¹ Tuzolele kuluzayisa, luzimpangi, muna matadidi n'lemvo a Nzambi wamoneka mu dibundu dia Makedonia. ² Mu ntangu ya mpasi za ntontolo awu ya ngolo, kiese kiawu kiasumpuka ye kimputu kiawu kiasaka yanata wete kua yingi. ³ Nginina dio mbangi, kadi bavana bonso wakala ndendolo awu yawonso, ye lutila nkutu mbakulu awu. Ye mu luzolo lua yawu kibeni, ⁴ mu dodokela kuayingi, batulomba mu kubavana luve luakala mpe n'sadi mu kisalu kia minkuikizi. ⁵ Didi kadiavangama bonso tuayindudila dio ko, kansi, bakivana ntete yawu kibeni kua Mfumu, bosi kua yeto mu luzolo lua Nzambi. ⁶ Yidina, tualomba kua Tito kalulungisila salu kiki kia zola bonso kayantikila kio. ⁷ Kansi bonso lulutilanga sala mu mawonso - mu minu, mu mpova, mu nzayilu, mu n'sualu wawonso, ye mu zola kueno mu yeto, luzola mpe lualutasala mu kisalu kiki kia zola. ⁸ Kayina ntumunu ko ngita kuluvana. Kansi, ngita vova momo mu zaya kieleka kia zola kueno mu tezanesa mu n'sualu ye luzolo lua ban'kaka. ⁹ Mu diodio, luzeye n'lemvo wa Mfumu eto Yesu Klisto. Kana vo wakala mvuama, wakikitula mputu mu kuma kieno mpasi vo mu kimputu kiani luakituka zi mvuama. ¹⁰ Mu n'samu wowo, siyakuluvana malongi mu kulusadisa. Ku nima m'vu mosi, kaluanunga mu sala kaka salu kimosi ko Kansi luakadila dio ye luzolo lua sala kio. ¹¹ Lumanisa kio wuwu. Mpasi vo luakala diaka ye luzolo lua mbote ye nsatu a sala kio, yeno mpe luiza ku ndungusunu wuwu kina vo luna luafuana. ¹² vo luna ye luzolo luavanga salu kiokio, dina diambu diambote ye dilenda zolakana. Kifete vangamana mu kiokio muntu kavuidi kansi ka mu kiokio kalembolo vua ko. ¹³ Kadi mbebe yoyo kayina mu yangidika ban'kaka ko ye kulutuika zitu, kansi mpasi luafuanana. ¹⁴ Mbakulu eno yalutila ya ntangu yiyi yilenda kubasadisa mu nsatu zawu. Mpila mosi, mpasi vo kondua kua nzayilu awu yakulusadisa mu nsatu zeno ye luafuanana. ¹⁵ Bonso masonukua : " ndondo wakala ye biabidi kakala ye bialutakana ko; ndondo wakala ye bia fioti kakondua kima ko." ¹⁶ Nzitusu yavewa kua Nzambi watudidi muna n'tima Tito luzolo luambote luna yamu mu yeno. ¹⁷ Kadi katambudila kaka ndombolo eto ko, kansi wakala diaka ye vema kua ngolo mu lungisa yo. Wayiza kua yeno mu luzolo lua yani mosi. ¹⁸ Tuan'fila kintuadi ye mpangi yoyo mabundu mawonso matondanga kisalu kiani kialongela nsangu zambote. ¹⁹ Diaka, wasolua mpe kua mabundu mawonso mu sala nzietolo ye yeto mu lungisa salu kiki kiavanga mambote. Didi mu kuma kia nzitusu a Mfumu yani kibeni, ye luzolo lueto mu sadisa. ²⁰ Katuzolele ko vo muntu katusungula mu diodio ditadidi n'kayilu mia nkenda tutakutakesa. ²¹ Tutasosa mu vanga momo mena ma luzitu, ka va n'tuala a Mfumu kaka ko, kansi mpe va n'tuala a bantu. ²² Tutafila mpe mpangi ya n'kaka kintuadi ye yawu. Tuam'fimpidi ntangu yayingi ye tuammuene wuna ye vema mu salu ya bidi. Ye wuwu, wuna diaka ye mpuila ya yingi mu diambu dia vuvu kia nene kina yandi mu yeno. ²³ Vo yi Tito, wuna n'sadi ye mono ye diatanga yamu mu kisalu mu kuma kieno. Mu n'samu wa mpangi zeto, bafidusu kua mabundu. Bena nzitusu mu Klisto. ²⁴ Mu dina, lubasonga zola kueno ye lusonga kua mabundu m'funu wa kiese kieto mu yeno.