¹ Mi yi mɛ ke ma lido le onuɖiɖi mɛ gɛ lɛɛ ganji, mi nɔ kpɔn ɖɔ oxo nyinyla do linlin etɔn lɛ wu gɛ. ² Onu ke go mi na kpɔn do o, mɛ ɖe ɖi nu ɖɔ emye hɛn, emye bo na ɖu nu lɛɛ kpo; mɛ ɖyɛ ke me lido le onuɖiɖi mɛ gɛ ɛ, o ma kɛɖɛ jɛn eyɔ nɔ ɖu. ³ Mɛ ke nɔ ɖu onu lɛɛ kpo lɔ ma ɖo na gbɛ wan na mɛ ke onuɖe lɛɛ le, bɔ e mɔ nɔ nɔ ɖu gɛ lɔ gɛ; mɛ ke onuɖe lɛɛ le bɔ eyɔ mɔ nɔ ɖu gɛ lɔsu ma ɖo na do hwɛ mɛ ke nɔ ɖu onu lɛɛ kpo lɔ gɛ; ɖo Mawu yi e lɔsu gba. ⁴ Mɛ wɛ a ka nyi, bo na do hwɛ omɛsɛntɔ mɛɖevo tɔn? E wa azɔn etɔn ganji kpo e ma wa ganji kpo gɛɛ, ogan etɔn wɛ e kan. E ka na wa azɔn etɔn ganji, ɖo Aklunɔ ɖo acɛ ke na ɛ hɔnhlɔn bɔ e na wa azɔn etɔn ganji. ⁵ Mɛ ke nɔ lin ɖɔ azan ɖe lɛɛ le, bo le otaji hugan ɖevo lɛɛ; mɛ ɖevo lɛɛ ka nɔ lin ɖɔ azan lɛɛ kpo wɛ nyi onu ɖokpo lɔ. Mɛ ɖokpo ɖokpo ɖo na gan jɛ onu ke e le ɖɔ lɔ wu le ayi etɔn mɛ. ⁶ Mɛ ke nɔ ze azan ɖe lɛɛ do mɔ azan taji lɛɛ nɔ blo le, bo nɔ do ze Aklunɔ sɔ su; mɛ ke nɔ ɖu onu lɛɛ kpo lɔ, nɔ blo le, bo nɔ do ze Aklunɔ sɔ su; ɖo e nɔ do kpɛ na Aklunɔ do nuɖuɖu exɔn we tamɛ. Mɛ ke mɔ nɔ ɖu onu kpo gɛ lɔsu nɔ blo le, bo nɔ do, ze Aklunɔ sɔsu, bo nɔ do kpɛ na Mawu. ⁷ Le xonugbo mɛ, mɛɖe ma le mi mɛ, bo ɖo na nɔ gbɛ na eɖe gɛ; mɛɖe ma ka le mimɛ, bo ɖo na ku na eɖe gɛ. Enyi mi le ogbɛ, hun mi le ogbɛ na Aklunɔ. ⁸ Enyi mi ku u, mi ku na Aklunɔ. Exɔn wutu, na mi le ogbɛ oo, na mi ku oo, Aklunɔ tɔn wɛ mi nyi. ⁹ Ɖo Klisi ku, bo ka lɛ wa ogbɛ, bo na nyi Aklunɔ na mɛ ke ku lɛɛ kpo mɛ ke le ogbɛ lɛɛ kpo. ¹⁰ Amɔ, yɔɔ, etɛ wutu a le do hwɛ anɔwevi? Yɔ lɔ ɖe, etɛ wutu a gbɛ wan na anɔwevi? ¹¹ Ɖo Mawuxowema lɔ ɖɔ: "Nyɛ Aklunɔ gbɛɖe lɔɔ, un tɛ oɖɛ e ji bo ɖɔ: Gbɛtɔ lɛɛ kpo na jɛ oklo le nukɔn ce, bɔ mɛ ɖokpo ɖokpo na ze ogbe yi oji, bo na ɖɔ nyɛ Aklunɔ wɛ nyi Mawun". ¹² Exɔn wutu, mɛ ɖokpo ɖokpo na ɖo onu ke e lɔsu wa lɔ we ogbe na Mawu. ¹³ Hun, mi ni nɔ gɔn ohwɛ do miɖe. Gbeta ke mi na ɖe tɔn kpoun lɔ i ke: Mi ni nɔ kpɔn wa onu ke na zɔn bɔ mye nɔvi na klɛn afɔ, alo e na jɛ ohwɛ mɛ ti gɛ. ¹⁴ Le okpɔ ke un le xa Aklunɔ Jezu lɔ mɛ, un nywɛ, bo gan jɛ e wu bo ɖɔ nuɖiɖi ti ma nyi kukuɖi gɛ; amɔ, enyi mɛɖe lin ɖɔ nuɖe nyi onu kukudi i, onu lɔ na trɔ zɔn onu kukuɖi na mɛ lɔ. ¹⁵ Enyi a nɔ blo bɔ anɔwevi nɔ mɔ awuvɛ ɖo nuɖiɖi ke a le ɖu lɔ wutun, hun a ma sɔ le wa nu ɖi le ke wan yiyi lɔ ba ɖo gɛ. E na sɔn onu ke ɖu wɛ a le lɔ wu kpoun bɔ a na hɛn mɛ ke wɛ tamɛ Klisi ku do lɔ sɔ yi bu u? ¹⁶ Nu ke nyɔ na un ma ɖo na nyi nu ke wu mɛ ɖevo lɛɛ na ɖɔxo nyinyla do gɛ. ¹⁷ Ɖo axɔluɖuɖu Mawu tɔn ma nyi nuɖuɖu kpo ahan kpo we oxo ɖe gɛ; hwɛjijɔ kpo fifa kpo, kpo awajijɛ ke Oyɛ Ɖeɖovo nɔ na mɛ lɔ kpo we oxo wɛ. ¹⁸ Mɛ ke nɔ wa azɔn na Klisi ɖo lee, onu etɔn nɔ nyɔ Mawu we nukun mɛ; gbɛtɔ lɛɛ nɔ kpa ɛ. ¹⁹ Hun, mi ni nɔ ba onu ke nɔ dɔn fifa wa, bo na zɔn bɔ mi na do awusyɛn lanmɛ na miɖe le nuɖiɖi mɛ. ²⁰ Nɔkpɔn hɛn Mawu we azɔn lɔ gble ɖo nuɖuɖu wutu gɛ. Le oxonugbo mɛ, e si gan ɖu onu lɛɛ kpo. Na e na ɖu nuɖe, bɔ mye nɔvi na jɛ ohwɛ mɛ ɛ, e nyɔ na ye ni gɔn ɖuɖu. ²¹ Onu ke nyɔ lɔ wɛ nyi ɖɔ, e na jo onu ke na zɔn bɔ mye nɔvi na jɛ ohwɛ mɛ lɛɛ kpokpo do, e nyi olan wɛ, hun nɔkpɔn ɖu gɛ. Enyi vɛɛn wɛ, hun nɔkpɔn nu gɛ; enyi onu ɖekpekpe wɛ, hun nɔkpɔn blo gɛ. ²² Hɛn nuɖiɖɩ ke yɔ lɔsu ɖo do onu exɔn wu lɔ na yɔɖe le Mawu we nukɔn. Onu wɛ nyɔ na mɛ ke wa onu ke e mɔ ɖɔ e nyɔ bɔ ayi etɔn ma ka xo vun ɛ lɔ gɛ. ²³ Amɔ, mɛ ke xo onu kpɔn do nuɖuɖu ɖe wu, cobo ka ɖu u, Mawu da hwɛ na omɛ exɔn; ɖo e ma wa onu ɖi le ke nuɖiɖi lɔ ba ɖo ha gɛ. Nu ɖekpekpe ke e ma wa kpo onuɖiɖi kpo gɛɛ, ohwɛ wɛ e nyi.