¹ Mfumu, luvananga kua n'sadi mieno kina kina kialunga ye kiafuanakana, luzayanga vo beno mpe luna ye Mfumu muna mazulu. ² Lutatamana muna sambu, luvangilanga dio mu mvutudulu a matondo. ³ Mu ntangu yoyo kaka lutusambila mpe, mpasi vo Nzambi katuzibudila kielo mukuma kia mambu ma Nzambi, mpasi vo yalonga masuekamu ma Klisto, mu momo nginina yakangama mu nzinga mia sengo, ⁴ ye zayikisa dio bonso mfete dio vovela. ⁵ Ludiatilanga mu nduenga kua bobo bena kuna nganda, ye lunuaninanga ntangu. ⁶ Bika m'vovo eno wanatanga n'lemvo, watulua mungua, mpasi luazaya neyi lufete vaninanga mvutu kua konso muntu. ⁷ Tikiko, mpangi ya n'zolua ye n'sadi wakuikama, mpangi amu ya kisalu muna Mfumu, sikalutela mawonso ma ntadidi. ⁸ Yim'fididi mu luzolo kua beno, mpasi vo luazaya n'samu eto, ye mpasi kafiawudisa n'tima mieno. ⁹ Yim'fidisi ye Onesimo, mpangi yakuikama ye ya n'zolua, ndondo wuna wayeno. Sibalutela mawonso meta luta kuku. ¹⁰ Alisitalako, mpangi amu muna kinanga, wuluvene mbote, ye Malako mpangi a kise ya Balanaba ndondo luabakila zintumunu ( vo wuluzietele, lun'tambula); ¹¹ yesu, bokololuanga lunungu, wuluvene mpe mbote. Bena vakati kua bawukua kiyakala, ye wuna wumosi kaka wasala yamu mukuma kia kimfumu kia Nzambi, ye bakala kua mono lufiawulusu. ¹² Epafala, ndondo wuna weno, wuluvene mbote: n'sadi a Yesu Klisto, keta yoya nuana mu sambu biani mukuma kieno ko, mpasi vo, luanunga ye luatoma kuikila, luatatamana muna ntumamanu yawonso kua luzolo lua Nzambi. ¹³ Kadi ngita kun'telekela kimbangi vo wuna ye nsatu eno kibeni, ya bana bena kuna Laodikia, ye ya bana bena kuna Yelapoli. ¹⁴ Luka, dokotolo dia n'zolua, wuluvene mbote, mpila mosi ye Dema. ¹⁵ Luvana mbote kua mpangi zina kuna Laodikia, kua Nifa ye kua bundu dina muna nzo ani. ¹⁶ Kiokio n'kanda wuwu siwatangua kuna kua yeno, lusala ngolo mpe watangua muna Dibundu dia besi Laodikia, ye lutanga mu ntangu eno mpe wuna siwatuka kuna Laodikia. ¹⁷ Ye lutela kua Alakipo: " Wukikeba mukuma kia salu watambula mu Mfumu, mpasi watoma kio sala." ¹⁸ Yiluvene mbote, mono Paulu, mu koko kua mono kibeni. Lubambukila moyo mu n'singa mia sengo mimi ngina yakangama. Bika n'lemvo wakala yeno!