¹ Wɛnzangun lɔ lɛ xlɛ un osin ke nɔ na ogbɛ mɛ we tɔsisa, bɔ e le tɔn sɔn Mawu kpodo lɛngbɔvu lɔ kpo we axɔlu zinkpo lɔ mɛ, bo na ɖiɖɛ ɖi nukpɔn ɛn ke mɛ ye nɔ mɔ nu le ceɖe eɖe ha. ² E nɔ le sa gbɔn toxo lɔ we omɔ cɛncɛn. Atin ke nɔ na ogbɛ mɛ lɔ le tɔsisa lɔ we akpa lokpo lokpo xwe; e nɔ sɛn hwlan wyawe le oxwe ɖokpo mɛ; Sunzan ɖokpo ɖokpo mɛ wɛ e nɔ sin; e nɔ ze ama etɔn do gbɔ azɔn na oto lɛ. ³ Nuɖe ma le toxo lɔ mɛ bɔ Mawu do onu gɛ. Axɔlu zinkpo Mawu kpo lɛngbɔvu lɔ tɔn kpo na nɔ toxo lɔ mɛ, bɔ mɛsɛntɔ Mawu tɔn lɛ na nɔ sɛn Mawu. ⁴ Ye na mɔ nukun mɛ n'i; ye na wlan nunkɔ etɔn do nunkɔnnu na ye. ⁵ Ozan ma sɔ na nɔ ku gɛ; ye ma sɔ ɖo hudo hihɔn zogbɛn tɔn ba gɛ; ye ma sɔ ɖo hudo hohɔn ohxwe tɔn ba gɛ, ɖo Mawu Aklunɔ na kɔn hihɔn etɔn kɔn nyi ye ji, bɔ ye na ɖu axɔlu kaka do yi. ⁶ Exɔn godo, wɛnzagun lɔ ɖɔ na un ɖɔ: "Oxojɔxo wɛ nyi oxo ekɔ lɛ, bo nyi oxo ke go ye na ɖe ji do lɛ. Bɔ Mawu Aklunɔ ke nɔ ze oxo ke gbeyiɖɔ lɛ na ɖɔ do ayimɛ na ye ɖoxlan sɛ wɛnzagun etɔn do, bɔ e na xlɛ nu ɖo na jo le ma ɖɛɛn mɛ din lɛ wu wɛnzagun etɔn lɛ.» ⁷ Jezu ɖɔ: "Ɖoto! Un na wa le maɖɛn maɖɛn mɛ din! NU nyɔ na mɛ ke nɔ se tonu na oxo ɖoɖayi ke le wema ekɔ mɛ lɛ." ⁸ Nyɛ Jaan, un se oxo lɛ, bo mɔ onu exɔn lɛ. Ke un se oxo exɔn lɛ bo mɔ onu exɔn lɛ godo, un jɛ klo le wɛnzagun ke xlɛ nu exɔn lɛ we akɔnmɛ, bo na ɖe kɔ n'i. ⁹ E ka ɖɔ na un ɖɔ: "Gbɔ! Nɔ kpɔn blo le gɛ! Mɛsɛntɔ wɛ un nyi ɖi yɔ kpo anɔevi gbeyiɖɔ lɛ kpo ha; bo lɛ nyi mɛsɛntɔ ɖi mɛ ke nɔ se tonu na oxo ke ye wlan do wema ekɔ lɛ mɛ ha. Mawu wɛ a ɖo na ɖe kɔ na." ¹⁰ Exɔn godo, e ɖɔ na un ɖɔ:"Oxo ɖɔɖayi ke e wlan do wema ekɔ mɛ lɛ, nɔ kpɔn ci eji gɛ, ɖo hwenu ke e ɖo bɔ nu exɔn lɛ bi na do jɔ ko sɛkpɔ. ¹¹ Mɛ ke nyi danuwatɔ ni gbɛnkan do danu wiwa etɔn go; mɛ ke nyi mɛ kuɖi kuɖi ni dogan do e go; mɛ ke nyi mɛ ɖagbe ni do gan do ɖagbe wi wa etɔn wu; mɛ ke nyi mɛ mimɛ ni fɔn bo le nyi mɛ mimɛ etɔn tɛgbɛ." ¹² Jezu ɖɔ: "Ɖo to! Un na wa le madɛɛn madɛɛn mɛ din! Un na hɛn ajɔ ce lɛ wa, bo na na mɛ ɖokpo ɖokpo, bɔ e na sɔ gbe ha nu ke e wa. ¹³ Un nyi alpha, bo nyi omɛga, mɛ nukɔntɔn, bo nyi omɛ godogodo tɔn; Un nyi bibɛ, bo nyi fifo." ¹⁴ Nu nyɔ na mɛ ke nɔ nya awu gaga ye tɔn lɛ, bo na do ba acɛ ke na ɖu atin ke nɔ na ogbɛ mɛ lɔ we sinsɛn; bo na do acɛ ke e na do gbɔn toxo lɔ we hɔntogbo lɔ nu do byɛ toxo lɔ mɛ. ¹⁵ Amɔ, duvi lɛ, magikiblotɔ lɛ, ogalɔtɔ lɛɛ, mɛhutɔ lɛɛ, yɛhwesɛntɔ lɛɛ, kpo mɛ ke nyi wan na awo, bo nɔ wa awo zɔn lɛɛ bi kposese na nɔ toxo lɔ we godo. ¹⁶ "nyɛ Jezu, un ɖo wɛnzagun ce ɖoxlan mi, na e na ɖɔ nu exɔn lɛɛ kpokpo na mi le agun lɛɛ mɛ. Davidi we hɛnnu mɛ wɛ e ji un ɖe; un nyi sunvi zanfunnu tɔn ke nɔ flɛn lɔ." ¹⁷ Oyɛ ɖeɖovo Mawutɔn kpodo nyɔnuvi ke wle alɔ lɔ kpo le ɖɔ: «Wa!» Mɛ ke se ɖo na ɖɔ: «Wa!» Mɛ ke kɔmɛ le ci ɖo na wa. Mɛ ke jlo na yi osin ke nɔ na gbɛ mɛ lɔ fata. ¹⁸ Mɛ lɛ kposese ke le se oxo Mawu tɔn ke ye wlan do wema kɔ mɛ, mi kpɔn nu ke nyɛ Jaan un le ɖɔ: Na mɛɖe kpekpe gɔ nuɖe na, Mawu na do oya gban n'i ɖi le ke ye ɖɔ ɖo le wema lɔ mɛ. ¹⁹ Na mɛɖe kpekpe ɖe wema kun ɖokpo le wema kɔ mɛ, Mawu na ɖe akpa dido etɔn sɔn e ji ke le wema kɔ mɛ: E ma si sɔ ɖu atinsisɛn atin ke nɔ ogbɛ mɛ lɔ tɔn gɛ, kaka do lɛ byɔ toxo mimɛ lɔ mɛ gɛ. ²⁰ Jezu ɖe kunnu na ɖɔ nu lɛ kpose nyi xojɔxo bo ɖɔ: «Ɛɛ, na wa odin zanɖe!» Ami! Wa Aklunɔ Jezu! ²¹ Na Aklunɔ Jezu ni do na mi mɛ bisese!