¹ Etɛ mi ka na ɖɔ din? Mi na le gbɛ le ohwɛ mɛ bɔ fɛnu Mawu tɔn na gɔfla wɛ? ² Kpɔn gbeɖe! Le hwɛhuhu we omɔ ji, mi ko ku; bɔ naɖe mi ka na lɛ kpo le hwɛ hu wɛ ɖo? ³ Alo mi nywɛ ɖɔ mi mɛ ke e ko nylɔ do tɔmɛ, bo le kpɔ xa Klisi Jezu lɛɛ, mi mɛ kpokpo ku oku ke Klisi ku lɔ wɛ aye? ⁴ Hwekenu e nylɔ mi do tɔmɛ, mi ku kpo Klisi kpo, bɔ e ɖi mi kpo e kpo, bɔ leke Mawu Tɔ lɔ ze hɔnhlɔn etɔn susunɔ lɔ do fɔn Klisi lɔ, lexa ke wɛ mye lɔsu na zan gbɛ yɔyɔ. ⁵ Ɖo ke mi ko le kpɔ xa ɛ, bo ko ku xa ɛ, lexa ke wɛ mi le kpɔ xa ɛ bo ko fɔn sɔn ku xa ɛ. ⁶ Mi nywɛ ganji ɖɔ gbɛtɔ ke mi ko nyi d'anyi lɔ, ka wɛ e ko ka gbɛtɔ exɔn kpo Klisi kpo ɖo akluzu ji, bo na su kun do na hwɛhuhu we ninɔmɛ ke mi ɖo d'anyi lɔ, na mi ni ma sɔ wa nyi kannumɔ na hwɛhuhu ɖevo gɛ. ⁷ Ɖo me ke ku ɔ, e tɔn sɔn hwɛhuhu we hɔnhlɔn lɔme. ⁸ Ke mi ku kpo Klisi kpo o, mi ɖi nu ɖɔ mye lɔsu mi na nɔ gbɛ xa ɛ. ⁹ Ɖo mi nywɛ ɖɔ ke Mawu fɔn Klisi sɔn ku, Klisi ma sɔ le ku gɛ, ɖo oku ma sɔɖo acɛ ɖo e ji gɛ. ¹⁰ Ɖo Klisi ku; hwɛhuhu ma sɔ na ɖo hɔnhlɔn ɖe gɛ wutu wɛ e ku hwlan ɖokpo gee, bɔ xo fo Amɔ KLisi fɔn wa gbɛ; e na nɔ gbɛ na Mawu wutu wɛ e fɔn wa gbɛ. ¹¹ Lexa ke, le kpɔ ke mi le xa Klisi Jezu lɔ mɛ, mye lɔsu mi ni nɔ mɔ miɖe ze mɔ me ke ko ku le hwɛhuhu we omɔ ji lɔ, bo na nɔ mɔ miɖe ze mɔ me le gbɛ na Mawu lɔ. ¹² Hun, hwɛhuhu ni nɔ kpɔn ɖu axɔlu le agbaza mitɔn ke na ku lɔ nu gɛ; mi nɔ kpɔn se tonu na jlo agbaza tɔn lɛɛ gɛ. ¹³ Mi nɔ kpɔn ze miɖe do wa azɔn na hwɛhuhu ɖi azɔnwanu ke nɔ wa nu agɔ lɛɛ ɖɔhun gɛ; e nyɔ wa, mi ze miɖe jo na Mawu, ɖo mɛ ke fɔn sɔn ku wɛ nyi; mi ze miɖe kpokpo jo na azɔn etɔn, ɖi azɔnwanu ke nɔ wa nu jijlɔ lɛɛ ɖɔhun. ¹⁴ Ɖo hwɛhuhu ma sigan ɖo acɛ le mi ji gɛ; ɖo mi ma sɔ le osɛn lɔ we acɛ mɛ gɛ; amɔ, fɛnu Mawu tɔn mɛ wɛ mi le. ¹⁵ Etɛ wɛ! Ke mi ma le osɛn lɔ we acɛ mɛ gɛɛ, bo le fɛnu Mawu tɔn mɛ e wutu wɛ mi na hu hwɛ a? kpɔn gbeɖe! ¹⁶ Mi nywɛ ganji ɖɔ enyi mi jo miɖe do ɖi kannumɔ dɔhun na mɛɖe, bo na se tonu n'i, kannumɔ wɛ nyi na mɛ ke mi le se tonu na lɔ. E sigan nyi hwɛhuhu ke nɔ kplan mɛ yi ku; e ka sigan nyi tonuse na Mawu ke nɔ ze mɛ ze trɔ zɔn hwɛjijɔnɔ le Mawu we nukun mɛ. ¹⁷ Amɔ, e ni kpa susu na Mawu! Mimɛ ke ko nyi kannumɔ na hwɛhuhu d'anyi, odin, mi se tonu kpo ayixa mitɔn kpokpo sese kpo na kpɔndewu ke le okplɔn ke mi yi lɔ mɛ. ¹⁸ E hwlɛn mi gan sɔn hwɛ we acɛ mɛ, bɔ mi trɔ zɔn kannumɔ na hwɛjijɔ. ¹⁹ Un le ɖɔ xo na mi le ke gbɛtɔ nɔ ɖɔ xo ɖo, ɖo nukunnu ke mi mɔ nɔ yawu mɔ jɛ nu ke kan Mawu lɛɛ me gɛ wutu. Ɖ'anyi xoxo o, mi jo miɖe do kpokpo ɖi kannumɔ dɔhun na onu kukuɖi wiwa kpo ogbɛ nyinyla zinzan kpo; nu exɔn lɛɛ wiwa nɔ zɔn bɔ mi mɔ nɔ se tonu na Mawu gɛ. Lexa ke, odin, mi jo miɖe do kpokpo ɖi kannumɔ ɖɔhun na nujijlo wiwa; exɔn na zɔn bɔ mi na nɔ sigan zan ogbɛ mimɛ. ²⁰ Hwekenu mi nyi hwɛ we kannumɔ ɖ'anyi, e le dandan n'a mi ɖɔ mi ni nɔ kpɔn wa nu jijlɔ gɛ. ²¹ Nu exɔn lɛɛ ke mi wa ɖ'anyi bɔ e le nyi wunya na mi din, etɛ mi ka mɔ l'e mɛ? Nu exɔn lɛɛ, oku wɛ ye nɔ dɔn mɛ sɔ yi. ²² Amɔ, odin, e ɖe mi sɔn hwɛhuhu we acɛ mɛ, bɔ mi le wa zɔn na Mawu. Nu ke mi na mɔ l'e mɛ, wɛ nyi ɖɔ mi na zan gbɛ mimɛ, bɔ vivɔnu etɔn, mi na mɔ gbɛ mavɔ mavɔ. ²³ Ɖo axɔ ke hwɛhuhu nɔ su mɛ lɔ nyi oku; amɔ, nu ke Mawu nɔ na mɛ vɔvɔ wɛ nyi gbɛ mavɔ mavɔ ke mi ɖo le kpɔ ke mi le kpo Klisi Jezu Aklunɔ mitɔn kpo lɔ.