¹ Jezu lɛkɔ wa kapɛnaumu le azan kpɛɖe godo. ² Mɛ lɛ se ɖɔ e bo ko lɛkɔ wa xwegbe. Gbɛtɔ lɛ susu kple kaka bɔ tɛnmɛ jan do yi ohɔn lɔ ji. Bɔ Jezu le ɖɔ oxo Mawu tɔn na ye. ³ Gbɛtɔ ɖe lɛ wa bo hɛn kplibɔnɔ ɖokpo, omɛ ɛnɛ wɛ hɛn azɔntɔ lɔ. ⁴ Susu gbɛtɔ lɛ tɔn wutu, ye ma kpego na hɛn kplibɔnɔ do yi Jezu de gɛ. Ye gbɔ xlɛ oxɔ lɔ ta, bo ɖe mɔ, lo bo ze azɔntɔ lɔ le anyi mimlɔ le zan ji ze nyi ɖo xlan asamɛ na Jezu. ⁵ Jezu mɔ ɖɔ dahwe lɔ bo ɖo nuɖiɖi azɔnhɛngbɔ tɔn. E ɖɔ na kplibɔnɔ lɔ ɖɔ: «Ovi ce, un ze ohwɛ towe lɛ kpose ze kɛ we!» ⁶ Osɛnkplɔnmɛtɔ ke le flɛn lɛ, anyi fiflɔnmɛ yetɔn nɔ ɖɔ le ayixa yetɔn lɛ mɛ ɖɔ: ⁷ «Naɖe wɛ dahwe ekɔ na ɖɔ lexa ɖo? E le zun mawu wɛ! Mɛ nɔ ze ohwɛ kɛmɛ zɛ na Mawu lɔkponɔ gee. ⁸ Jezu nyɔ ɛ azɔn ɖokpo le ayixa etɔn mɛ ɖɔ ye bo le ɖɔ lexa le yeɖemɛ. Bo le ɖɔ na ye ɖɔ: «Etɛ wutu mi le lin nu exɔn lɛ le ayixa mitɔn lɛ mɛ?» ⁹ Etɛ wɛ un wa gbɔ le flɛn din? Un sɔ ohwɛ towe lɛ ke we alo cite! Ze ozan towe bo ɖin zɔnlin? ¹⁰ Na mi na do nywɛ ɖɔ ovi gbɛtɔ tɔn lɔ ɖo acɛ bo na ze ohwɛ kɛ gbɛtɔ lɛ le anyizanji, e ɖɔ na kplibɔnɔ ɖɔ: ¹¹ «Cite bo ze nu ke ji amlɔ bo yi oxwe towe gbe. ¹² Dahwe lɔ cite azɔn ɖokpo bo ze ozan etɔn bo sɔ mɔ le mɛ lɛ kpose we nukun mɛ. Evivi na yeme kpose bɔ ye nɔ kpa susu na Mawu bo nɔ ɖɔ: «Mi ma mɔ onu lexa kpɔn ɖ'anyi gɛ.» ¹³ Jezu lɛ sɔn Kapɛnaum bo ɖi zɔnlin gbɔn otɔ lɔ to. Gbɛtɔ susu lɛ wa ede bɔ e le na nukplɔnmɛ ye ɖo oxo Mawu tɔn ji. ¹⁴ Wayiwayi mɛ etɔn, e mɔ dahwe ɖokpo bɔ ye nɔ ylɔ nyikɔ etɔ ɖɔ Levi ovi Alfe tɔn wɛ e nyi, bo flɔn anyi le fike azɔnwanamɛtɔ tokwacantɔ lɛ nɔ nɔ. Bɔ Jezu ɖɔ n'i ɖɔ: «Xodo un .» E cite azɔn ɖokpo bo xodo Jezu. ¹⁵ Zanɖe etɔn Jezu ɖunu le Levi lɔ we xwegbe. Ohwɛhutɔ lɛ su, kpodo tokwacantɔ lɛ, kpodo ahwanvi etɔn lɛ kpo ɖunu lɔ xa ɛ gba, ɖo ye su bo do xo do e. ¹⁶ Osɛnkplɔnmɛtɔ lɛ kpodo Falizinu lɛ kpo do mɔ ɖɔ Jezu bo ɖunu xa ohwɛhutɔ lɛ kpodo tokwacantɔ le kpo le kanse ahwanvi Jezu tɔn lɛ ɖɔ:«Etɛ wutu wɛ e le ɖunu bo le nu ahan xa tokwacantɔ lɛ?» ¹⁷ Jezu se oxo ke ye ɖɔ bo le ɖɔ na ye ɖɔ: «Mɛ ke le ganji ma ɖo doto we hudo gɛ, amɔ mɛ ke le jɛ azɔn. Un ma wa na gbɛtɔ hwɛjijɔnɔ lɛ gɛ, un wa na ohwɛhutɔ lɛ wɛ. ¹⁸ Ahwanvi Jaan tɔn lɛ kpodo Falizinu ɖe lɛ kpo le bla nu bɔ mɛ lɛ wa bo le ɖɔ na Jezu ɖɔ: «Jaan we ahwanvi lɛ kpodo Falizinu lɛ kpo le bla nu, etɛ wutu wɛ ahwanvi yɔtɔn lɛ mɔ nɔ bla nu gɛ?» ¹⁹ Jezu le ɖɔ na ye ɖɔ: «Jonɔ alɔwletɔ tɔn lɛ na bla nu hwenu ke asu lɔ le kpɔ xa ye wɛ?» Na asu lɔ le akpa na ye jɛn wɛ, ye ɖo na ɖunu bo na nu ahan. ²⁰ Hwe lɔ nu na wa wa bɔ ye na ɖe asu lɔ sɔn akpa na ye. Hwe exɔn nu ye na bla nu. ²¹ Mɛɖe mɔ nɔ ze avɔ yɔyɔ do ta nuzizan xoxo gɛ, ɖo ɖe na vun jo ɖe do bo na lɛ ylan hugan. ²² Mɛti mɔ nɔ kɔn ahan yɔyɔ do oka xoxo mɛ gɛ, ɖo ahan yɔyɔ lɔ na gba oka xoxo lɔ bɔ ahan lɔ kpodo oka lɔ kpo na la mɛ lɔ. Ahan yɔyɔ, oka yɔyɔ mɛ wɛ ye nɔ kɔn ɖo. ²³ Gbɔjɛzangbe ɖokpo, Jezu kpo ahwanvi etɔn etɔn lɛ kpo gbɔn ogle ɖe mɛ. Ogle lɔ ye ko do nukun de mɛ. Ahwanvi etɔn lɛ mɔ le kpo un, ye jɛ nukun ɖe lɛ ye ji. ²⁴ Bɔ Falizinu lɛ le ɖɔ na Jezu ɖɔ: «Kpɔn! Etɛ wutu ye le blo nu ke ma jɛxa ye na blo le gbɔjɛzangbe gɛ?» ²⁵ Jezu le ɖɔ na ye ɖɔ: «Mi ma xa nu ke Davivi blo hwenu ke xovɛ ci yi kpodo mɛ ke le akpa n'i lɛ kpo? ²⁶ Davidi byɔ Mawu we xwegbe hwenu ke Abyatɔ nyi avɔsantɔ ɖaxo. Davidi ɖu pɛn ke nyi Mawu tɔn bo lɛ na mɛ ke xo do e lɛ. Avɔsannu wle Mawutɔ kɛɖɛ wɛ ka yi mɛ ke ɖo acɛ bo na ɖu!» ²⁷ Bɔ Jezu le gɔna bo le ɖɔ: «Mawu blo gbɔjɛzan na gbɛtɔ lɛ wɛ, e ma blo na gbɛtɔ lɛ na gbɔjɛzan gɛ. ²⁸ Yi wɛ zɔn bɔ ovi gbɛtɔ tɔn yi aklunɔ na gbɔjɛzan lɔsu.»