¹ Nzolele vo luavibidila fikilawu fiamu. Kansi beno lumvibidila kibeni! ² Kadi ngina ye kimpala mu beno. Kimpala kina yamu kia kinzambi mu beno, kadi mono yakuluvana nzitikila kua bakala dimosi kaka. Yasila mu mukulu songa kua Klisto bonso ndumba yakondua zaya yakala. ³ Kansi ngina ye wonga vo konso mpila, bonso nioka kavunina Eva muna nduenga zani zambi, bika mabanza meno kamavilulua mu kukiyekola kua kieleka ye kua n'longo kua Klisto ko. ⁴ Tubanza bonso vo muntu mosi lenda kuiza kululonga Yesu dia n'kaka ye diodio tualulonga, yevo tulenda banzila vo lutambudi mpeve yina yasuasuana ye yoyo luatambudi. Yevo diaka tubanza vo luatambudi n'samu wambote wan'kaka wasuasuana ye wowo luatambudi. Lutoma vibidillnga mambu momo. ⁵ Kadi mbenzi vo kina kunsi mu diambu dimosi nkutu ko ya bana bakibanzilanga ntumua zilutidi nene. ⁶ Kansi kana kina vo kiakubikilua mu ta nsangu ko, kina wo mu mambu matadidi nzayilu ko. Mu mambu mawonso ye mu mpila zawonso, tualuzayisa wo. ⁷ Nga sumu yanete mu kukikulula mono kibeni mpasi vo beno luatomboka e? Kadi yalulongele nsangu zambote za Nzambi mu kimpuanza kiawonso. ⁸ Yayiya mabundu ma n'kaka kiokio yatambudila lusadusu luawu mpasi yalusadila . ⁹ Kiokio yakala vakati kueno ye mu nsatu, kiakala zitu kua muntu mosi ko. Kadi nsatu zamu zalungisua kua zimpangi za makedonia. Mu mambu mawonso, kiazolele yakala zitu kua beno ko, ye siyatatamana mpila yoyo. ¹⁰ Kina vo kieleka kia Klisto kina mu mono, kisana kia mono kibeni kakilendi kondua moneka mu yinzungidila kia Akayi ko. ¹¹ Ye mu nkiama e? Mudiambu dia kikuluzolanga ko e? Nzambi zeye dio. ¹² Ye momo m'vanganga, siyatatamana vanga mo mpasi mu katula mabanza ma kunsungula ye mabanza vo bazolele kisana ( Bika bakala bonso beta sala salu kimosi ye kiokio tusalanga). ¹³ Kadi bantu bampila yoyo bena ntumua za luvunu, n'sadi mia luvunu. Bakikitulanga ntumua za Klisto. ¹⁴ Ye kadina dia ngitukulu ko, kadi satana yani kibeni kukitulanga mbasi a n'temo. ¹⁵ Kadina dia ngitukulu ya nene ko vo n'sadi miani mpe mikukitulanga n'sadi mia ndungusu. Nsukulu awu siyakala bonso wuna mavanga mawu. ¹⁶ Mvutukidi dio, ka muntu ko kabanza vo mono ngina zengi, kansi vo yiwowo, luntambula bonso zengi mpasi ya yangalala fioti. ¹⁷ Mana ngita vova mudiambu dia vuvu kiokio kiakitumpidika, kakina luve ko kua Mfumu, kansi ngita vova bonso zengi. ¹⁸ Kina vo bantu bayingi bakiyangidikanga mu kinsuni, yikiyangidikanga mpe. ¹⁹ Kadi lutavibidila mazengi mu kiese. Luna lua nkua nduenga yeno kibeni. ²⁰ Kadi lutavibidila muntu ndondo wuta kulukitula nanga miani, yevo wuta kulusadila kua lutila nate kulubakila ndandu, yevo wuta kimona vo wululutidi, yevo wuta kuzuluba mbata. ²¹ Ngina ye nsoni mu vova vo tuakala tuayoya kibeni mu vanga ma mpila yoyo. Ingeta, vo muntu wutakisana (ngita vova bonso lawu), mono mpe siyakisana. ²² Nga bena ba Ebelewo e? Mono mpe. Nga bena besi Isaeli e? mono mpe. Nga bena n'kuna wa Abalayami e?, Mono mpe. ²³ Nga bena n'sadi mia Klisto e? ( Ngita vova bonso zengi). Ngina wo lutila. Yalutila kua yingi muna salu ya ngolo, muna maboloko mabidi, muna zubua lutila tezo yawonso, yakala va n'tuala a vonza ya lufua. ²⁴ Kua bayudayo, yabaka nkumbu tanu za "Maku maya ma nkomi katula yimosi." ²⁵ Nkumbu tatu yazubua mu n'ti. Nkumbu mosi yatubua matadi. Nkumbu tatu yakukula muna maza. Yalutisa fuku wam'vimba ye lumbu kimosi muna m'bu. ²⁶ Yasala nzietolo nkumbu zabidi, yakala mu vonza muna maza, mu vonza kua mivi, mu vonza kua n'kangu wa mono kibeni, mu vonza kua bapakanu, mu vonza muna zimbanza, mu vonza muna zinseke, mu vonza muna m'bu, mu vonza kua mpangi za luvunu. ²⁷ Yakala mu salu biangolo ye mu mpasi, ye yakondua kua tulu mu fuku wabidi, mu nsatu ya madia ye vuina, ntangu zawonso mu mbininu a n'soki, mu kiozi ye kimuasi. ²⁸ Ye, ku nganda ya mambu momo mawonso, ngina lumbu yawonso mu nkuamusu mu mono kibeni mukuma kia mabanza mamu masaka mukuma kia nzo za Nzambi zawonso. ²⁹ Nani wuna wayoya, ye mono kikadi wo ko e? Nani vukumuni wan'kaka mu bua mu masumu, ye kiayokele ko e? ³⁰ Vo ndenda kikembesa, siyakikembesa mukuma kia momo nginina wayoya. ³¹ Nzambi wuna Se dia Mfumu Yesu, ndondo wuna wazangama ya kua yele m'vu, zeye vo kivunanga nkutu ko! ³² Kuna Damasko, N'giadi wa n'tinu Aletasi watula min'kengi muna mbanza ya Damasenie mu kunkanga. ³³ Kansi bantula mu panu kimosi ye bankulumuna vana nela nate vana n'toto, vana mbela ya yaka, ye yatina va moko mandi.