¹ Wlan wema na wɛnzangu ke le agun Saadu tɔn ji: «Owɛn mɛ ke oyɛ cyanwe Mawu tɔn kpodo sunvi cyanwe lɛɛ kpo. Un nyɔ nu ke a le blo lɛɛ kpo wi. Mɛ lɛ nɔ mɔ ɖɔ a bo le gbɛ, amɔ a ko ku! ² Fɔn! Blo na nu ke le gbɛ le yɔ mɛ lɔ ni lido, e ma nyi lexa e na ku. Un mɔ walɔ susu ke ma sɔgbe le Mawu ce we nukɔn gɛ. ³ Flin nukplɔnmɛ ke a yi bo se. Hɛn e go bo ɖyɔ gbɛzan towe. Na a ma fɔn gɛ, na wa wle we le ajijimɛ ɖi ajotɔ ha. A ma si nyɔ hwenu ke na wa ɖo gɛɛ. ⁴ Co, mɛɖe lɛ le mi mɛ le Saadu, mma hɛn onu yetɔn lɛɛ kuɖi gɛ. Mɛ exɔn lɛ na zɔn xa un do wa le awu wewe mɛ, ɖo ye jɛ xa. ⁵ Ɖuɖeji tɔ lɛ na do awu wewe. Un ma le susu nyikɔ yetɔn le ogbɛwema lɔ mɛ gɛɛ, Na tɛ oɖɛ eji le Ta ce kpo wɛnzangun lɛɛ kpo we nukɔn:"Mɛ ekɔ lɛɛ, ce wɛ ye nyi". ⁶ «Mɛ ke ɖo oto ni se nu ke Oyɛ ɖeɖovo lɔ le ɖɔ na agun lɛɛ!» ⁷ Wlan wema na wɛnzangun agun Filadɛlufii tɔn. «Owɛn mɛ ke mɛ lɔ tɔn ke bo nɔ lɛ ɖɔ xojɔxo. E hɛn axɔlu Davidi we cavi wu, e hun mɛti mɔ nɔ su gɛɛ, e su mɛɖe mɔ nɔ kpego bo nɔ hun gɛ. ⁸ «Un nyɔ onu ke a blo lɛɛ bisese wi. Kpɔn: un ze ohɔn le nuvo ɖe do nukɔn towe, mɛti ma kpego bo na suwi gɛ. A ma ɖo hɔnhlɔn susu gɛ, co a ɖu le oxo ce ji, bɔ a ma ɖɔ mye bo ma nyɔ un wi gɛ. ⁹ Omɛ ke nyi awovi tɔn lɛ nɔ ɖɔ e mye lɛ bo nyi Jwifu, bo ka do nyi awo, ɖo ye ma nyi gɛ. Yike, nu ke na blo ha ye lɔ ke: Na blo bɔ ye na jɛ klo le nukɔn towe, bɔ ye na do nywɛ ɖɔ un nyi wan na we. ¹⁰ A hɛn oxo ce wu nugbo tɔn, hun nyɛ lɔsu, na hɛn sɔ we le onu nyinyla lɛɛ hwenu. Ɛɛ, onu nyinyla lɔ na jɔ do ogbɛ lɔ kpokpo ji, bo na do nyɔ yɛyi mɛ ke le anyizan tɔn lɛ ji. ¹¹ Na wa odin zanɖe. Nu ke a ɖo, hɛn syɛnsyɛn, hwe exɔn nu mɛti ma sixu yi ajɔ towe gɛ. ¹² Mɛ ke na ɖo ɖuɖeji, na ze e do trɔzun dodonu sisɛnxɔ Mawu ce tɔn, bɔ e ma si tɔn gbeɖe. Na wlan nyikɔ Mawu ce tɔn do e go, kpodo nyikɔ yɔyɔ ce kpo. ¹³ «Mɛ ke ɖo oto ni se nu ke Oyɛ ɖeɖovo lɔ le ɖɔ na agun lɛɛ!» ¹⁴ «Wlan wema na wɛnzangun agun Lawodisee tɔn: «Owɛn mɛ ke nyi Ɛɛ Mawutɔn. E nyi kunnuɖetɔ ke le gbeji bo nɔ ɖɔ xojɔxo, E le bibɛnu na onu ke Mawu blo lɛɛ kpo sese. ¹⁵ Un nyɔ onu ke a blo lɛɛ kpo sese wi. A ma fa gɛ, a ka ma lɛ jɔ adan gɛ. Un ba ɖɔ a ni fa bo lɛ jɔ adan! ¹⁶ Amɔ ke a le cɛncɛn me na awe lɛɛ, a ma fa, a ma ka lɛ jɔ adan gɛ, na tun we sɔn onu ce mɛ. ¹⁷ A nɔ ɖɔ: un nyi dɔkunnɔ, un ɖo akwa susu, un ma ɖo nuti we hudo gɛ. Amɔ nugbo mɛ, lelenɔ wɛ a nyi , nu towe nɔ bla wu, oyanɔ wɛ a nyi, mɛ ke le omɛn bo lɛ gba nukun, bɔ a ma lɛ nywɛ gɛ. ¹⁸ E wɛ zɔn bɔ un le ɖɔ na we: xo sika ke ozo ze do trɔ zun onu xɔ akwa lɔ le asye, bɔ a na trɔ zun adɔkunnɔ. Xɔ onu wewe bo na do, na a ma si do lɛ le omɛ bɔ wuyan na nɔ wa we gɛ. Xɔ atinkɛn bo do nukun towe lɛ ji, na a do mɔ nu ganji. ¹⁹ Mɛ ke un nyi wan na lɛ kpo sese, un nɔ gbɛ nu na ye, bo nɔ lɛ sa osɛn do ye. Ɖe ojlo towe xlɛ kpɛɖe bo ɖyɔ gbɛzan towe! ²⁰ I ke; un le ohɔn lɔ ji bo le xuxu. Na mɛɖe se ogbe ce bo hun ohɔn na un, na byɔ oxɔ etɔn mɛ, na ɖunu xa ɛ. ²¹ Nyɛ, un nyi ɖudejitɔ bɔ un nyi flɔn anyi kpo Ta ce kpo le axɔluzinkpo lɔ ji. Hun, ɖudejitɔ lɛɛ, na ze ye ze flɔn axɔluzinkpo ce ji gba. ²² «Mɛ ke ɖo oto ni se onu ke Oyɛ ɖeɖovo lɔ le ɖɔ agun lɛɛ.»