¹ Ndenda kukisana, kansi kibaka ndandu ko vo mvangidi dio. Kansi siyavovela mona meso ye mbikudulu zitukidi kua Mfumu. ² Nzeye muntu mosi mu Klisto nduna, mvula kumi ye ya zilutidi, wanatua kuna zulu dia n'tatu, kana wakala mu nitu ani kana ku nganda ya nitu ani, kizeyeko, Nzambi zeye. ³ Ye nzeye vo muntu ndondo ( kana vo muna nitu ani yevo ku nganda ya nitu ani, kiazaya ko, Nzambi zeye) ⁴ wanatua kuna Paladiso ye wawa mambu ma kin'longo kiasaka momo kamalendi vovela konso muntu ko. ⁵ Mu matadidi muntu wampila yoyo, nga mfete kisana. Kansi kilendi kisana mu matadidi mono mosi ko, wana nkutu vo mu yoya kuamu. ⁶ Vo yazola kisana, nga kiakala zengi ko; kadi nga yavova ludi. Kansi nga kilendi kisana ko, mpasi vo muntu kabaki mabanza malutidi momo ketamona mu mono yevo ketawa mu mono ko. ⁷ Seyakikeba mpe mu kisana mudiambu dia kadilu kia mpila n'kaka kia nzayikusu zozo. Mudiodio, kilendi zalua kua kitumpidika ko, kadi yavewa lusende muna n'suni, ntumua ya satana mu kun'kuamisa, mpasi vo kikituki nkua kitumpidika kua saka ko. ⁸ Nkumbu tatu ya dodokela Mfumu mu n'samu wowo, mpasi kan'tatula kuanda ye mono. ⁹ Kansi wantela: " n'lemvo ami wuna wafuana mu ngeye, kadi lendo kiamu kikalanga kialunga muna Yoya." Ikuma seyaluta kisana mu yoya kuamu, mpasi lendo kia Klisto kia tatamana mu mono. ¹⁰ Mudiodio ngina nkua kiese, muna yoya kuamu, muna bifingu, muna mvualangani, muna nuanisua ye muna kiadi, mu Klisto; kadi vo ngina yayoya, yi mu ntagu yoyo ngina ngolo. ¹¹ Yakitukidi zengi! Yeno luankitudi wo, kadi nga yeno lufete kuntuma . Kadi kiakala nkutu kana fioti kunsi ya ntumua zakatula-katula ko, mpele ko kina lekua ko. ¹² Sinsu yakieleka ya Ntumua yakala yasengomonua vakati kueno mu luvibidilu luawonso, mu bidimbu, mu bimangu ye masivi. ¹³ Kadi, mu nkia diambu yeno luakadila m'funu wuke kua mabundu ma n'kaka, Katula kaka vo kikedi zitu kua beno ko e? Lundemvokela mu mbi yoyo! ¹⁴ Tala! Ngina yakubama mu kuenda kua yeno mu nkumbu ya n'tatu. Ye kikala zitu ko kua beno, kadi ka bima bieno ko ngita sosa, kansi beno kibeni. Kadi bana nga kabalendi lunda mbongo mukuma kia Mase ye Ngudi zawu ko ; kansi nkutu, yi Se ye Ngudi bafete lunda mbongo mukuma kia bana. ¹⁵ Siyafuta mbongo mu luzolo luawonso, ye siyakiyekola mpe mono kibeni mukuma kia miela mieno. Vo yikuluzolele lutila diaka, nga siyazolakana fioti kaka kua beno e? ¹⁶ Kansi, wuwu tuna, kiasidi kala zitu ko kua beno, kansi wuwu kina vo ngina nkua nduenga kibeni, mono yalubakidi mu nduenza zambi. ¹⁷ Nga yabakidi ndandu mu yeno mu nzila ya muntu mosi vakati kua bobo yakulufidisa e? ¹⁸ Yasiamisi Tito mu kuenda kua beno kintuadi ye muntu wan'kaka. Nga Tito wabakidi ndandu mu beno e? Nga katuadiete mpila mosi ko ye beno e? Nga katuadiete ntambi zimosi ko e? ¹⁹ Lubenze vo mu ntangu yoyo yawonso tuakele kinuaninanga kua yeno e? Va n'tuala Nzambi, muna Klisto, tuavovele mambu mawonso mukuma kia nsiamusu eno. ²⁰ Kadi ngina ye wonga vo kiokio siyaluaka sikiakuluwana bonso ngita dio banzila ko. Ngina ye wonga vo kalumboni bonso luta dio banzila ko. Ngina ye wonga wa wana zintantani, maketo, nganzi za saka, mabanza ma wimi, mpova zambi, kukitumpidika ye mvualangani. ²¹ Ngina ye wonga vo mu mvutuka amu, Nzambi amu kankulula va n'tuala eno. Ngina ye wonga wamuesua kiadi kua babidi mu bobo banete masumu ye kabavilukidi mu nsumukunu awu, mu kadilu kia zumba ko ye ndungusulu ya nsatu zawu zasaka zozo bakele sadilanga.