¹ Nɔvisunu, yonu yisenɔ, un jlo do gbɔn ayixa ce kposese mɛ ɖɔ Juwifu lɛ ni mɔ hwɛnlɛngan, bɔ un nɔ byɔ Mawu na ye. ² ƐƐ, un hɛn na ɖɔ: Ye gɔ kpodo akpakpa na Mawu sisɛn kpo, amɔ akpakpa xɔn ma ɖo nu kunu mɔ jɛ nu mɛ do gbɔn nu yiyɔ ɛn ye tɔn mɛ gɛ. ³ Ye ma mɔ nu kunu jɛ le ke Mawu nɔ ze gbɛtɔ lɛ huzu jɔjlɔ nɔ ɖo gɛ. ye nɔ ba na ze ɖo dandan mɛ walɔ ye lɛ tɔn ke nɔ ze mɛ huzu nu jɔjlɔ nɔ. Bɔ ye gbɛ omɔ ke Mawu ɖe na ye bo na na bɔ gbɛtɔ lɛ na do yin hwɛ jijɔnɔ. ⁴ Na do ɖɔ, Moyizi we osɛn wa azɔn etɔn: yi wɛ yin Klisi, bɔ odin Mawu nɔ lɛ zun hwɛ jijɔ nɔ me ke gbɛ ɖi nu na Jezu Klisi lɛ. ⁵ Na Moyizi do le ɖɔ xo do hwɛ jijɔ ke sɔn osɛn, e ɖɔ: «Osɛn lɔ na na ogbɛ wu mɛ ke se tonu ni lɛ kposese.» ⁶ Mi kpɔn le ke e le ɖɔ xo do hwɛ jijɔ ke sɔn nu ɖiɖi lɔ mɛ ɖo: ⁷ Nɔ kpɔn nɔ ɖɔ le ayixa towe mɛ ɖɔ: «Mɛ na yi sɛ xwe?» bo na do ze Klisi jɛ te. Nɔ kpɔn nɔ ɖɔ ɖɔ: «Mɛ na jɛ te ɖo ayizan dɔmɛ?» Klisi ko fɔn sɔn mɛ ke ko ku lɛ cɛncɛn. ⁸ Le ke wema mimɛ lɔ ɖɔ xo do hwɛnlɛngan wu ɖo ke:«Oxo lɔ le akpa towe, le nu towe mɛ kpodo ayixa towe mɛ kpo.» Oxo xɔn we yin oxo nu ɖiɖi etɔn ke mi le la lɔ. ⁹ Onu towe ka nɔ ɖɔ le mɛ lɛ kpose nukɔn ɖɔ Klisi bɛ bo yin mɛ hwlɛngantɔ lɔ? A ɖi nu sɔn ayixa towe mɛ ɖɔ Mawu bo fɔn ɛn sɔn mɛ ke ku lɛ mɛ? E le le na we hun a na mɔ hwɛnlɛngan. ¹⁰ Na mi ɖi nu sɔn ayixa mitɔn bisese mɛ, Mawu nɔ ze mi zun hwɛ jijɔ nɔ, na mi ɖe nu ɖiɖi mitɔn xlɛ le mɛ lɛ kposese nu kɔn, E nɔ hwlɛn mi gan. ¹¹ ƐƐ, wema mimɛ lɔ ɖɔ: «Mɛ ke ɖi nu ni lɛ, e ma na vɛ na ye gbeɖe.» ¹² Vo gbigbɔn ti ma le Juwifu lɛ kpo man yin Juwifu lɛ kpo mɛ gɛ. Ye mɛ kposese wɛ ɖo Aklunɔ lokpo lɔ, E nɔ na ɖagbe wan yiyin etɔn wu mɛ ke nɔ yɔlɔ ɛ lɛ kposese. ¹³ Wema mimɛ lɔ ɖɔ: «Mɛ ɖe kpekpe ke ylɔ Aklunɔ na mɔ hwɛnlɛngan.» ¹⁴ Na ɖe wɛ mi na ɖɔ xo na Aklunɔ ɖo na mi ma ɖi nu ni gɛ? Na ɖe wɛ mi na ɖi nu na Aklunɔ ɖo na ye ma ɖɔ xo etɔn na mi gɛ? Bɔ na ɖe wɛ ye na ɖɔ xo etɔn na mi ɖo hwenu ke mɛ ti ma la gɛ? ¹⁵ Bɔ na ɖe wɛ ye na la oxo etɔn na mi ɖo na ye ma sɛ mɛ ti do xlan gɛ ɖo? Wema mimɛ lɔ ɖɔ ganji ɖɔ: «Awajijɛ ɖaxo e na yin mi hwenu ke mi mɔ oxo Mawu tɔn la tɔ lɛ ja.» ¹⁶ Amɔ mɛ lɛ kpo ma ɖi nu na Wɛn Ɖagbe lɔ gɛ. ƐƐ, Ezayi ko ɖɔ: «Aklunɔ, mɛ ɖi nu na oxo mitɔn?» ¹⁷ Ye nɔ yin nu ɖi tɔ hwenu ke ye se Owɛn lɔ, bɔ Owɛn exɔn we yin oxo Mawu tɔn. ¹⁸ Bɔ un nɔ kanse yinɖe ɖɔ: «Mi se wɛn do tɔ lɛ we gbe le ayizan lɔ kpokpo ji, bɔ oxo ye tɔn ma hwe do filɛ gɛ.» ¹⁹ Bɔ un nɔ kanse ɖɔ: Togun Izrayɛli tɔn ma mɔ nu kunu jɛ mɛ gɛ wɛ? Mawu ko ɖɔ do gbɔn Moyizi we nu ɖɔ: «Un na ze mi do zun ahwanlɛnɔ na ye mɛ ke ma yin togun xojɔxo tɔn lɔ gɛ. Na ze mi huzu xomɛsinɔ na togun ke nu yiyɔ ɛn bu do lɛ.» ²⁰ Bɔ Ezayi lɔsu ko ɖɔ do gbɔn ajlo Mawu tɔn mɛ: «Mɛ ke ma le ba un lɛ gɛ, ye lɛ wɛ mɔ un. Bɔ un ze yɛn ɖe xlɛ mɛ ke ma le kan nu ti se un gɛ lɛ.» ²¹ Amɔn na togun Izrayɛli tɔn, Mawu ɖɔ: «Gbelokpo le, un drɛn alɔ ce lɛ ɖo xlan togun ke mɔ nɔ se tonu gɛ, bo nɔ sɔ ta un.»