¹ Yisenɔ sunu, yɔnu, Mawu yɔ na mi tawun. Hun, un le byɔ mi nu kɔ: mi ze mi ɖe jo ni kpodo ogbɛ mitɔn kpo, avɔ sisan na Mawu ke nɔ yɔ ni xɛn. Bɔ sisɛn ɖagbe ke mi na blo ni xɛn. ² Mi nɔ kpɔn xodo ayihɔn mɛ we nu ke ye nɔ blo le fike mi le lɛ gɛ, amɔ mi jo Mawu lɔsu do na e na ɖyɔ mi do na mi nu yiyɔ ɛn yɔyɔ. Hwe exɔn nu mi na do mɔ nu kunu jɛ nu ke E le ba na mi lɔ wu.: Nu ke yɔ, nu ke e yin wan na, nu ke ye mɔ nɔ mɔ nu ti de go gɛ lɛ. ³ Mawu na un nu ɖagbe etɔn lɛ vɔnu. Un hɛn na ɖɔ na lokpo lokpo mitɔn lɛ ɖɔ: Mi nɔ kpɔn nɔ mɔ mi ɖe din xu le ke mi le gɛ, amɔ mi ni nɔ mɔ mi ɖe do le ke mi le, do gbɔn nu jlɛkpo nu ɖiɖi tɔn ke Mawu ma xa mi lɔ ji. ⁴ Onu susu wɛ lɛ agbaza mitɔn wu, bɔ ye me bi ka ma le wa nu lokpo lɔ gɛ. ⁵ Le xa wɛ, mye ke su, mi mɛ kpo yin onu lokpo bo sin mi ɖe do kpɔ le Klisi mɛ. Bɔ mi lɛ sin mi ɖe do mi ɖe wu, mɛ lokpo lokpo ɖo tɛn etɔn mɛ ɖi le ke nu lokpo lokpo ɖo tɛn etɔn mɛ le agbaza go ɖo ha. ⁶ Mi yin nu nina sɔn Mawu si, bɔ lokpo lokpo mitɔn lɛ tɔn gbɔn vo. Na mɛ ɖe ɖo nu nina ɖi xo yiɖɔtɔ ha, ni ɖɔ xo do gbe lokpo lɔ ha mɛ xa nu ɖiɖi mɛ lɛ kposese tɔn. ⁷ Na mɛ ɖe ɖo nu nina azɔn wiwa na mɛtɔn, ni wa zɔn, na mɛ ɖe ɖo nu nina nu kplɔn mɛ tɔn, ni kplɔn nu mɛ. ⁸ Na mɛ ɖe ɖo nu nina gan do na mɛ na mɛtɔn, ni do gan na mɛ na mɛ. Nu na mɛ tɔ ni na ma li nu kpɔn, mɛ kplan tɔ ni klpan kpodo akpakpa kpo, alɔ gɔ na oyanɔ tɔ lɛ ni blo kpodo awajijɛ kpo. ⁹ Wanyiyin mitɔn ni yin xojɔxo, mi gbɛ wan na onu yiylan bo wa ɖagbe bo ze mi ɖe jo na ɖagbe. ¹⁰ Mi yi wan na mi ɖe kpodo ayixa mitɔn kposese kpo ɖi nɔvisunu yɔnu yisenɔ ha. Mi yi mɛ nukɔ tɔn ke na nɔ si mi ɖe lɛ. ¹¹ Mi sɛn Mawu hwe binu, aɖiɖɔ ma le mɛ gɛ, amɔ kpodo ayixa mitɔn kposese kpo. ¹² Do adɔ gbigbo mitɔn wutu, mi nɔ awajijɛ mɛ. Mi nɔ ɖo sulu le nu gbo mɛ mitɔn lɛ mɛbo nɔ xo ɖɛ hwe lɛ kposese nu. ¹³ Mi gɔ alɔ na yisenɔ ke ɖo hudo etɔn lɛ, mi nɔ yi mɛ ke nɔ wa mi de lɛ ganji. ¹⁴ Mi nɔ jlo nu ɖagbe na mɛ ke nɔ do vivɛ sise na mi lɛ, mi jlo ɖagbe na ye, mi nɔ kpɔn ba yiylan ye tɔn gbeɖe. ¹⁵ Mi nɔ awajijɛ mɛ xa mɛ ke le awajijɛ mɛ lɛ, bo vi avi xa mɛ ke le vi avi lɛ. ¹⁶ Gbe nɔ kpɔ ni nɔ mi mɛ. Mi nɔ kpɔn nɔ ba onu ɖaxo din gɛ, amɔ mi nɔ jo mi ɖe do na onu kpowun lɛ. Mi nɔ kpɔn ze mi ɖe mɛjɔmɛ din gɛ. ¹⁷ Mi nɔ kpɔn ze yiylan do su axɔ yiylan gbeɖe gɛ, mi nɔ wa ɖagbe le mɛ lɛ kposese de. ¹⁸ Na mi kpego bɔ e na mi go, mi ba fifa xa mɛ lɛ kposese. ¹⁹ Nɔvi vivɛ na nɔ ce lɛ, mi nɔ kpɔn nɔ ba hlɔn mye lɔsu gɛ, mi jo xomɛsi Mawu tɔn do ni wa zɔn. Ɖo le wema mimɛ lɔ mɛ, Aklunɔ Mawu ɖɔ: Yen tɔn wɛ yi ohlɔn biba! onu ke mɛ lokpo lokpo jɛ xa yɛn wɛ na ze ni! ²⁰ Amɔ e lɛ le ɖɔ:«Na kɛntɔ towe le xovɛ, na ɛn ni ɖu, na kɔmɛ ci, na ɛn ni nu. Na ablo do le, e ci ɖi a ɖe zokan do ta ni ha.» ²¹ Nɔ kpɔn jo ɖe we do na onu yiylan ni ɖu le jiwe gɛ, amɔ ze nu ɖagbe do ɖu le nu yiylan ji.