¹ Mi mɛ ke lido le onuɖiɖi mɛ lɛɛ, mi ɖo na dɛ le mɛ ke ma lido le nuɖiɖi me gɛ lɛɛ we odomali yetɔn nu; mi ma ɖo na wa nu bo na do nyɔ na miɖe gɛ. ² Ɖokpo ɖokpo mitɔn ɖo na ba bo na nyɔ le awegɔ etɔn de, na ɖagbe awegɔ etɔn tɔn, na e na do yi nukɔn le onuɖiɖi mɛ. ³ Ɖo Klisi ma wa nu bo na do nyɔ le eɖe si gɛ; amɔ, le ke Mawuxowema lɔ ɖɔ ɖoo: "Ozun ke nyi ozun ke nyi ozun towe, nyɛ wɛ yi kpokpo". ⁴ Onu ke e ko wlan do Mawuxowema lɔ mɛ d'anyi xoxo lɛɛ kpokpo sese e, e wlan ye, bo na do kplɔn onu mi, na mi na do ɖo nukun onu le ohunkuku kpo akɔnkpikpan ke Mawuxowema lɔ nɔ na mi lɔ kpo gbla mɛ. ⁵ Mawu ke de ohunkuku kpo kanmɛsisyɛn kpo nɔ sɔn lɔ, ni blo na mi na sigan zan gbenɔkpɔ we ogbɛ le miɖe lɛɛ we cɛncɛn ɖi Klisi Jezu ɖɔhun. ⁶ Na mimɛ kpo na ɖo gbɛ kpo do kpa susu na Mawu, Aklunɔ mitɔn Jezu Klisi we Otɔ ɖo kpɔ. ⁷ Hun, mi bo nɔ yi miɖe lɛɛ ganji ɖi le ke Klisi yi mi ɖo ha, na e na kpa susu na Mawu. ⁸ Le xonugbo mɛ, un le ɖɔ na mi ɖɔ Klisi trɔ zɔn Jwifu lɛɛ we mɛsɛntɔ, bo na do ɖe akpa ke Mawu do na dagbo yetɔn lɛɛ, bo na do xlɛ ɖo le ɖɔ Mawu mɔ nɔ do akpa bo nɔ gɔn ɖiɖe gɛ. ⁹ E wa bɔ mɛ ke ma nyi jwifu gɛ lɛɛ lɔsu na do kpa susu na Mawu ɖo nublawukunamɛ etɔn wutu; ɖi le ke Mawuxowema lɔ ɖɔ ɖo ha; e wɛ nyi ɖɔ: "Exɔn wutu wɛ un na kpa susu na we le akɔta ke ma nyi Jwifu gɛ lɛɛ cɛncɛn, bo na ji han do mla we." ¹⁰ Mawuxowema lɔ lɛ ɖɔ: "Akɔta lɛɛ, mi jɛ awa xa togun Aklunɔ tɔn!" ¹¹ E lɛ ɖɔ: "Akɔta akɔta lɛɛ, mi mɛ kpo ni ze Aklunɔ su, togun lɛ kpo ni kpa susu n'i!" ¹² Ezayii lɔsu lɛ ɖɔ: "Mɛ ɖe na tɔn sɔn Jɛsee kunkan mɛ, bo na wa; e na cite, bo na ɖu axɔlu le akɔta ke ma nyi Jwifu gɛ lɛɛ kpo nu; e wɛ na nyi nukunɖiɖo akɔta ke ma nyi Jwifu gɛ lɛɛ kpo tɔn." ¹³ Mawu ke de nukunɖiɖo nɔ sɔn lɔ, ni blo na awajijɛ ke nu lɛɛ kpo vɔ l'e wu kpo fifa ke nu lɛɛ kpo vɔ l'e wu kpo ni gɔ ayi mɛ na mi gbɔn onuɖiɖi ke mi ɖo n'i lɔ ji, na nukun ɖiɖo mitɔn na gɔ fla gbɔn Oyɛ Ɖeɖovo we hɔnhlɔn ji. ¹⁴ Anɛ evi lɛɛ, nyɛ lɔsu u, un ɖo ganjɛwu ɖɔ mi nyɔ xomɛ titeungbe. Mi mɔ nukunnu jɛ nu ke e ɖo na nywɛ lɔ wu kpo sese, bɔ mi nyi mɛ bo hɛn, mi na kplɔn nu miɖe. ¹⁵ E le lexa co, un syɛn ta, bo ɖɔ xo ɖe lɛɛ ɖo xlan mi, le akpa susu xwe le wema ekɔ mɛ, bo na do flin nu ke mi ko nywɛ d'anyi lɛɛ wu mi. Un wlan wema lɔ ɖo le, ɖo fɛnu ke Mawu na un, ¹⁶ bɔ un nyi mɛsɛntɔ Klisi Jezu tɔn le togun ke ma nyi Jwifu gɛ lɛɛ cɛncɛn lɔ wutu. Wɛn Ɖagbe Mawu tɔn ke jla wɛ un le lɔ avɔsannuxwlemawutɔ we azɔn wɛ un ze do le wa, bo le wiwa ɔn, na togun ke ma nyi Jwifu gɛ lɛɛ na do trɔ zɔn avɔsannu ke nɔ nyɔ Mawu we nukun mɛ, bɔ Oyɛ ɖeɖovo ze ɖo vo na Mawu lɔ. ¹⁷ Hun, le kpɔ ke un le xa Klisi Jezu lɔ mɛ, un hɛn, un na go, ɖo azɔn ke un le wa na Mawu. ¹⁸ Ɖo enyi un sin tamɛ bo ɖɔ nuɖe xo o, hun azɔn ke Klisi wa gbɔn ji e, bo na do dɔn mɛ ke ma nyi Jwifu gɛ lɛɛ, na ye na se tonu na Mawu we xo kɛɖɛ jɛn e na nyi; e wa azɔn exɔn gbɔn oxoɖiɖɔ kpo nuwiwa kpo mɛ, ¹⁹ gbɔn nujijlɛ lɛɛ kpo nudabaɖa lɛɛ kpo we hɔnhlɔn mɛ; gbɔn Oyɛ ɖeɖovo we hɔnhlɔn mɛ. Le ke un gbɔn fi lɛɛ kpo bɛ sɔn Jeluzalɛmu kaka yi Ililii gbe ji, bo jla Owɛn Ɖagbe ke ɖɔ xo do Klisi wu lɔ kpikpe etɔn ɖo lɔ i xɛn. ²⁰ Amɔ, un nywɛ ɖɔ fi ke e ma ko se Klisixo le gɛ lɛɛ kɛɖɛ jɛn un na jla Owɛn Ɖagbe lɔ gbɔn dandan, na e ni ma wa ci ado ke mɛɖevo lɔ gbɔn do do lɔ ji wɛ un gba oxo, do lɔ ɖɔhun gɛ. ²¹ Le ke Mawuxowema lɔ ɖɔ ɖo lɔ: "Mɛ ke e ma ko ɖɔ xo etɔn na kpɔn gɛ lɛɛ na mɔ ɛ, bɔ mɛ ke ma ko se xo etɔn kpɔn gɛ lɛɛ na mɔ nukunnu jɛ e wu. ²² Hwlan namu ɖe wɛ e sɔn Owɛn ɖagbe jijla gbɔn fike e ma ko se klisixo lɔ le gɛ lɛɛ wu, bɔ un gɔn mi de. Amɔ, odin, un ko azɔn ce le ogbe exɔn lɛɛ ji. ²³ Mi de wiwa le jijlo un din, oxwe etɔn lɛɛ ji. ²⁴ Un ka jlo ɖɔ na un xwe Ɛsipanyi, un na wa gbɔn mi de, bɔ ojlo ke un ɖo, bo na nɔ mi de lɔ jɛ emɛ na un kpɛɖe e , mi na d'alɔ un bɔ un na yi oto exɔn mɛ. ²⁵ Amɔ, odin, un xwe Jeluzalɛmu, bo na yi gɔ alɔ na mɛ ɖeɖovo Mawu tɔn ke le dɔn lɛɛ. ²⁶ Le xonugbo mɛ, Klisisɛntɔ ke le Masedwani kpo Akayi kpo lɛɛ ɖɔ emye lɛɛ bo na jɔ akwa na wamamɔnɔ ke le mɛɖeɖovo Mawu tɔn mɛ, le Jeluzalɛmu lɛɛ. ²⁷ Ye lɔsu wɛ blo kpo xomɛhunhun kpo; amɔ, e na ɖɔ xojɔxo o, axɔ wɛ e nyi bɔ ye ɖu do wamamɔnɔ exɔn lɛe. Ɖo Jwifu ke nyi Klisisɛntɔ lɛɛ xa mɛ ke ma nyui Jwifu gɛ lɛɛ. Hun mɛ ke ma nyi Jwifu gɛ lɛɛ lɔsu ɖo na ze nyɔna gbɛmɛ fitɔn lɛɛ do do alɔ wu ye. ²⁸ Enyi un ko ɖɔ oxo exɔn gbo, bo ko ze onu ke e jɔ lɛɛ jo na ye, un na sɔ mɔ yi Ɛsipanyi; na un ka le sɔn ɔ, un na gbɔn mi de. ²⁹ Un ka nywɛ ɖɔ na un ja mi de, un na hɛn nyɔna kpikpe Klisi tɔn wa na mi. ³⁰ Anɛevi lɛɛ, nu ke wutu un le do kɛnklɛɛn gbɔn Aklunɔ mitɔn Jezu Klisi kpo wan yiyi ke Oyɛ ɖeɖovo nɔ na mɛ lɔ kpo ji lɔ ke: mi fun ahwan ke un le fun lɔ xa un, bo fan kwe na Mawu do ota ce mɛ. ³¹ Mi xo ɖɛ na ma do glo numaɖitɔ ke le Judee lɛɛ, na alɔgɔnamɛ we azɔn ke wutu un xwe Jeluzalɛmu lɔ, mɛɖeɖovo tɔn ke le dɔn lɛɛ ni kɛ alɔ bo yi. ³² Exɔn tɔn, na e jlo Mawu u, un na wa mi de kpo awajijɛ ɖaxo kpo, bo na gbɔjɛ le cɛncɛn mitɔn. ³³ Mawu ke nɔ na fifa mɛ lɔ ni nɔ kpɔ xa mi me kpo! Ami!