¹ Tuzeye vo, vo vuandulu kieto kia vava n'toto muna tuzingilanga vo kifuasulu, tuna ye nzo a Nzambi. Yina nzo kayatungua mu moko ma bantu ko, kansi yina vuandulu kia m'vu ya m'vu kuna zulu. ² Kadi muna nzo yoyo ya makuba, tukunganga , tufuanga nsatu kibeni ya vuikua kua vundulu kieto kia kuna zulu. ³ Tuzolanga yo, kadi vo tuvuete yo, katukala kimuasi ko. ⁴ Kadi mu ludi, wuwu tuna mu nzo yiyi ya makuba, tukunganga, tuazala kua mpasi. Katuzolele kala kimuasi ko. Kansi nkutu, tuzolele tuakala tuavuata, mpasi vo kina kifuanga kiaminua kua moyo. ⁵ Ndondo kutukubikanga mu mambu momo mawonso yi Nzambi, kutuvananga mpeve bonso n'silu wa mana ma kuiza kuna n'tuala. ⁶ Yidiodio, lukalanga ntangu zawonso ye vuvu ye lukalanga ye mbakusulu vo kiokio tutazinga mu nitu yiyi tuna kuanda ye Mfumu. ⁷ Kadi, tudiatanga mu minu kansi ka mu mona meso ko. ⁸ Ikuma, tuna ye vuvu. Tulutidi zola kala kua nda ye nitu yiyi ye zinga kintuadi ye Mfumu. ⁹ Yi mu diodio tukitudi dio kuma kieto, vo tuakala mu nitu yiyi, yevo kua n'kaka, mu kun'giangidika. ¹⁰ Kadi beto bawonso situakala vana n'tuala a kiandu kia mfundusu ya Klisto, mpasi vo muntu-muntu katambula mana mavangama muna nitu, kana mambote yevo mambi. ¹¹ Ikuma, wukina vo tuzeye vumi wa Mfumu, tutavisikisa bantu. Wuwu tuna wutoma monekanga kua Nzambi, ye nsidi vuvu vo muna kansansa yeno mpe dina dia kia. ¹² Katutateza kuluvisikisa mpe diaka ko vo luatumona bonso tuna bankua ludi. kansi tuta kuluvana mpuasika ya kulu yangidika mukuma kieto, mpasi luabaka mvutu mu bobo bakitundidikanga muna matadidi mbonokono, kansi ka mu diodio dina muna n'tima ko. ¹³ Ikuma, vo tuna tuakondua ngangu, yi mukuma kia Nzambi; ye vo tuna ye mabanza mambote, yi mukuma kieno. ¹⁴ Kadi nzola ya Klisto yikututumanga kadi tuna ye vuvu mu diodio: vo muntu mosi wafua mu kuma kia bawono, ye mu diodio, bawonso bafua. ¹⁵ Ye Klisto wafua mu kuma kia bawonso, wana ikuma bana bena moyo kabalendi zinga diaka mu kuma kia yawu mosi ko, kansi nkutu mu kuma kia ndondo wafua ye wafutumuka. ¹⁶ Mu kuma kiokio, tuka wuwu, katutafundisa muntu mu kin'suni ko, kana wuna kina vo mu ntama tuamona Klisto mu mpila yina. Kansi, wuwu katutafundisa muntu mu mpila yina ko. ¹⁷ Wana, vo muntu wuna mu Klisto, wuna vangua kia mpa. Bima biantama biviokele; tala, bikitukidi bia mpa. ¹⁸ Mawonso momo matukanga kua Nzambi, watuwawanesa ye yani kibeni mu Klisto, ye watuvana salu kiawizanesa. ¹⁹ Disongele vo, muna Klisto, Nzambi wutawizanesa nza ye yani kibeni, ketatala diaka masumu mambi ya yawu kibeni ko. Yani watuvana mambu ma guizanesa. ²⁰ Ikuma, tuasolua bonso ntumua za Klisto, bonso vo Nzambi wutabokela mu nzila eto. Tuludodokele mu nzola ya Klisto: " Bika luavutula nzola ye Nzambi." ²¹ Yani wakitula Klisto bonso n'kayilu mudiambu dia masumu meto. Yani wuna ndondo nduna kavola nkutu kana sumu ko, wan'vanga wo mpasi vo tuakuma lunugu lua Nzambi mu yani.