¹ Exɔn godo un mɔ jihwle yɔyɔ kpo anyizan yɔyɔ lɔ kpo. Jihwle nukɔntɔn lɔ kpo anyizan nukɔntɔn lɔ kpo bu, bɔ oxu ma sɔ le gɛ. ² Un mɔ toxo mimɛ ke nyi Jeluzalɛmu yɔyɔ lɔ; Mawu ze e ɖo xlan bɔ e le jɛ te sɔn oji. E ɖo gbesisɔ yɔyɔ ke sɔ nu bo na yi asuxwe ha. ³ Unse gbe ɖaxo ɖe sɔn axɔluzinkpo lɔ kɔn, bo le ɖɔ ɖɔ: "Odin nɔntɛn Mawu tɔn le gbɛtɔ lɛ cɛncɛn! E na nɔ xa ye bɔ ye na nyi tohun etɔn. Mawu lɔsu na nɔ kpɔ xa ye, bo na nyi Mawu yetɔn. ⁴ E na susu ɖasin lɛ kpokpo sɔn nukun yetɔn mɛ; oku ma sɔ na le ba gɛ, aluɛmɛ ninɔ ma sɔ na le ba gɛ, alenina ma sɔ na le ba gɛ, wuvɛ mimɔ ma sɔ na le ba gɛ; onu xoxo lɛ ko bu." ⁵ Hwe exɔn nu, mɛ ke le anyi fiflɔn le axɔluzinkpo lɔ ji ɖɔ:"Odin un le ze nu lɛ kposese ze huzu nu yɔyɔ." E lɛ ɖɔ na mi ɖɔ: "Wlan, ɖo oxo nugbo wɛ nyi oxo exɔn lɛ bisese, bo nyi oxo ke wu ye na ɖeji do." ⁶ E lɛ vɔ ɖɔ: "Eya lo! Nyɛ wɛ nyi alfa bo nyi omɛga; un nyi bibɛ, bo nyi vivɔ. Un na na osin wu mɛ ke kɔmɛ le ci lɛ bɔ e na nu vɔvɔ le fi ke osin ke nɔ na ogbɛ mɛ lɔ nɔ sɔn. ⁷ Mɛ ke na ɖu le ji, un na na ɛ nunina ɛnɛ; un na nyi Mawu etɔn, bɔ e na nyi ovi ce. ⁸ Amɔ nuvɔnɔ lɛɛ, numaɖitɔ lɛɛ, suɖutɔ lɛɛ, mɛhutɔ lɛɛ, agalɛtɔ lɛɛ, magikiblotɔ lɛɛ, yɛhwesintɔ lɛɛ kpo adingbannɔ lɛɛ kpo sese kpo, tɛn yetɔn na nɔ ozo maci mɛ, yi wɛ nyi oku awegɔ. ⁹ Wɛnzagun cnyawe ke hɛn sinugannu cnyawe ke mɛ awe cnyawe godogodo tɔn lɛ gɔ ɖokpo wa ɖɔ na un ɖɔ: "Waa! un na xlɛ asi yɔyɔ lɔ we, lɛngbɔvi lɔ we asi." ¹⁰ Yɛ ɖeɖovo lɔ wa bɔ wɛnzagun lɔ ze un yi oso ɖaxo ɖe ji; oso lɔ yi ji tawun. E xlɛ un toxo mimɛ Jeluzalɛmu tɔn ke Mawu ze ɖo xlan, bɔ e le jɛte sɔn jihwle. ¹¹ E ɖo gigo Mawu tɔn bo nɔ klɛnzo. Toxo lɔ nɔ dazo ɖi opɛn ke xɔ akwa ɖaxo ɖe xa; okpɛn ke nɔ ylɔ ɖɔ jasipee ha, e nɔ zawe ɖi nukpɔn ɛn ke mɛ e nɔ mɔ nu gbɔn ceɖeceɖeha. ¹² Ye ɖo ado ɖaxo ɖe lɛlɛ do, ado lɔ yi oji tawun. Hɔntogbo wyawe wɛ e ɖo, bɔ wɛnzagun wyawe le cɔ ohɔn lɛ. E wlan akɔta wyawe Izrayɛli tɔn lɛ we nyikɔ do ohɔn lɛɛ wu. ¹³ Hɔntogbo atɔn le akpa ɖokpo ɖokpo xwe: Atɔn le hwetɔn hweji, atɔn le totaligbe, atɔn le tofɔligbe, bɔ atɔn le hweyixɔ. ¹⁴ Ado ɖaxo ke e mɛ do lilɛ do toxo lɔ, okpɛn wewe jiwɛ ye do do ɖo, e wlan lɛngbɔ vi lɔ we mɛɖoxlan wyawe lɛ we nyikɔ do okpɛn ɛnɛ lɛ wu. ¹⁵ Wɛnzagun ke le ɖɔ xo na un, hɛn nujlɛkpo ɖokpo, bo na do jlɛ toxo lɔ kpo hɔntogbo etɔn lɛ kpo, kpo ado ke e ɖo do lilɛ do e lɛ kpo. Nujlɛkpo exɔn, dawetin wɛ, bɔ e ze sika do blo. ¹⁶ Toxo lɔ we akpaxwe ɛnɛ lɛ nyi nujlɛkpo lokpo lɔ; zwe ɛnɛ lɛ nyi lokpo lɔ. Wɛnzagun lɔ ze dawetin etɔn bo jlɛ toxo l: Gaɖiɖi etɔn nyi afɔ atɔɔn donu wyawe (12.000). Gbigblo etɔn kpo jinyinyi etɔn kpo nyi nu lokpo lɔ xa galili etɔn. ¹⁷ Wɛnzagun lɔ jlɛ ado lɔ gba, bɔ jiyiyi etɔn nyi alɔba kantɔn konukun ɛnɛ(144); jlɛnu xɔn ke e do jlɛ nu ne lɔ ci ɖi ke gbɛtɔ nɔ do jlɛ nu na ha, bo nyi lokpo lɔ xa wɛnzagun lɔ tɔn. ¹⁸ Opɛn ke e nɔ ylɔ ɖɔ jasipee lɔ e wɛ e do ɖo ado lɔ, bɔ toxo lɔ lɔsu nyi sika aku, bo taa ɖi nukpɔn ɛ ke mɛ e nɔ mɔ gbɔn ceɖeceɖe ha. ¹⁹ Ye ze okpɛn ke xɔ akwa tɛnmɛ tɛnmɛ lɛ bo do ba acɔ na okpɛn dodo ke ji wɛ ye ɖo ado toxo lɔ tɔn ɖo lɛ: Okpɛn exɔn ye nɔ yolɔ ɖɔ jasipee, yi wɛ ye do ba cɔ na okpɛn dodo titan lɛ, bo ze saffi do ba acɔ na okpɛn dodo awegɔ lɛ, bo ze agati do ba acɔ na okpɛn dodo atɔngɔ lɛ, bo ze emɛlodu do ba acɔ na okpɛn dodo ɛnɛgɔ lɔ. ²⁰ Ye ze onisi do ba acɔ na okpɛn dodo atɔngɔ lɔ, bo ze sadwani do ba cɔ na okpɛn dodo ayizɛngɔ lɔ, bo ze klizoliti do ba acɔ na okpɛn dodo cyanwegɔ lɔ, bo ze belilu do ba cɔ na okpɛn dodo cyantɔngɔ, bo ze tokpazi do ba cɔ na okpɛn dodo cnyɛnɛgɔ, bo ze klizoplazi do ba cɔ na okpɛn dodo awogɔ lɔ, bo ze yasɛnti do ba acɔ na okpɛn wo-ɖokpogɔ, bo ze amɛtizi do ba acɔ na okpɛn dodo wyawegɔ. ²¹ Hɔn wyawe lɛ nyi ojɛ wyawe; ojɛ ɖokpo wɛ ye do blo ohɔn ɖokpo. Omɔ toxo lɔ tɔn nyi sika aku, bo zawe ɖi nukpɔn ɛ ke mɛ ye nɔ mɔ nu gbɔn ceɖeceɖe ha. ²² Un ma mɔ ɖɛxoxɔ ɖe le toxɔn mɛ gɛ, ɖo Aklunɔ mitɔn Mawu ke kpe nulɛkposese wu yi wɛ nyi toxo lɔ we ɖɛxoxɔ, lexa ke, lɛngbɔvi lɔ wɛ ɖɛxoxɔ etɔn. ²³ Toxo lɔ ma ɖo hudo oxwe kpo sun kpo tɔn bo na do na bɔ mi na mɔ nukunnu gɛ, ɖo susu Mawu tɔn nɛ ɛ hihɔn, bɔ lɛngbɔvi lɔ nyi zogbɛn etɔn. ²⁴ Togun ke le ogbɛ lɔ mɛ lɛ na ɖi zɔnlin gbɔn hihɔn etɔn nu, bɔ axɔlu anyizanji tɔn lɛ na hɛn dɔkun yetɔn lɛ wa toxo lɔ mɛ. ²⁵ Toxo lɔ hɔntogbo lɔ na nɔ hunhun le okle lɔ kpo sese mɛ; e ma le sui gbeɖe gɛ, ɖo zan ma le ku le flɛn gɛ. ²⁶ Ye na hɛn susu kpo dɔkun oto lɛ tɔn kpo wa toxo lɔ mɛ. ²⁷ Amɔ nu kuɖikuɖi ɖe ma le byɔ toxo exɔn mɛ gɛ; mɛ ke nɔ jo yeɖe lɛ do na suɖunu kpo awoɖiɖo lɛ kpo, ɖe ma le byɔ toxo exɔn mɛ gɛ. Mɛ ke we nyi kɔ e na wlan do gbɛwema ke nyi lɛngbvi lɔ tɔn mɛ kɛɖɛ wɛ na byɔ toxo lɔ mɛ.