¹ Jezu byɔ amisaxɔ lɔ mɛ bo mɔ dahwe ɖokpo bɔ alɔgba etɔn awe lɛ kplibɔ. ² Gbɛtɔ ɖe lɛ le kpɔn ɛ ganji tɔn ɖɔ e na gbɔ azɔn na dahwe lɔ le gbɔjɛzangbe ja. ³ Jezu ɖɔ na dahwe ke alɔ kplibɔ na lɔ ɖɔ: «Cite bo wa nɔ cɛncɛn mɛ fi.» ⁴ Bɔ Jezu le ɖɔ na togun lɔ: «Ye hɛn ye na wa nu ɖagbe alo onu nyinyla le gbɔjɛzangbe, alo ye hɛn ye na hwlɛn gbɛtɔ gan le gbɔjɛzangbe, kabi ye ni jo e do na ni ku?» Bɔ ye mɛ kposese ci xi i onu ma kɛ. ⁵ Jezu kpɔn ye me bisese kpodo xomɛsi kpo, bɔ e lɛ bla u n'i ɖo ye ma ba na ɖo mɔjɛmɛ etɔn gɛ. Jezu ɖɔ na dahwe lɔ ɖɔ: «Drɛn alɔ towe!» Dahwe lɔ drɛn alɔ bɔ alɔ etɔn gbɔ. ⁶ Azɔn ɖokpo Falizinu lɛ tɔn sɔn sisɛnxɔ lɔ mɛ, bo yi ɖo kple xa Elodu we mɛ lɛ bɔ ye le to le ke ye na hu Jezu ɖo. ⁷ Bɔ Jezu kpodo ahwanvi etɔn lɛ kpo sɔ mɔ do oxu to, kpodo gbɛtɔ susu ke sɔn Galilee kpo Judee tome kpo, ⁸ Jeluzalɛmu tomɛ, Idumɛ tomɛ, toxo ke le akpaxwe dɔn na Judɛn lɔ, toxo Sidɔn kpo Tyr kpotɔn. Gbɛtɔ lɛ susu se nu ke Jezu le blo bo wa ede. ⁹ Jezu ɖɔ na ahwanvi etɔn lɛ ɖɔ ye ni bo ba tɔjihun ovu kle u ɖokpo na emye ɖo gbɛtɔ lɛ su bɔ e le mɔ ɖɔ ye bo na ɖi zɔnli gbɔn emye ji bo na li emye. ¹⁰ Ɖo e le gbɔ azɔn na gbɛtɔ susu lɛ bɔ azɔntɔ lɛ susu le jlo bo na sɛkpɔ ɛ bo na do ɖ'alɔ e go. ¹¹ Hwenu ke oyɛ mawe lɛ le mɔ Jezu, ye jɛ klo le nukɔn n'i bo nɔ d'axwa bo nɔ ɖɔ: «A nyi ovi Mawu tɔn.» ¹² Jezu le eɖ gbe do ye le nujɔnu mɛ bo le ɖɔ na ye ɖɔ: «Mi nɔ kpɔn ɖɔ mɛ ke un nyi gɛ.» ¹³ Jezu xlɛ oso ji bo ylɔ mɛ ke jlo e lɛ bɔ ye wa akpa n'i. ¹⁴ Jezu cyan gbɛtɔ wyawe ke e ylɔ lɔ ɖɔ apotru bɔ ye na do nɔ kpɔ xa ɛ bo na do sɛ ye do bɔ ye yi ɖɔ xo Mawu tɔn kpo acɛkpikpa kpo do nya oyɛ mawe lɛ. ¹⁵ Jezu na ye acɛ kpodo hɔnhlɔn kpo bɔ ye na do nya oyɛ mawe lɛ. ¹⁶ Jezu cyan gbɛtɔ wyawe: Sinmɔɔ ke e nɔ ylɔ ɖɔ Pyɛɛ, ¹⁷ Jaki Zebzde we vi kpodo nɔvyɛ Jaan ke e na nyikɔ u ɖɔ xɛviyoso we vi. ¹⁸ Ana lɛ mɔ Andle, Filipu, Batelemi, Matie, Tɔma, Jaki Alfe vi lɔ, Tade, Sinmɔɔ ohunjɛɖotojitɔ, ¹⁹ kpodo Juda Iskaliɔtu ke na wa sɛ lɔ kpo. ²⁰ Exɔn godo, ye wa yi xwegbe, bɔ gbɛtɔ lɛ su bo xo do ye ɖevo kaka bɔ ye ma trɛ si kpego bo na ɖunu gɛ. ²¹ Hwenu ke na otɔ, onɔ kpodo nɔvyɛ lɛ kpo se le, ye wa bo na wle Jezu ɖo ye le ɖɔ ɖɔ: «Oma bɛ e bo bɛ» ²² Osɛnkplɔnmɛtɔ ke jɛte sɔn Jeluzalɛmu tomɛ lɛ nɔ ɖɔ: «Jezu ɖo Bezebulu le gbɛzan etɔn mɛ, bɔ Awovi lɔ wɛ le na hɔnhlɔn wi i bɔ e do le nya oyɛ mawe lɛ. ²³ Jezu ylɔ ye do wa akpa etɔn bo le ɖɔ na ye do gbɔn olo didomɛ ɖɔ: «Naɖe wɛ awovi na nya awovi ɖo?» ²⁴ Na gbɛtɔ axɔsuɖuta ɖokpo tɔn lɛ lɔsu na le cite do yeɖe ji, axɔsuɖuta xɔn ma ja jiɖɔgbe gɛ.» ²⁵ Na gbɛtɔ ke le oxwe ɖokpo gbe lɛ lɔsu na nɔ fun ahwan le yeɖe lɛ mɛ, oxwe xɔn ma ja nukɔn yi gbe gɛ. ²⁶ Na awovi na cite do eɖe ji, na e ma ɖo awe, e ma kpego na ɖɔji gɛ, bɔ etɔn na wa vivɔnu. ²⁷ Na mɛɖe na byɔ gbɛtɔ ke ɖo hɔnhlɔn ganji ɖokpo we xwegbe bo na do fi nu etɔn lɛ, e ɖo na bla dahwe lɔ hwɛkpo, bɔ exɔn godo, e hɛn e na bɛ adɔkun etɔn lɛ kposese. ²⁸ Un le ɖɔ na mi le xojɔxo mɛ: «Ohwɛ ɖe kpekpe ke gbɛtɔ lɛ hu kaka do jɛ ozun ɖe kpekpe ke ye zun na Mawu, e na ze kɛ ye. ²⁹ Mɛɖe kpekpe ke zun Oyɛ Ɖeɖovo lɔ, e ma na mɔ hwɛsɔkɛ yi gbeɖe, ohwɛ etɔn le kɔ n'i kaka do yi. ³⁰ Jezu ɖɔ le ɖo ye ɖɔ ɖɔ: «Jezu bo ɖo oyɛ mawe.» ³¹ Mali kpo Jezu nɔvyɛ lɛ kpo wa bo le gaji bo ɖo mɛ ɖo xlɛn ɖɔ ye ni bo ylɔ Jezu na emye lɛ. ³² Togun ɖokpo flɔn anyi lɛlɛ do e bo le ɖɔ n'i ɖɔ: «Nɛtowe kpodo anɔwevi lɛ kpo le gaji bo le ylɔ we.» ³³ Jezu ɖɔ ye ɖɔ: «Mɛ nyi anɛɛ kpodo anɛvi lɛ kpo?» ³⁴ Okɔ nyinyi etɔn mɛ do kpɔn mɛ ke lilɛ do e lɛ, e le ɖɔ na ye ɖɔ: «Mikpɔn! Anɛɛ kpodo anɛvi lɛ kpo ke.» ³⁵ Mɛɖe kpekpe ke wa ojlo Mawu tɔn, mɛ exɔn wɛ nyi anɛvi sunu, anɛvi nyɔnu bo nyi nɛce.