¹ Hun, ke Mawu ze mi ze trɔ zɔn hwɛjijɔnɔ do gbɔn nuɖiɖi gblamɛ, fifa le mye kpo Mawu kpo cɛncɛn, do gbɔn Aklunɔ mitɔn Jezu Klisi we nuwiwa lɛɛ gblamɛ. ² Nuɖiɖi mitɔn zɔn bɔ mi kpe wu, bo mɔ fɛnu ke Mawu na mi lɔ yi do gbɔn Jezu ji; fɛnu exɔn wɛ zɔn bɔ mi li do din. Nu ke nɔ na xomɛ hunhun na mi lɔ wɛ nyi nukun ke mi le ɖo ɖɔ mi na ɖo mima le susu Mawu tɔn mɛ. ³ Ke lɛ xugan lɛ wɛ nyi ɖɔ mi na tlɛ bo le awuvɛ mɔ wɛ, oji nɔ jɔ mi, ɖo mi nywɛ ɖɔ awuvɛ mimɔ nɔ zɔn bɔ e nɔ ɖo suulu; ⁴ bɔ suuluɖiɖo nɔ zɔn bɔ e nɔ dɛ le tɛnkɔn mɛ, bɔ didɛ lɔ nɔ zɔn bɔ e nɔ ɖo nukun ɖiɖo. ⁵ Nukunɖiɖo exɔn ka mɔ nɔ flu mɛ gɛ, ɖo Mawu kɔn wan nyinyi etɔn do ayi mitɔn mɛ do gbɔn yɛsinsɛn ke e na mi lɔ ji. ⁶ Ɖo hwekenu mi ma ko ɖo hɔnhlɔn gɛ ɛ, Klisi ku do mi mɛ ke mɔ nɔ si Mawu gɛɛ lɛ tamɛ, le hwenu ke Mawu ɖo do lɔ. ⁷ E na vɛ awu tawun, bɔ e na yigbe bo ku do hwɛjijɔnɔ ɖe we tamɛ. Ota wɛ na nyɔ bɔ mɛɖe na ɖo ojilili bo ku do ɖagbe watɔ ɖe we tamɛ. ⁸ Amɔ, Mawu ɖe fi ke e nyi wan na mi yijɛ lɔ sɔ xlɛ mi, ɖo hwenu mi kpo le hwɛhutɔ nyi wɛ, e wɛ Klisi ku do ta mitɔn mɛ. ⁹ Odin, Mawu ze mi ze trɔ hwɛjijɔnɔ do gbɔn hun Jezu tɔn ke kɔn nyi anyi lɔ gblamɛ. Hun e le gannaganna ɖɔ Mawu na lɛ hwlɛn mi gan le xomɛsin etɔn kpo hwɛɖɔxamɛ etɔn kpo si. ¹⁰ Kɛntɔ Mawu tɔn wɛ mi ko nyi d'anyi; amɔ, Mawu ɖɔ hwɛ gbo xa mi do gbɔn ku ke ovi etɔn ku lɔ gblamɛ. Odin ke Mawu ɖɔ hwɛ gbo xa mi, e le gannaganna ɖɔ e na hwlɛn mi gan do gbɔn ovi etɔn we ogbɛ gblamɛ. ¹¹ Exɔn kɛɖɛ mɛ ka wɛ gɛ, amɔ, mi tlɛ lɛ le awa jɛ wɛ le Mawu mɛ do gbɔn Aklunɔ mitɔn Jezu klisi ke Mawu ze do ɖɔ hwɛ gbo xa mi lɔ ji. ¹² Hwɛhuhu, gbɛtɔ lokpo gee ji wɛ e gbɔn bo wa gbɛ lɔ mɛ; mɛ exɔn wɛ nyi Adamu; hwɛhuhu lɔ ka dɔn oku wa. Exɔn, gbɛtɔ lɛɛ kpo nɔ ku, ɖo mɛ kpokpo wɛ hu hwɛ. ¹³ Hwɛkpo bɔ Mawu na na osɛn lɔ Moyizi, hwɛhuhu ko le le gbɛ lɔ mɛ; amɔ, ke osɛn lɔ ma ko le gɛɛ, Mawu mɔ nɔ lɛn ohwɛ do kɔ na mɛɖe d'anyi gɛ. ¹⁴ E le lexa co, bɛ sɔn Adamu hwenu gbɔɔn kaka wa jɛ Mɔyizi hwenu, oku lɔ ɖu axɔlu; e ɖu axɔlu le mɛ ke we ohwɛ ma tlɛ ci ohwɛ ke Adamu hu ha dɔhun gɛ lɛɛ lɔsu ji; Adamu ke vɛ tolina Mawu. Adamu lɔɔ, mɛ ke ɖo na wa lɔ we akpajlɛ wɛ e nyi. ¹⁵ E ma sigan jlɛ nunina Mawu tɔn vɔvɔ do nu ke Adamu wa nyi do lɔ wu gɛ; ɖo e sɔn nu ke gbɛtɔ okpo ɖokpo gee exɔn wa nyi do lɔ wu, bɔ mɛ susu ku; amɔ fɛnu Mawu tɔn xu gan nuwanyido Adamu tɔn lɔ ɖaxo bɔ nunina ke e na mɛ susu vɔvɔ do gbɔn gbɛtɔ ɖokpo gee jiɔ, lɛ le taji xu le. ¹⁶ Nu ke nunina Mawu tɔn nɔ wa gbɔn vo na nu ke hwɛ ke gbɛtɔ ɖokpo gee exɔn hu lɔ hɛn wa lɔ. Ɖo hwɛ ke e ɖɔ do nuwanyido gbɛtɔ ɖokpo gee exɔn tɔn , e dɔn hwɛɖonamɛ wa gbɛ lɔ mɛ. Nunina vɔvɔ ke Mawu na mi do nuwanyido susu godo ɖe mi sɔn hwɛ mɛ. ¹⁷ Ke e sɔn nu ke gbɛtɔ ɖokpo gee wa nyi do wu, bɔ oku ɖu axɔlu do gbɔn gbɛtɔ ɖokpo gee exɔn jii, e le gannaganna ɖɔ mɛ ke Mawu na fɛnu kpo nunina hwɛjijɔ tɔn kpo, bɔ e su bo gɔfla lɛɛ na nɔ gbɛ bo na ɖu axɔlu le hwɛhuhu ji, ɖo nu ke Jezu Klisi wa lɔ wutu. ¹⁸ Hun nu ke gbɛtɔ ɖokpo gee wanyi do, e dɔn hwɛ donamɛ wa na gbɛtɔ kpokpo, lexa ke wɛ azɔn jijlɔ ke gbɛtɔ ɖokpo gee wa lɔ ɖe gbɛtɔ lɛɛ kpokpo sɔn hwɛɖonamɛ mɛ, bo na gbɛ ye. ¹⁹ Ɖo le ke tonumase gbɛtɔ ɖokpo gee tɔn zɔn bɔ gbɛtɔ susu trɔ zɔn hwɛhutɔ ɔ, lexa ke wɛ tonusise gbɛtɔ ɖokpo gee tɔn zɔn bɔ gbɛtɔ susu trɔ zɔn hwɛjijɔnɔ le Mawu nukun mɛ. ²⁰ Osɛn lɔwa, bɔ hwɛhuhu na su d'eji; fi ke hwɛhuhu ka su le, fɛnu Mawu tɔn nɔ gɔfla le flɛn. ²¹ Hun exɔn wutu wɛ le ke hwɛhuhu ko ɖu axɔlu do gbɔn ku ji lɔ, lexa ke wɛ fɛnu Mawu tɔn le axɔlu ɖu wɛ do gbɔn hwɛjijɔ ji, bo na kplan mi yi gbɛ mavɔ mavɔ mɛ do gbɔn Jezu Klisi Aklunɔ mitɔn ji.