¹ Ban'zolua, wuwu kina vo tuna ye n'silu miomio, tukivelelesa mu mawonso masumumanga nitu eto ye mpeve eto. Tutatamana kala ban'longo muna vumi wa Nzambi. ² Lutusosela fulu! Katuasadidi mbi kua muntu ko. Katualuekele muntu ko yevo baka ndandu mu konso muntu nkutu ko. ³ Ka mu diambu dia kuluyelesa ko, mpovele dio. Kadi yavovele kala vo luna ye fulu mu n'tima mieto; mpasi tuazinga yevo tuafua kintuadi. ⁴ Ngina ye vuvu kiafuana mu yeno ye ngina wa ntoko mu yeno. Ngina ye Kiese kiasumpuka kani muna mpasi zeto zawonso. ⁵ Kiokio tuakuma kuna Makedonia, nitu zeto kazabaka kana mvundulu ko. Kansi tuakuamusua mu mpila zawonso kua yitantu ya ku nganda ye wonga muna kati. ⁶ Kansi Nzambi siamisanga bawo bayoya watusiamisi mu ngizulu a Tito. ⁷ Ka mu ngizulu ani kaka ko Nzambi katusiamisini. Ye mu nsiamusunu mpe Tito katambula kua yeno. Watuvovela nzola eno ya nene, Kingongo kieno muna n'tima ye ndandu eno ya yingi muna mono. Dina yatoma dio muena kiese. ⁸ Kanele vo n'kanda amu waluvana kiadi, kianiongene ko. Kansi nkutu ya niongene dio kaka kiokio yamuene vo wakuluvene kiadi. Kansi luakendalele mu fintangu-ntangu. ⁹ Wuwu, ngina ye kiese ka mu diambu dia luakele mu kiadi ko, kansi mu diambu dia kiadi kieno kiwutidi mvilukulu mu yeno. Beno luasongele kingongo kia n'tima kia n'longo, dina, kaluabakidi m'fuilu mu diambu dieto ko. ¹⁰ Kadi Kingongo kia n'tima kia n'longo kinatanga mvilukulu yinatanga kuna mpulusu kondua kua nionga. kansitu, kingongo kia n'tima kia nza kinatanga lufua. ¹¹ Lutala nkia nzengolo ya ngolo kingongo kia n'tima kiokio kiwutidi mu yeno. Neyi nzengolo eno yakadidi ya nene mu songa vo luakele kondua kua diambu. Neyi mfitakani a n'tima eno ya kadila ya nene, wonga weno, vuina dieno, vema kueno ye nsatu zeno zamona vo lunungu luavangama! Muna mawonso, luasonga yeno kibeni vo luakala kondua kua diambu mu n'samu wowo. ¹² Kanekele vo yalusonekena, kiasonekene mu kuma kia ndondo wavanga mbi ko, kani mu diambu dia ndondo wamona mpasi mu diambu dia mbi ko. Yasonekene mpasi vo kimuntu kieno mu diambu dieto kiamonekesua va n'tuala a Nzambi. ¹³ Yidina tuasiamusu. Ye diaka, mu lusiamusu lua beto kibeni, tutatoma yangalala diaka mu diambu dia kiese kia Tito, kadi mpeve ani yasiamusua kua beno bawonso. ¹⁴ Kadi vo yakisanisini mu yeno, kia fusunu nsoni ko. Kansi, mpila mosi mawonso tualuzayisa mena ma kieleka, kisana kieto mu yeno kua Tito kina kia ludi. ¹⁵ Nzola ani mu yeno yilutidi diaka nene, kiokio ketabambuka moyo mu tumama kueno ye neyi luan'kikila mu vumi ye zakamu. ¹⁶ Ngina ye kiese kadi ngina vuvu beni mu yeno.