuzuka ye kiese, kadi tala, m'futu eno siwakala wanene kuna zulu. Kadi yi mpila yoyo n'kulu miawu bavanga kua mim'bikudi. ²⁴ Kansi kiadi kua yeno a mvuama! kadi luabakidi kala lufialusu lueno. ²⁵ Kiadi kua yeno luna luayukuta wuwu! kadi siluafua nsatu mu lumbu yikuiza. kiadi kua beno lutaseva wuwu! Kadi siluafuilua ye siluadila kuna n'tuala. ²⁶ Kiadi kua beno kiokio bantu bawonso bavovanga mambote mu beno! Kadi yimpila mosi n'kulu miawu miakala vanga kua m'bikudi mia luvunu. ²⁷ Kansi yilutelele kua beno luta kungua, luzola mbeni zeno, luvanga mambote kua bana bakulubelanga, ²⁸ Lusakumuna bana bakulusinganga, lusambidilanga bana bakuluvanganga mpasi. ²⁹ Vo muntu mosi wuzubidi mbata mu bundi dimosi, vana diaka dia n'kaka. Vo muntu katudi m'vuatu aku, kun'kakididi mpe ko mu baka mvuela aku. ³⁰ Vana kua konso muntu wulombele. Vo muntu bakidi kima kiaku vuidi, kulombi diaka kavutudila kio ko. ³¹ Konso dina luzolele baluvangila kua ban'kaka, luvanga dio mpe kua yawu. ³² Vo luzolanga kaka bana bakuluzolanga, nkia ndandu lubaka e? Kadi bankua masumu mpe bazolanga bana bakubazolanga. ³³ Vo luvanganga mambote kua bana bakulu vangilanga mo, nkia ndandu lubakila dio e? Kadi bankua masumu mpe bavangilanga wo. ³⁴ Vo ludevesanga kaka kua bana luna ye vuvu vo balenda kuluvutudila, nkia ndandu lubakila dio e? Kani nkutu nkua masumu badevesanga kua ankuamasumu ye bavingilanga diaka vutudulua ntalu mosi ye yina badevese. ³⁵ Kansi luzola n'tantu mieno, lubavangila mambote. Ludevesa kondua kua ketalala mu vutudulua, ye m'futu eno siwakala wanene. Siluakala bana ba nduna waluta zangama, kadi yani mosi wuna wambote kua bakondua kimuntu ye kua bantu bambi. ³⁶ Lukala bankua n'lemvo bonso Se dieto wuna nkua n'lemvo. ³⁷ Kalufundisi ko , ye kalufundusua mpe ko. Kaluzengela bantu n'kanu ko ye kaluzengelua mpe n'kanu ko. Lulemvokela ban'kaka ye silualemvokelua. ³⁸ Luvana kua ban'kaka, ye siluavewa. Yi tezo kia mbote (Kia toma niemua, nikunua, kia sumpuka) sibatiamuna mu nsuka za m'vuatu mieno. Kadi yi mu tezo kiokio lusadilanga kua ban'kaka sikiasadilua mpe mu beno." ³⁹ Wabatela mpe kingana: " nga mpofo lenda nate n'kua yani mpofo e? Vo sidi wo, bawu bole kababua mu wulu ko e? ⁴⁰ N'longoki kena va zulu a n'longi ani ko. Kansi konso n'longoki watoma longua sikafuanana ye n'longi ani. ⁴¹ Mudiambu dia nki wutatadila titi kina muna disu dia mpangi aku, ye lembolo mona muinga wuna muna disu diako e? ⁴² Neyi lenda vovela kua mpangi aku: " mpangi, vingila yakatula titi kina mu disu diaku" vo ngeye kuta mona muinga wuna muna diaku disu ko e? Nkua disu ku nsi a lukaya! Katula ntete muinga wuna muna diaku disu, bosi siwatala Neyi lenda katudila titi kina muna disu dia n'kuayaku. ⁴³ Kavena n'ti wambote wulenda wuta m'butu wambi ko, yevo n'ti wambi wulenda wuta m'butu wambote. ⁴⁴ Konso n'ti wuzayakananga mu m'butu wa yani kibeni. Kabavelanga mingiengie vana fulu kia nsende ko ye kabakolanga m'butu wa vinia va fulu kia nsende ko. ⁴⁵ Muntu a mbote, mu mvuilu ya mbote ya n'tima ani, vayikisanga mambote, ye muntu a mbi, mu mvuilu yambi ya n'tima ani vayikisanga mambi. Kadi yimazele mu n'tima nua kavovelanga. ⁴⁶ Mudiambu dia nki lukumbokelelanga: " Mfumu, mfumu" ye kaluvanganga mana yivovanga ko e? ⁴⁷ Konso muntu kuizanga kua mono, wanga mambu mamu, sadilanga mo, nzolele kulusonga yani fuanane ye nani. ⁴⁸ Yani fuanane ye mutu wutatunga nzo, tomene tima n'toto ye tungidi lufulu va tadi. Kiokio kizalu kia yiza ye nkuka yabua muna nzo yoyo, kayanikuka ko, kadi yatoma tungua. ⁴⁹ Kansi ndondo wanga mambu mamu ye lembi mo sadilanga, yani fuanane ye nduna tungidi nzo ani va n'toto, kodua kua tunga lufulu. Kiokio nkuka yabua mu yawu, ye vanavawu yabua ye yatoma fua kibeni."