¹ Mu matadidi salu kia lusadusu lua ban'longo, kadina diaka m'funu kua mono mu kulusonekena ko ² Kadi, nzeye luzolo lueno luambote lolo ngita kisanisina va n'tuala a besi Makedonia, yabatelele vo Akayi yina yakubama tuka m'vu wu viokele ye yivema kueno kuvene fisidi bawonso mu bawu mu vangila wo. ³ Yafididi nkutu zimpangi mpasi vo lukumu tualuvene kalukadi lua mpamba ko ye mpe luakala luakubama, bonso yavovela dio kala. ⁴ Vo kawuna ko, sidiakala dia nsoni kua yeto, vo mu nduaka amu ye zimpangi za besi Makedonia (kitavova diambu mukuma kieno ko) kaluna luakubama ko. ⁵ Mudiodio yamuene dio dia m'funu mu kulufidisa zimpangi zakulusadisa mu kubika n'kayilu miomio luasila; mpasi vo n'kayilu miomio miakala mia kubama, mu kimpuanza kiawonso ye kondua kua kulutatamesa. ⁶ Luzaya dio: nduna kunanga fiafioti, salanga mpe fiafioti, ye nduna kunanga biabidi salanga mpe biabidi. ⁷ Bika muntu muntu kavana bonso kazengele dio muna n'tima ani. Bika konso muntu kavana kondua kua ketalala ye tatamesua. Kadi Nzabi zolanga nduna vananga mu kiese. ⁸ Ye Nzambi sikaluzadisa ye tusakumunu tuani tuawonso, mpasi vo mu mawonso, luakalanga ntangu zawonso ye mvuilu ya yingi mu sala mambu ma mbote. ⁹ Bonso diasonama: " Wakabula mvuilu zani kua bamputu." Lunungu luani lutatamananga ntangu zawonso. ¹⁰ Nduna vananga mvuza kua n'kuni, ye dimpa mudiambu dia madia mani, sikaluvana ye funisa mvuza. Sikakudika m'butu mia ndungunu eno. ¹¹ Sikaluwutanesa mu mpila zawonso mpasi vo luakula mu wete weno, ye mpasi vo babidi bavutula matondo kua Nzambi. ¹² Kadi salu kiki kakisadisanga kaka minkuikizi ko. Kina mpe nto ya kiese ye kia mvutudulu a matondo Kua Nzambi. ¹³ Kiokio lutatondua kua bawonso, wowo siluasanisina Nzambi mu ntumameno eno mu nsangu zambote za Klisto. Siluakembesa mpe Nzambi mu mavanga mambote ma n'kayilu mieno mu bawu ye mu konso muntu. ¹⁴ Mudiambu dia zola kuawu kua nene mu yeno, bakulusambidilanga. Bavanganga wo mukuma kia n'lemvo a Nzambi wuna wabidi mu yeno. ¹⁵ Bika matondo mavewa kua Nzambi mukuma kia n'kayilu ani wulembi vovakana.