¹ Amɔ le odin, anɛvi sunnu nyɔnu, mi nɔ awajijɛmɛ do Aklunɔ wutu! E ma ɖi nuti na un na un do le wlan nu lokpo lɔ do xlan mi gɛ, bɔ na mye lɛ tɔn, kandeji ta un wɛ! ² Mi cɔ miɖe do azɔnwatɔ nyinyla lɛ wu, duvi xɔn lɛ ke nɔ ze yɛyi na adagbigbo kɛɖɛ! ³ Mɛ ke gbo ada nujɔnu tɔn lɛ, mye wɛ. Mi le wa zɔn na Mawu do gbɔn alɔgɔ Yɛ Ɖeɖovo lɔ tɔn mɛ, mi ze jiɖiɖe mitɔn do Mawu mɛ, mi ma ze do mye lɔsu mɛ gɛ. ⁴ Co, nyɛ, un ɖo jiɖiɖe do nyɛ ɖe mɛ. Na mɛ ɖevo ɖe si ɖo linlin ɖɔ ohwɛ mye tɔn bo jɔ na mye bo do ɖe ji do mye ɖe wu, moi, un hɛn na lɛ lin xu le. ⁵ Ye ji un e blo azan cantɔn wɛ un gbo ada, ye ji un Izrayɛli vi, bɔ un tɔn sɔn akɔta Benjamɛ tɔn mɛ. Dagbo ce lɛ bi wɛ nyi Juwifu, bɔ un nɔ nyi sɛn Moyizi tɔn lɛ, ɖi Farizinu gbejinɔtɔ ha. ⁶ Un do vivɛsise na agun ta un. Do gbɔn nujijlɔ osɛn lɔ tɔn mɛ, e ma si gbɛ nuɖe na un gɛ. ⁷ Un dɔn gbɛtɔ susu kpo nu exɔn lɛ kpo, amɔ odin, ke na un nyɔ Klisi wi, un wa mɔ ɖɔ onu vɔ wɛ nyi nu exɔn lɛ. ⁸ - ⁹ ) Onu taji lɔ wɛ nyi nyɔ Klisi Aklunɔ ce wi. Na nyɛ, ajɔ ke le mɛ, e ma nyi nuɖevo zɛna nu nyinywɛ xɔn gɛ. Na eyɔ, un jo nulɛ kpose do. Na do nyi lokpo xa Klisi, un nɔ ze nu exɔn lɛ kpose do mɔ ogbo. Un ma nyi hwɛjijɔnɔ ɖo un nyi sɛn lɔ wutu gɛ, amɔ do gbɔn nuɖi na KLisi mɛ wɛ. Mawu wɛ nɔ ze mɛ zun hwɛjijɔnɔ, bɔ mɛ ke ɖinu E nɔ trɔ ɛ zun hwɛjijɔnɔ. ¹⁰ Onu lokpo ge ke un le ba, yi wɛ nyi nyɔ Klisi wi kpodo hɔnhlɔn ke fɔn ɛn sɔn ku lɔ kpo. Nu ke un le ba, na ji ya xa Klisi bo na ɖi le oku etɔn mɛ. ¹¹ Hwe exɔn nu un ɖi ɖɔ nyɛ lɔsu na fɔn sɔn ku. ¹² Un ma si ɖɔ un ko ɖu le ji gɛ, alo un un le gbesisɔ mɛ gɛ! Amɔ un gbɛ kpo le do wezun na do ɖu ajɔ lɔ, ɖo Jezu Klisi ko do alɔ awye. ¹³ Ewo, nɔvi sunnu nyɔnu, un ma ɖi ɖɔ un ko yi ajɔ lɔ gɛ, amɔ un nɔ wɔn omɔ ke le godo na un lɔ, bo ze ayixa ce do nuke le nukɔn na lɛ ji, bɔ onu vivɛ ke un nɔ blo lɔ ke: ¹⁴ Un le wezun ji na do wle nu ke le nukɔn na un lɔ, bo na do ɖu ajɔ lɔ. Mawu ylɔ mi sɔn ji na mi na do nyi do gbɔn Jezu Klisi mɛ. ¹⁵ Mi mɛ ke nyi yisenɔ mɛxo lɛ, mi ɖo na nɔ lin nu do lexa. Bɔ na fiɖe le na mi ma ɖo nukunu mɔ jɛ numɛ ganji gɛ, Mawu lɔsu na hun ayixa mitɔn deji. ¹⁶ Mi gbɛn kan do omɔ lokpo lɔ ke mi ze d'anyi lɔ kaka do wa jɛ din lɔ ji! ¹⁷ Nɔvi sunnu nyɔnu, mi ɖi un le nuwiwa mɛ. Mi na xlɛ lɔ. Mi kpɔn do mɛ ke le zan gbɛ do xlɛ lɔ wu lɛ go. ¹⁸ Un nɔ ɖɔ na mi hwɛhwɛ, bɔ un lɛ le ɖɔ le agbedin kpo avi kpo ɖɔ: omɛ susu le zan gbɛ do le sɔta akluzu Klisi tɔn. ¹⁹ Ye na wa nyi didɔn gbenu. Adɔgo yetɔn wɛ nyi Mawu yetɔn, nu ke na wa nyi wyan ɖaxo na ye wɛ nyi ye ɖe zize! Yelɛ nu ke nyi ayizan ji tɔn le jɛn nɔ myan nukun na ye. ²⁰ oto mye lɛ tɔn le sɛxwe, bɔ mɛ ke mye lɛ le te kpɔn wɛ nyi Aklunɔ mitɔn Jezu Klisi ke na sɔn sɛxwe bo na wa lɔ. ²¹ E na dyɔ agbaza mitɔn ma ɖo gan lɔ do zun agbaza gigonɔ eyɔ tɔn. E ɖo hɔnhlɔn na do ze nu lɛ kpo do acɛ etɔn gɔ.