¹ Mɛ lokpo lokpo na si ogan ke kpa cɛ do mi nu lɛ, ɖo acɛ kpikpa lɛ kpo wɛ sɔn Mawu de. ² Na mɛ ɖe sɔta acɛ kpikpa ɖe, e sɔta ojlo Mawu tɔn, bɔ mɛ ke gbɛ tonu se na ye lɛ, ye na da hwɛ na ye. ³ Na ye wa ɖagbe, ye ma sɔ na ɖi bu na acɛ kpikpa ti gɛ, ye na ɖi bu na ye hwenu ke ye wa nu ke ma sɔ gbe gɛ. A ma sɔ na ɖi bu na acɛ kpikpa lɛ gɛ wɛ? Wa ɖagbe na ye na kpa we. ⁴ ƐƐ, acɛ kpikpa lɛ le wa zɔn na Mawu na ɖagbe towe. Na awa nu ke ma sɔgbe, a do na ɖi bu ɖo acɛ kpikpa ɖo hɔnhlɔn ke na sa sɛn do we, bɔ e ma yi nu vɔvɔ wutu wɛ gɛ! Na acɛ kpikpa lɛ sa osɛn do mɛn, Mawu zɔn wɛ ye wa, ye le ɖe xomɛsi Mawu tɔn xlɛ nu yiylan wa tɔ lɔ. ⁵ Yɛn wɛ zɔn bɔ mi ɖo na se tonu na ye, e ma yi xomɛsi Mawu tɔn kɛ ɖɛ wutu wɛ gɛ, amɔ lilin mitɔn lɔsu le byɔ mi. ⁶ Yɛn wutu wɛ mi le su ta kwa. Azɔn wa na ta kwa tɔ lɛ le wa zɔn na Mawu wɛ. ⁷ Nu ke xɔ mi ɖu do mɛ ɖe, mi ze ni. Na ta kwa we, mi su, na mɔji kwa wɛ, mi su. Na tonu sise wɛ, mi se tonu, na sisi ɖo na mɛ lɛ bi sese wɛ, mi si mɛ. ⁸ Mi nɔ kpɔn ɖu axɔ nu ɖe tɔn do me ɖe gɛ, na e ma yi wanyiyi we we axɔ ke mi ɖu do mi ɖe gɛ. Mɛ ke yi wan na nɔvyɛ lɛ se tonu tawun na osɛn lɔ. ⁹ Mi yɔn osɛn lɛ lɔ wi: «Nɔ do afɔ gbe gɛ.Nɔ hu mɛ gɛ. Nɔ kpɔn jɛ ajo gɛ. Nɔ kpɔn jlo nu ke ma yi towe gɛ.» Osɛn exɔn lɛ kpodo dyɛ lɛ kposese kpo le oxo e kɔ mɛ: «Yi wan na awegɔ towe ɖi yɔ lɔsu ha!» ¹⁰ Na ye yi wan na mɛ, ye mɔ nɔ wa nu yiylan ti xa awegɔ mɛ tɔn gɛ. Na do ɖɔ wan yiyi, tonu sise nujɔnu tɔn na osɛn lɔ wɛ. ¹¹ Mi yɔ hwenu ke na mi le: Hwenu ke na mi ɖo na fɔn sɔn amlɔ mitɔn lɛ mɛ! Hwenu ke mi ɖi nu na Klisi, hwɛnlɛngan lɔ gbɛ kpo le dɛn do mi, odin e ko sɛ kpɔ mi bi. ¹² Ozan lɔ ko le vɔ, ayi na hɔn din. mi ni ɖe onu ma sɔgbe ke mi klo le zan mɛ lɛ kɔn yi gbe. Mi ni ze ahwan funu okle tɔn lɛ. ¹³ Mi ni zan gbɛ mimɛ ɖi okle tɔn wu ɖɔ un: Ɖudu kpo nunu kpo ni nɔ kpɔn xugan mi din gɛ. Mi nɔ kpɔn zan gbe ɖe jan gɛ, mi ni nɔ kpɔn nɔ zɔn le ke jlo mi gɛ, mi ni nɔ zɔ na nu trɔ, omɛ zunzun lɛ kpodo awuhwan kpo. ¹⁴ Mi ni wa nu ɖi Aklunɔ Jezu ha. Mi ni nɔ kpɔn jo nu yiylan do ni ɖu le mi ji do gbɔn ojlo yiylan mitɔn lɛ mɛ gɛ.