¹ Wuwu kina vo tutasala kintuadi, tulombele vo kalubaki n'lemvo wa Nzambi mu nkatu ko. ² Kadi yani wavova: " kiokio ntangu yafuana, yatoma kuwa, ye mu lumbu kia mpulusu, yakusadisa." Tala, wuwu ntangu yifuene, tala lumbu kia mpulusu yi kiki. ³ Katutudidi tadi dia n'teso a sakuba va n'tuala wa kana mosi mu beno ko. Kadi katuzolele ko vo salu kieto kiavuezua. ⁴ Kansi nkutu, mu konso diambu, tuasadidi bonso sadi ya Nzambi ya kieleka, muna siamina, muna kingongo kia n'tima, muna kiadi, muna ntontolo, muna nkubua, ⁵ muna nkotolo a maboloko, muna mvualagani, muna salu ya ngolo, muna mpimpa za kodua tulu, muna nzala, ⁶ muna kin'longo, muna nzayilu, muna mvibudulu, muna ngemba, muna Mpeve a N'longo, muna zola kua kieleka. ⁷ Tuna sadi yani mu m'vovo wa kieleka, mu lendo kia Nzambi, luna ye nuanunu ya lunungu mu koko kua lunene ye kua lumonso. ⁸ Tutasala mu luzitu ye mu mvuezolo, muna vuninua mambu ye muna sanisinua. Tufunduanga vo tubankua luvunu, kiongolo tuna bankua ludi. ⁹ Tutasala bonso tulembolo zayua, kansi tutomene zayakana; bonso bafua kansi tuna moyo; bonso tuatumbua mu kuma kia mavanga meto kansi kondua baka tumbu kia lufua. ¹⁰ Tusalanga bonso bankua kiadi kansi ntangu zawonso tuna mu kiese; bonso bamputu kansi tukumisanga babidi zimvuama; bonso tukondolo kima kansi tuvuidi biawonso. ¹¹ Besi Kolinto, tuakulutela kieleka kiawonso, ye n'tima eto wuna watoma zibuka kua yeno. ¹² Kayeto ko tuakanga n'tima mieno, kansi yeno mosi luakikanga mu nsatu za yeno mosi za kin'suni. ¹³ Wuwu, mu mbokasani ya yeto ye yeto (ngita vova bonso kua bana bafioti) lutoma zibula n'tima mieno. ¹⁴ Kalukivuki ye balembi kuikila ko. Kadi, nkia mvukasani yina va kati kua ndungunu ye kondua kua ndungunu? Ye nkia kintuadi kina va kati kua n'temo ye tombe? ¹⁵ Nkia nguizani Kisto kalenda kala yawu ye beliali e? ¹⁶ Ye nkia kintuadi kina va kati kua ndondo wakuikila ye ndondo wa lembi kuikuila e? Nkia nguisani yina va kati kua nzo a Nzambi ye teke? Kadi tuna kin'longo kia Nzambi a moyo, bonso Nzambi kavova: siyakala va kati kuawu, ye siyadiata ye yawu; siyakala Nzambi awu, ye sibakala n'kangu amu." ¹⁷ Yidina: " luvayika va kati kuawu, ye luvambana ",wutele Nzambi. " kalusimbi nkutu kani kima kia sumuka ko, ye siyalutambula. ¹⁸ Siyakala Se kua yeno ye siluakala bana bamu bamayakala ye babakento"; wuvovele Mfumu mpungu tulendo.