¹ Tuyantikidi kukisanisina yeto mosi e? Katuna ye nsatu a min'kanda mia ntumunu kua beno yevo mitukidi kua beno ko, bonso ban'kaka, kawawu ku e? ² Beno, luna n'kanda eto wa ntumunu, wasonukua vana ntima mieto, wuzayakene ye wutanguanga kua bantu bawonso. ³ Ye yi mukulusonga vo luna n'kanda wa Klisto wayekolua kua beto. Wasonukua kamu tinta ko kansi mu Mpeve a Nzambi a moyo. Kawasonukua vana meza ma matadi ko, kansi vana meza ma n'tima mia bantu. ⁴ Ye tala vuvu tuna kiawu mu Nzambi mu nzila ya Klisto. ⁵ Katuna tuafuana ko beto kibeni mu lomba mu kingolo kima bonso kitukidi kua beto. Kansi nkutu, ndungidi eto yi tukanga kua Nzambi. ⁶ Yi Nzambi watuvana kibakala mu kala n'sadi miani mu luwawanu lua mpa. Lulu kayiluwawanu lutukidi mu n'kanda ko, kansi kua Mpeve; kadi n'kanda wuvondanga, kansi Mpesve yivanaga moyo. ⁷ Wuwu kisalu kiakele vananga lufua - luasonama mu bisono vana ntadu a matadi - kiayiza mu n'kembo wumosi nate nkutu n'kangu wa isaeli kawalenda diaka tala zidi kia Mose ko. Didi, mudiambu dia n'kembo a zidi kiani, n'kembo wakala wampiokela. ⁸ Nga nkia tezo kifete kala salu kitasala Mpeve? ⁹ Kadi vo salu kia ngielele kikala ye n'kembo, neyi salu kia ndungunu kifete zadila kua n'kembo e? ¹⁰ Mu dina, diodio diakala dia n'kembo muna ntama kadiasala diaka dia n'kembo ko, mu diambu dia n'kembo wan'lutila ¹¹ Kadi vo kiokio kiakala kia mpiokela kiakala ye n'kembo, nga nkia tezo kia n'kembo wufete kala mu kiokio kina kia sikila e? ¹² Mu vuvu kiokio kina yeto, tuna ye nzunzu yafuana. ¹³ Katuna bonso Mose ko, watula n'lele vana zidi kiani, mpasi vo n'kangu a Isaeli walembi toma kun'tadidila kuna nsuka ya nkembo wakala wampiokela. ¹⁴ Kansi ngindu zawu zakala zakangama. Nate nkutu mu lumbu kiki, n'lele wuna wuna kaka muna ntangulu a luwawanu lua nkulu. Kaluna luazibulua ko kadi yi mu Klisto kaka wuvidila. ¹⁵ Kansi, kana wuwu, konso kua ntangu batanganga Mose, n'lele wufikanga n'tima miawu. ¹⁶ Kansi vo muntu vilukidi kua Mfumu, n'lele wukatulu. ¹⁷ Mfumu yi Mpeve. Vana vena Mpeve a Mfumu, vana vena Kimpuanza. ¹⁸ beto bawonso, ye zidi yafukulua, tutamona n'kembo a Mfumu. Tutakitulua muna fuani-fuani kimosi kia n'kembo, mu tezo kimosi kia n'kembo ye kia n'kaka, bonso kitukidi kua Mfumu wuna Mpeve.