1 Mu dina, wukina vo tuna ye kisalu kiokio ye bonso tuatambudila ngiambudulu, katutalemba ko. 2 Nkutu, tuayambula nzila za nsoni ye za kinsueki. Katutazingila diaka mu mpila ya mbi ko ye katutabebesa diaka diambu dia Nzambi ko. Kansi, mu nsongolo ya kieleka, tutakiyekola muna kansansa kia bawonso va luse lua Nzambi. 3 Kansi vo malongi meto mena mafukua, mena kaka mafukua kua bana bavilanga. 4 Mu mabatadidi, nzambi ya nza yiyi watula bubu kua mpeve za bakondolo kuikila. Mu dina, kabena diaka ye lendo ko mu mona kia kua nsangu zambote, za n'kembo a Klisto wuna fuan-fuani kia Nzambi. 5 Kadi katuta kilonga yeto mosi ko, kansi Yesu Klisto bonso Mfumu, ye yeto kibeni bonso sadi yeno mu zola kua Yesu. 6 Kadi Nzambi wuna yani mosi kaka wavova: "N'temo siwamoneka muna tombe kia ngolo", ye wamoneka muna n'tima mieto, mu vana n'temo wa nzayilu ya n'kembo a Nzambi, muna mbonokono ya Yesu Klisto. 7 Kansi tuna ye kimvuama kiokio kina muna vangua ya m'bumba, mpasi vo diatoma moneka vo lendo kisakidi luta nene kivuilu kua Nzambi kansi ka kua yeto ko. 8 Tuna ye kiadi mu mpila zawonso, kansi kondua kua sukama. Tuna ye keti-keti kansi katukondolo vuvu ko. 9 Tunuanusuanga kansi katuna tuabembolua ko. Tukalanga tuayoya kuayingi kansi katufuasuanga ko. 10 Mu ntangu zawonso, mu nitu zeto, tuna ye lufua lua Yesu Klisto, mpasi vo luzingu lua Yesu Klisto luamoneka mu nitu zeto. 11 Yeto tuna moyo, tuyekoluanga ntangu zawonso ku lufua mu diambu dia zola kua Yesu, mpasi vo luzingu lua Yesu luamoneka mu nitu zeto za kin'suni. 12 Dina, lufua lutasala mu yeto, kansi moyo wutasala mo yeno. 13 Kansi tuna ye Mpeve ya minu yi mosi bonso diasonukua: " ngita vova kadi yina yakuikila." Tukuikilanga mpe, ye dina tuvovelanga mpe. 14 Tuzeye vo nduna wafutumuna Mfumu Yesu sikatufutumuna mpe ye Yesu. Tuzeye vo sikatunata ye yeno, vana n'tuala ani. 15 Konso diambu dina muna kuma kieno mpasi vo, bonso n'lemvo wamuangana kua bantu babidi, mvutudulu za matondo sizakulama muna n'kembo a Nzambi. 16 Yidina, katulendi yoya ko. Kana vo tufueso ku nganda, kansi muna nkati tutungululuanga lumbu ka lumbu. 17 Kadi, fimpasi fiofio fia fintangu-ntangu fita kutukubikanga mukuma kia n'kembo wanene wa m'vu ya m'vu wulutidi tezo kiawonso. 18 Kadi katutalanga bima bimonekanga ko, kansi bilembi monekanga. Bima bimonekanga bina bia fintangu-ntangu, kansi bilembi monekanga bina bia m'vu ya m'vu.