¹ Yisenɔ sunu kpodo yɔnu, un le ɖɔ xo na mi mɛ ke yɔn osɛn lɔ wi lɛ. osɛn lɔ ɖo acɛ do mi ji hwenu ke mi le gbɛ. Bɔ mi yɔn ɛn ganji. ² kpɔn de wu etɔn , osɛn lɔ sin asu kpodo asi kpo do kpɔ hwenu ke ye le gbɛ hwenu. amɔ na asu lɔ ku, asi exɔn etɔn sɔn osɛn ke sin do asu lɔ wu mɛ. ³ Na eyi asi na mɛɖevo hwenu ke na asuwɔ kpo le gbɛ, e do afɔ gbe. Amɔ na asuwɔ ku, e tɔn sɔn osɛn lɔ gɔ. E hɛn e na ɖe asu ɖevo, e ma sɔ na yi afɔ do gbe gɛ. ⁴ Na mye, nɔvi sunu kpodo yɔnu, onu lokpo lɔ wɛ e yi. Ye sin mi do Klisi ke ku le akluzu ji do mi tamɛ lɔ go, na do ɖɔ mi klan sɔn osɛn lɔ go tawun wɛ. Mɛɖevo tɔn wɛ mi yi, bɔ mɛdevo xɔn, wɛ yi mɛ ke fɔn sɔn ku. Do le, mi sɛn Mawu nujɔnu tɔn. ⁵ Nugbomɛ, nuɖejan wɛ mi nɔ blo ɖayi, ojlo yiylan mitɔn lɛ nɔ nɔ zan osɛn lɔ bo nɔ do wa azɔn le agbaza mitɔn mɛ, bɔ nu ke jɛ godo na wɛ yi oku. ⁶ Amɔ odin, mi klan tawun le nu ke nɔ le li mi lɔ go. Mi hɛn mi na sɛn Mawu kpodo walɔ yɔyɔ kpo le tonu sise mɛ na Yɛ Ɖeɖovo lɔ, bɔ mi ma sɔ na sɛn Mawu ɖi xoxo lɔ ha gɛ le tonu sise na osɛn Moise ton lɔ tɔn mɛ. ⁷ Etɛ wɛ un le ɖɔ do le? Osɛn lɔ yi ohwɛ tɔn wɛ? Un ma ɖi gɛ! Osɛn lɔ kɛɖɛ mɛ wɛ un yɔn ohwɛ wi le . Un ma si yɔn ojlo yiylan lɛ wi osɛn kɔ mɛ vo gɛ: A ma na ɖo ojlo yiylan gɛ. ⁸ Ohwɛ gbɔn wlɛnwi xɔn mɛ, e gbɔn osɛn lɔ mɛ bo do ze ojlo yiylan lɛ do yɛn mɛ. Ohwɛ, nu kuku wɛ na osɛn ma le gɛ. ⁹ Ɖayi ke osɛn ma le gɛ, un le gbɛ. Amɔ hwenu ke osɛn lɔ wa, ohwɛ wa zun onu gbɛɖe, ¹⁰ bɔ yɛn un ku. Yi wɛ zɔn bɔ osɛn ke ɖo na na yen ogbɛ wa le kplan yi oku. ¹¹ ƐƐ, ohwɛ lɔ gbɔn wlɛnwi xɔn mɛ, e yi nu ke osɛn lɔ zan bo do blɛ un ɖu, bɔ ɖo le e hu un. ¹² Amɔ osɛn lɔ onu mimɛ wɛ e yi, onu jɔjlɔ bo yɔn. ¹³ Bɔ odin, onu ɖagbe nɔ hu me wɛ? Gbeɖe! Amɔ ohwɛ lɔ yi onu ɖagbe zan bo do hɛn oku wa na un. Bɔ ɖo le, osɛn lɔ zɔn bɔ e yɔn le ke ohwɛ yanlan ɖo, bo do lɛ ɖe ogu fifɔn etɔn xlɛ. ¹⁴ ƐƐ, mi yɔn ɛn, osɛn lɔ Mawu de wɛ esɔn, amɔ yɛn ma yi mɛ sisyɛn ke ye sa ɖi kannumɔnɔ na ohwɛ gɛ. ¹⁵ Nu ke un nɔ blo, un mɔ nɔ mɔ do na gɛ. Nu ke un jlo, un mɔ nɔ blo gɛ, bɔ nu ke un gbɛ wan na, yi wɛ un nɔ blo. ¹⁶ Na un blo nu ke un ma ba gɛ, un nɔ mɔ ɖɔ osɛn lɔ bo yɔn. ¹⁷ Na do ɖɔ, e ma yi yɛn wɛ le blo ba gɛ, amɔ ohwɛ ke le yɛn mɛ lɔ wɛ. ¹⁸ ƐƐ, un yɔn ɛn, nu ɖagbe ma le yɛn mɛ gɛ, yɛn ke ma si ɛn gɛ lɔ. Na yɛn, un nɔ ba nu ɖagbe, bɔ un kpe go, amɔ na do blo nu ɖagbe, un hwe de go. ¹⁹ Na do ɖɔ, ɖagbe ke un nɔ ba, un mɔ nɔ blo gɛ, bɔ onu yiylan ke un ma jlo gɛ, yi wɛ un nɔ blo. ²⁰ Na un blo nu ke un ma jlo gɛ, e ma yi yɛn go wɛ e sɔn gɛ, amɔ ohwɛ ke le yɛn mɛ lɔ wu wɛ. ²¹ Un wa mɔ nukunu jɛ osɛn kɔ go: Na un jlo na blo ɖagbe, onu yiylan nɔ wa xwe tɔn le yɛn mɛ. ²² Le yɛn lɔsu mɛ tawun, osɛn Mawu tɔn nɔ yɔn na un. ²³ Amɔ un nɔ le mɔ osɛn ɖevo le yɛn mɛ, e nɔ xo vun xa osɛn ke nu yiyɔ ɛn ce le gbe sisɔ mɛ xa lɔ. Osɛn xɔn nɔ ze un zun gantɔ na osɛn ohwɛ tɔn ke le yɛn mɛ lɔ. ²⁴ Mi kpɔn un lelenɔ! Mɛ na tun kan na un le agbaza kɔ si ke le kpla un do yi ku? ²⁵ Mi ni do kpɛ na Mawu gbɔn Aklunɔ Jezu mitɔn mɛ! Kpodo nu yi yɔ ɛn ce, un yi gbe na osɛn Mawu tɔn, amɔ ma ɖo ganɔ ce, un nɔ se tonu na osɛn ohwɛ tɔn.