¹ Ikuma vo luna luafutumuka ye Klisto, lusosa bima bia kuzulu, kuna Klisto wuna wavuanda kuna lubakala lua Nzambi. ² Luzola bima bia kuzulu, kabina bina va n'toto ko. ³ Kadi luna bafua ye moyo eno wuna wasuekama ye Klisto mu Nzambi. ⁴ Kiokio Klisto, moyo eno, sikamoneka, wana siluamoneka mpe ye yani muna n'kembo. ⁵ Wana luvonda ndambu zanitu zina va n'toto: Zumba, kondua kua velela, nzinunu zambi, ye n'zolo a mbongo wasaka, wuna sambundulu a biteke. ⁶ Yi mukuma kia bima biobio nganzi za Nzambi zikuizilanga kua bana ban'kolami, ⁷ vakati kua bobo luakala diata yawu muna ntama, kiokio luakala zingila muna masumu momo. ⁸ Kansi mu wuwu, luloza mawonso momo, nganzi, mabanza mambi, kimuntu kiambi, vunina muntu mambu, mpova zakondua sungama zilenda vayika muna nua aku. ⁹ Kaluvunasani yeno ye yeno ko, kina vo luavula muntu wantama ye mavanga mani, ¹⁰ ye kina vo luavuata muntu wa mpa, ndondo sobanga, muna nzayilu, landila fuani kia nduna wam'vanga. ¹¹ Vava kavena kana Ngeleki, kana n'yudayo, kana wawukua kiyakala, kana walembi wukua kiyakala, kana bankua mbalu, kana musi skite, kana nanga, kana nkua kimpuanza ko, kansi Klisto wuna mawonso ye mu bawonso. ¹² Wana ikuma, bonso basolua ba Nzambi, ban'longo ye batoma zolakana, luvuata n'tima wa nkenda, wa mambote, wa kikulula, wa wulembami, wa mvibudulu. ¹³ Luvibidila yeno ye yeno, ye vo mosi wuna ye ngiawula kua wan'kaka, lulemvokela yeno ye yeno. Mpila mosi Klisto kalulemvokela, yeno mpe lulemvokela. ¹⁴ Mu biawonso biobio, luvuata zola kuna nzila yaluakila ku lunga. ¹⁵ Ye bika luvuvamu lua Klisto mu lolo luabokololua mu vanga nitu yimosi, luayala muna n'tima mieno. Ye lukala ye kimuntu. ¹⁶ Bika mpova ya Klisto yavuanda yayingi vati kueno; lulongana ye lusiamazana yeno yeno mu nduenga yawonso, mu minkunga, mu n'kunga mia nzitusu, mu min'kunga mia kimpeve, luyimbila kua Nzambi mu n'tima mieno mu ntambudulu a n'lemvo. ¹⁷ Ye konso dina luvanga, mu mpova yevo mu mavanga, luvanga mawonso muna nkumbu ya Mfumu Yesu, mu vana nzila ani matondo kua Nzambi Se. ¹⁸ Bakento, lutumamananga mayakala meno, bonso diafuanakana mu Mfumu. ¹⁹ Mayakala, luzolanga bakento beno, ye kalu bafuemenanga ko. ²⁰ Bana, lutumamananga mase ye ngundi zeno mu mawonso, kadi diodio dina diambote mu Mfumu. ²¹ Mase, kalufuemesanga bana beno ko mapsi vo kabayoyi ko. ²² N'sadi, lutumamananga mfumu zeno mu mawonso mu kin'suni, ka va meso mawu kaka ko, bonso mu yangidika bantu, kansi mu kikulula kua n'tima, muna vumi wa Nzambi. ²³ Mawonso luvanga, luvanganga mo mu n'tima wambote, bonso kua Mfumu, kansi ka kua bantu ko, ²⁴ ye luzaya vo siluatambula kua Mfumu fua bonso m'futu. Lusadilanga Klisto Mfumu. ²⁵ Kadi nduna salanga kondua kua songa sikatambula landila kondua kua songa kuani, ye ka kuna n'talu a zizi kua muntu ko.