¹ Valuaka fintangu kunima nzietolo a Yesu Klisto muna zimbanza ye mavata, wakalalongela ye samuna nsangu za mbote za kimfumu kia Nzambi. ² Kumi ye zole diakala yani ye mpe bakento bana bakulua mpeve zambi ye yimbevo: Maliya, ndondo babokelelanga Mandelani, ndondo wavayikua nsambuadia ya mpeve zambi, ³ Zuani, n'kento a Kuza n'kebi a bima bia Elode, Suzana ye bidi dia bakento basadidingi mu kuma kia nsatu zawu mu bima biawu. ⁴ Muntangu n'kangu wabidi wakalakutakana kua yani, bantu bambanza za mpila mu mpila bakala kuiza kua yani, wabatela ngana yimosi: ⁵ "N'kuni mosi wavayika mpasi kenda kuni. Muntangu kakalakuna, ndambu yanginga zabua mu mbela a nzila, yadiatukusua ye nuni za mazulu zadia yo yakulu. ⁶ Ndambu ya n'kaka yabua va matadi ye muntangu yamena, yayuma mudiambu dia kondua kua nzizi ⁷ Ndambu ya n'kaka yabua va nsende, nsenda zamena vakimosi yawu, ye zafietakesa yo. ⁸ Kansi ndambu ya n'kaka ya nginga yabua va n'toto wambote ye yawuta m'butu, nkama nkama. Kunima yamana vova momo, Yesu waboka mu ndinga ya ngolo: " Bika ndondo wuna makutu mu wa, kawa!" ⁹ Yidina, n'longoki miani mian'yiuvula nsansa ya ngana yoyo. ¹⁰ wabatela: " kua beno luavewa mu zaya masuekama ma kimfumu kia Nzambi, kansi kua ban'kaka , mu yi mungana mpasi vo kana beta tala, kabamoni kima ko yevo kiokio betawa kababakusi kima ko. ¹¹ Tala nsasa ya ngana yoyo: nginga yi mambu ma Nzambi. ¹² Yina yibuidi va mbela a nzila, yi bobo bawanga mambu ma Nzambi, bosi diabulu wizidi ye katudi mo mu n'tima miawu, mpasi vo kabakuikidi ye kabavuluki ko. ¹³ Bosi, yoyo yibuidi vana matadi, yi bobo batambulanga mambu ma Nzambi mu kiese, muntangu beta mo wa, kansi kabena ye mianzi ko; bakuikilanga mu fintangu ntangu, kansi muntangu ya ntontolo, babuanga. ¹⁴ Yoyo yibuidi vakati kua nsende, yi bobo bawanga mambu ma Nzambi ye mu luzingu luawu bafietakesuanga kua mabanza, kimvuama ye kua kiese kia nza ye m'butu miawu kamiyelanga ko. ¹⁵ Kansi yina yibuidi mu n'toto wambote, yibawu bawanga mambu ma Nzambi mu n'tima wantalu ye wambote, batoma mo simbininanga ye bawutanga m'butu mu ntatamanu. ¹⁶ Tala, kamuntu ko kuikanga muinda mpasi kafika wo ku nsi a kinzu yevo katula wo ku nsi a mfulu. Kansi tulanga wo va zulu a kima, mpasi vo bana bakotanga bamona n'temo. ¹⁷ Kadi kavena diasuama dilembi zayakana ko, kavena diansueki dia kondua vayikisua ye moneka va ntenda nkongolo ko. ¹⁸ Lutoma wa kibeni, kadi sibavana lutila kua ndondo wuna ye kima, kansi kua ndondo kondolo kio, kani nkutu kina keta banza vo kavuidi, sikiakatulua. ¹⁹ Bosi, ngudi ani ye mpangi zani bayiza kua yani, kansi kabalenda wawana yani ko, mudiambu dia n'kangu. ²⁰ Ban'tela: " Ngudi aku ye mpangi zaku batelamene ku nganda, bazolele kumona." ²¹ Yesu wabavutudila: " Ngudi amu ye mpangi zamu yi baba bawanga mambu ma Nzambi ye basadilanga mo." ²² Tala, lumbu kimosi, Yesu wakota mu n'lungu kintuadi ye n'longoki miani, wabatela: " tuluta kuna simu dia n'kaka dia zanga." Bayantika kuenda muna maza; ²³ Mu ntangu bakalakuenda muna maza, Yesu waleka. Mupepe wa ngolo wabua muna zanga ye n'lungu wazala kua maza ye bakala kibeni mu vonza kia nene. ²⁴ Yidina n'longoki mia Yesu miafinama kua yani ye mian'sikamesa ye bantela: " N'longi! N'longi! situfua! Wasikama, wanuanisa mupepe ye nganzi za maza zalembama ye luvuvamu luakota. ²⁵ Bosi wabatela: " Kue kuna minu kieno e?" Bazalua kua wonga ye ngitukulu, bakalavova yawu ye yawu: " wana nani kena ndundu, wutatumina kana nkutu mupepe ye maza ye biawonso biatakun'tumamana e?" ²⁶ Baluaka ku ndambu ya n'kaka ya nsi ya Ngelasana yina kuna simu dia n'kaka dia Ngalili. ²⁷ Mu ntangu kakulumuka mu n'lungu, muntu mosi mu mbanza wakala ye mpeve zambi wayiza wawana yani. Tuka ntama, kavuetenge diaka min'lele ko ye kakelenge mu nzo ko, kansi kuna ziami. ²⁸ Mu ntangu kamona Yesu, wakaya, wabua va n'tuala ani. Mu ndinga ya ngolo wavova: " nkia diambu va kati kua mono ye ngeye Yesu, muana Nzambi watoma zangama e? Yitakudodokela, kuntokanesa ko." ²⁹ Kadi Yesu watuma kua mpeve a mbi kavayika muna muntu ndondo kadi ntangu zayingi yam'vuatanga. Kanele vo wakala wakangama mu n'singa mia sengo ye walangidiluanga, wakala zenga n'singa mia sengo ye wakala natua kua mpeve a mbi kuna makanga. ³⁰ Bosi Yesu wan'gyiuvula: " nani nkumbu aku e?" ye wavutula: " lengio" kadi mpeve zabidi zakota mu yani. ³¹ Ye wan'dodokela kabavani luve lua kuenda kuna foloni kia tiya ko. ³² Tala, vana ndambu vakala mpe ye buka kia nene kia ngulu kiakala dia kuna mongo. Mpeve zambi zan'dodokela kabavana luve bakota muna ngulu zina. Ye wabavana luve. ³³ Ikuma, mpeve zambi zavayika mu muntu ye zakota mu ngulu, ye buka kiazawula tuka kuna zulu dia mongo nate muna zanga ye zafua muna maza. ³⁴ Mu ntangu n'kengi a buka kia ngulu miamona mana mavioka, balemoka ye banata nsangu muna mbanza ye muna mavata. ³⁵ Ikuma, n'kangu wavayika mutala mana mavioka. Ye muntangu baluaka kua Yesu ye bawana wavuanda vana malu mani muntu ndondo wavayikua kua mpeve zambi, wavuata ye mu mbakusulu a mbote, babakama kua wonga. ³⁶ Ikuma, bana bamona momo mavioka, batela kua ban'kaka neyi muntu ndondo wavuatua kua mpeve zambi kaniakini. ³⁷ N'kangu wakulu wa ziunga kia besi Ngelasana walomba kua Yesu kenda kua nda ye bawu, kadi wonga wanene wababuila. Ikuma, wakota muna n'lungu ye wavutuka. ³⁸ Muntu ndondo wavayikua kua mpeve zambi wan'lomba kam'vana luve mu kuenda yani. Kansi Yesu wam'vutula ye wavova: ³⁹ " vutuka kuna nzo aku ye vova mambu makulu manene momo Nzambi kavangidi mu ngeye." Muntu wavutuka ye wavova muna mbanza yakulu mana Yesu kavanga mu yani. ⁴⁰ Tala,kioko Yesu kavutuka, n'kangu wan'tambula, kadi bakala kum'vingila. ⁴¹ Tala, muntu mosi wa nkumbu ya Yayilo waluaka; wakala mosi mu mfumu za nzo zalukutakanu. Wabua va malu ma Yesu ye wan'dodokela kenda kua yani, ⁴² mu diambu dia muana ani mosi kaka wa n'kento, watezo kia mvula kumi ye zole wakala ye mpasi za lufua. Muntangu Yesu kakala kuenda kuna, n'kangu wakala kun'fietakesa. ⁴³ Kiongolo, vana kati kua n'kangu vakala ye muana n'kento wakala yela kimbevo kia vayikua menga tuka mvula kumi ye zole, wabebesa mbongo zani zakulu kua madokotolo, kansi ka mosi ko walenda kunniakisa. ⁴⁴ Wafinama kunima ya Yesu ye wasimba nsongi yam'vuatu ani, ye vana vawu vayikua kuani kua menga kuamasisa. ⁴⁵ Yesu wavova: " nani wunsimbidi e?" Wukina vo bawonso bavakula n'kalu, Petelo wan'tela: " N'longi, n'kangu wutakufietakesa ye kuniema. ⁴⁶ " Kansi Yesu wavutula : " muntu wunsimbidi ye ntomene mona vo ngolo zivayikidi mu mono." ⁴⁷ Kiokio muana n'kento kamona vo kalendi kisueka ko, wavayika ye zakamu wakituba vana n'tuala ani. Watambudila vana n'tuala n'kangu wawonso, mu nkia bila kan'simbila ye mpila kimbevo kiani kianiakina vana nawu. ⁴⁸ Ikuma, Yesu wan'tela:" muana amu a n'kento, minu kiaku kivuluzi, wenda mu luvuvamu." ⁴⁹ Muntangu kakala vova, muntu waluaka watuka kua mfumu ya nzo a lukutakanu ye wavova edi: " muana aku a n'kento fuidi. kutokanesi diaka n'longi ko. ⁵⁰ " Kansi Yesu wawa wo, wam'vutudila: " kukadi ye wonga ko, kuikila kaka sikavuluzua." ⁵¹ Bosi, kiokio kaluaka kuna nzo, kavana n'sua kua muntu ko mu kota. Vo ka Petelo, Yowani, Yakobo, ye Se ye ngudi a muana kaka ko. ⁵² Tala, yawu awonso bakala dilanga ye yawula mu diambu dia muana. Kansi wavova: " Kaludidi ko, kena wafua ko, wuna waleka." ⁵³ " Kansi, ban'seva kadi bazaya vo wafua kena. ⁵⁴ Kansi Yesu wasimba koko kua muana ye wam'bokela mu ndinga ya ngolo: " muna amu sikama!" ⁵⁵ Mpeve ani yavutuka mu yani ye watelama vana vawu. Yesu wavana n'sua bam'vana madia. ⁵⁶ Se ye ngudi ani basivika kansi Yesu wabakanikina mu lembi vova kua muntu , mana maluta.